Quatro Ciàcoe - Autuno che va, autuno che vien... - Setenbre 2005

Quatro Ciàcoe
Mensile de cultura e tradission vènete

de Piera Rompato

Da Schio (VI)

Autuno che va, autuno che vien...

El sabo dopo i cassadori de la contrà ze nà fora come al sòlito...

N'ocià butà, cussì par caso, al calendario tacà sù vissin a la porta de la cusina, me ga fato vegner in mente che fra poco sarìa rivà l'autuno. Come che passa presto el tenpo!
Naturalmente ghe gavéa pensà tante volte, ultimamente, ma in quel momento me ze tornà pi vivo che mai el ricordo de me popà che, in periodi come questo, el tacava a pareciare tuto l'armamentario par nare a cacia.
Eh, sì, el zera un cassadore, ma de quei che del sport del so core el ghe ne faséa na vera passion. E, su l'argomento, confido anca un me pensiero: se i cassadori dovesse trovarse in tanti, tuti insieme, i farìa pi bacan e i ghe metarìa pi passion de altretanti tifosi del calcio. Esagero? No' credo mia, parché a go na serta esperiensa, dato che son senpre vissuda vissin a amanti de la cacia, me popà par primo, po' un zio e quando che son nà a laorare me son trovà col capouficio presidente de la Session Caciatori de Schio e tre coleghi mèsi mati anca luri par el s-ciopo.
Se qualcheduni me domandasse el me parere su sto sport, che rancura tanti contrari ma altretanti ardenti sostenidori, dirìa che mi stao 'ntel meso. Penso che copare indiscriminatamente i usèi ze na gran bruta roba, però se i se lassasse sensa controlo i se moltiplicarìa co' na sveltessa incredìbile e i portarìa un gran dano ai prodoti de i canpi. Inportante ze tegnerse a le règole prescrite da la lege.
Me popà gavéa diversi amissi, ardenti cassadori cofà lu, e spesso 'nte le sere ancora tièpide, i vegnéa fin a casa nostra, cussì, par fare quatro passi dato che la zera solitaria fra i canpi, e naturalmente par contarse le aventure de i giorni passà.
Mi me godèvo un mondo a scoltarli, serto fin che no' go 'vudo l'età de nare anca mi a farli, quei quatro passi.
Comunque zera un piassère sentirli parché i gavéa un linguagio pitoresco e po' i descriveva i posti tanto ben, co' tuti i particolari, che me paréa de védarli. Spesso i contava fati divertenti ma anca qualche disaventura che però i savéa quasi senpre fàrghene risaltare el lato còmico.
Me ricordo che na sera ze capità do de i sòliti amissi de me popà co' insieme un toso che no' gavéo mai visto prima. Infati i me lo ga presentà come un parente che stava 'nte un paeseto de l'Alta Val Leogra.
I se ga messo a contare quel che zera capità 'nte la doménega 'pena passà; solo sto novo rivà el taseva. A un invito de me popà che anca lu parlasse, el ga tacà a dire: "A mi no' la me ze mia nà tanto ben. Go tolto sù el s-ciopo presto ma po' se ga alsà el vento e me ga convenudo tornare a casa.
Però vorìa contarve un fato che ze sucesso do o tre ani fà 'nte na contrà vissin a la mia. Dunque dovì savère che là ghe ze un fornaro che ga na gran passion par la cacia, ma sopratuto de i usèi a ala larga, come coturni, galinasse, fagiani, gali sedroni...
Però, dato che 'l so mestiero, e fra l'altro ze solo lu che lo fa, l'òbliga a scomissiare el laòro presto, quando che fa ancor note, mai che 'l gabia possudo nare fora in tenpo par caturàrghene uno, almanco uno. E se sa che a quei usèi bisogna tirarghe có i se alsa, 'pena prima che sbianca el giorno.
Cussì, 'pena che 'l podéa, el faséa al so giro par el bosco, s-ciopo in spala e el can a còa bassa de fianco, ma sensa mai poder védarghene uno de quei stupendi esenplari alsarse in zolo e poderghe sbarare.
El zera avilìo, poro diàvolo, ma na pìcola speransa ghe restava senpre in fondo al core. Quando che in quei loghi la selvagina ga tacà a calare par l'avidità de i cassadori, ze stà necessario provédare a ripopolarli. Par fare questo se ga dovudo tor sù na coleta par conprare i novi esenplari e anca el fornaro ga partecipà co' larghessa. Questo sucedeva daromài da più ani e lu el fremeva, ma spetava senpre sperando che la volta bona rivasse. Però, dato che mai la se presentava, un giorno el ga ciapà na gran decision.
El ga fissà un convegno co' do cassadori, so amissi fidati, e i ga tacà le confabulassion. Le se ga prolungà par diverso tenpo, parché paréa che ghe fusse de i disacordi, ma po' ze rivà uno de quei vènari particolari. Bisogna savère che i usèi destinà a la ripopolassion i vegnéa portà sul posto, periodicamente, al vènare de note; se podéa po' sbararghe el sabo dopo.
Un poco fora de man ghe zera el simitero del paese. Contornà de muri alti, el gavéa un cancelo fato co' sbare de fero pitosto fisse.
A note fonda, se qualcheduni se trovava da quele parte, el gavarìa possudo védare do onbre vèrzare co' precaussion el cancelo e sparire fra le tonbe. El sabo dopo i cassadori de la contrà ze nà fora, come el sòlito, co' cani e dopiete, ma, caso davero raro, no' se ga sentìo sbari da quele parte. Infati, par quanto i sercasse, gnanca un uselo se alsava da l'erba, da i cavassi, da le siese. Un poco a la volta òmini e cani ze stà costreti a spostarse verso posti pi alti, coerti da mughi e da pissi.
Ze stà 'lora che, quando el sole rossegiava in cielo, el fornaro ze nà fora da la so botega col s-ciopo in spala, el can davanti, e el se ga direto verso el simitero. Có el ze stà poco distante, eco vegner fora da na alta siesa i so do conpari armà e co i relativi cani.
Sensa parlare, solo intendéndose a sèsti, i ze rivà al cancelo, co' na bòta sola i lo ga spalancà provocando gran sigolar de fero rusinìo: i cani se ga slancià par le stradele fra le tonbe. E da queste, con zoli curti e pesanti, se ga levà un gran sbàtare de ale... fagiani!
Puarèti, lori i zera nati e cressudi in alevamento, no' i zera abituà a alsarse veloci 'nte l'aria verso larghi spazi, cussì, có i ga tentà de passare sora i alti muri del simitero, no' i ghe la ga propio fata. E ga scominsià la straje! I cani ga 'vudo el so gran dafare a portar ai paroni quei pori muceti de pene sensa vita e i carnieri se ga inpienà.
Naturalmente l'avenimento no' ze passà soto silensio; ste robe, specialmente 'nte i paesiti, le vien suìto passà da boca a boca. E ghe ze stà gran scàndalo, proteste da parte de la gente. Po', passà la prima sfurià, se ga tacà a ragionare:
"In fin de i conti chel poro fornaro, co' tuta la so passion, mai che 'l gavesse possudo torse el gusto de far parte de na batùa de cacia... Infine, có se tratava de tirar fora i schei par el ripopolamento, el zera senpre stà pi che generoso... Infine...
Basta che no 'l fasesse ancora asenade de quel genere!..."
E tuto se ga chietà e ze tornà come prima.

[torna sopra]

Archivio

2022