|
Da Maran Lagunare (UD)
'Na patata sbrovènte
 |
| L'aqua sul stagnadin la bugiva, quatro patate le gera drio barufà... |
Silvio Pavan, Partigian, in tel Sinquanta, drento i ani mèjo de pescà co la sacaleva (lanpara), el gera inbarcò bordo la "Roseta" de me pare e cò gera vacansa de scola, 'ndevo anca mi a pescà co luri. A bordo Sivio el me conteva senpre robe de quando che 'l gera partigian. Democristian de cesa, un bravo omo, anca se gera passò un bel tòco de tenpo, pareva che 'l provissi squasi paura de scredità la so persona a contame sta roba. Tanto xe vero che dopo no lo ò più sintùo mensonala.
El veva conbatùo co i partigiani titini del IX Corpus e, gera verso la fine de marso cò Silvio, che 'l gera za passò co la Garibaldi-Natisone de Vanni, ghe gera capitada sta roba. La sera prima gera cascada tanta neve e nevegheva ancora cò, verso l'una, dopo mesanote el veva scumissiò caminà. Inpegnò sul turno de stafeta. Silvio el veva passà la montagna e rivà la caseta isolada che steva giusto insima.
Gereva ancora scuro cò 'l gera rivò, duto bagnò strafonto, dopo sinque ore de caminada. Un feral inpissò ghe veva fato capì che gera qualchidun drio spetalo. Batùo tre culpi pian e do forti, spetò un giosso la porta la se versi. Anca se in quel mentre la tigniva un sial sul muso se capiva che la dona la gera zòvene. Dopo che i fassisti i ghe veva copò el marìo davanti i oci casa sua la gera deventada riferimento de i partigiani, giogo 'ndove vigniva smistài ùrdini inportanti.
Apena in casa, come che 'l vidi el fogo, Silvio el curi sùbito a scaldasse, mete le man còlo la fiama che la pareva contenta de arde. 'Na caena fissada sul sufito, la sostigniva un stagnadin negro de calìsine, duto sircondò de fogo. Sto bel vede el veva portò Silvio indrìo col tenpo. Pa un momento ghe gera paresto de esse a casòn, finìo de pescà, cò so pare pa inpissà el fogo el meteva i pajùi de cana palustra posta falo arde prima.
L'aqua sul stagnadin la bugiva, quatro patate le gera drio barufà, dute che le voleva stà parsora el bojo. Silvio le vardeva come inbriago. No 'l vedeva più de tanta fame. Sensa molà i oci del stagnadin, el ghe veva domandò a la dona se la tigniva la busta de daghe, in quel se sinti pianse un fantulin, la dona la curi verso la scala pusada, e cunsumài i scalini, la sparissi drio de quel che pareva un fienil.
'Pena restò sol, Silvio no 'l xe stò bon de risiste a la tentassiòn: slongò el brasso sul stagnadin, vantada la patata co i dii la fa sparì in scarsela anca se la gera sbrovènte. El pianse el se gera stuò e dopo un giosso Silvio el se gera trovò la dona co la busta zala davanti. Intanto che la ghe passeva i ducuminti la se inacorsi del fumo che 'l sfileva fora de la so scarsela. Dopo vee fulminò Silvio co 'na bruta ociada la zòvene mare la ghe cassa 'na potente papina sul muso.
In vita sua Silvio no 'l veva mai provò una cussì granda vergogna, e no tanto pa la sberla ciapada, ma par quel che 'l distin el gera stò bon de conbinaghe. I do zùvini i se gera vardài in ti oci tasèndo pa un bel tòco. El rosso sul muso, provocò de diversi sintiminti intanto el gera aumentò. In quìi puchi secundi che i gera stai a vardasse, i gereva rivài a disse un grumo de robe. Dopo sensa gnanca acorsesse, i se gera trovài abrassài come fradèi e i veva tacò pianse come do fiòi.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Setenbre:
Editoriale
Contro ogni terorismo
Dopo on'istà piena de bonbe e de morti, on pensiero responsàbile su sta situazion bisogna pur esprìmarlo!
de Mario Klein
|
