Quatro Ciàcoe - Trapèi da fémane - Setenbre 2005

Quatro Ciàcoe
Mensile de cultura e tradission vènete

de Dinerio

Sbiansi de sagessa contadina

Trapèi da fémane

Do za svezà... e el terzo in viajo...

"Era, Olga, par caso quela forestona grossiera che mena indrìo vanti in carossela to cugnà, no la sarà miga insinta da novo?"
"Altroché, cara! E a me sorela ghe toca pagarla fin che ela la sta casa. Da quando la 'a ga messa in règola co' i contributi questa xe la seconda volta ca ghe càpita. Mi digo che la se ga ciapà in stati 'vanti desmétare i braghieri da quarantina de parte. Cossa vuto, qua da noaltri la ga catà casa e canpi co na ara boriosa piena de ogni bendedìo. Dasbon, lo dise tuti, ma no par scherso, che Agna xe el paese de la cucagna. E l'albanesa lo ga capìo de paca, tegnéndose in bona co l'Alda e rufianàndose co' i me neodi. La fa fiòi a tuta alè, cofà na moreja da granari, tanto ghe li tende quel sornion de so marìo che 'l s'à fato lassar casa da l'inpresa gnonde che 'l laorava da mèsa cassola, parché in quatro ani che 'l xe qua no 'l xe stà bon de inparare a dire n'aca straca in nostran. Vuto métare ela, la xe sgaja anca massa! Solo che sta patafiona la ga un brasso curto parché, gnanca sùbito dopo disnà, quando Tulio se ponsa un'oreta sul sofà, ela no se dà da fare na s-cianta. La preferisse sbragagnarse i pòlesi rondàndoseli torno l'uno co l'altro pitosto de darghe na man a desbrojare i mistieri in cusina, o sinò la se pianta davanti a la television fin che no 'l ciama ch'i vaga tirarlo sù."
- Eco, barba, anche oncò t'ò portà fora na forcà de spagna fresca che sa 'ncora quel bon odore de canpagna che ne piase snasare tuti do. M'ò inbatùo par caso te sto sercion de confidense s-cete fermàndome a tore un chilo de pan biscoto dove i lo cusina 'ncora tel forno a legna, come ch'i faseva na volta. Del comarò che t'ò riportà m'à incuriosìo più de tuto quei braghieri mensionài da la siora Olga. De cossa se trata?
Urca, sensa volerlo te ga messo i pìe te na pissinara paltanosa che par snetarte le sòle de le scarpe cadarìa ca te colasse traerso el bugarolo de la lissia granda, come quelo che na volta al mese doparava la Carmela có la vegnéa a farghe la bugà a to bisnona. Anca quela la gera na narabòtola smaniosa pa' i nissòi, tuta nervo, e senpre de quela voja. Pitosto tondeta de fianchi e co le ganbe mocàe a mesa pùpola, la mostrava el curiàtolo de un uro piegorin cussì sporzente che 'l paréa la rebaltina del scritoio de to bisnono. Se ghe lo leséa in fassa che sta frescona la gavéa del morbin da vanso. Gera propio in ton i nostri veci có i diséa: "dona nana tuta tana"!
E bado mi che la s'à maridà co un maruscan pi furo de ela, senpre in boresso siben che de sera el se butava in leto bonora stratolto pi da le onbre ca no fà da le fadighe. Da quel ca se sa, el gera un furegon che 'l ghe daséa de ponta a larga siera 'fà un muco, sensa gnissun riguardo. Siché la tetona ga slevà na coà de ùndese cagnati ch'i podéa stare tuti in fila t'un trino postisso sensa sparsorare co le crape. Pènsate che có rivava dal marcà to bisnono in barussina, la lavandara, co' i brassi tuti rosegài da la lissia e fati suso anca in tenpo de bróseme, la lo spetava in batùa de la porta de casa e ghe vansava da rapolarghe de i fàlbui su le so massèle croarole de sgronduni, asiàndoghe moine rufiane da rissevimento de bela siera, magari solo par ingrassiarse el paron, col ris-cio che 'l slongasse na man in lataria, lu che 'l gera uno de quei grupiaròi de boca bona ca no se tirava indrìo gnanca par morte morire có ghe capitava còmoda de la pastura foresta. Serto, gera altri ani quei ca ga inprimà el Novessento. Te le fameje contadine de forte tacamento relijoso, no se podéa sgarare. Tuto gera ocasion de pecato e quando na sposa se ciapava in gravio par la quarta o quinta volta, no se podéa dire gnanca par scherso che se tratava de un falo de sómena. Altro che abordi! Siben che, dito fra mi e ti, ghe gera anca alora de le mamane fassilitone, col pelo tel stómego, che se prestava a fare serti pastroci de sfroso, faséndose pagare dessora de la broca. Le fémane in quei tenpi là no toléa tanti potaci par boca come le tose smalissiàe de oncò che, có le taca farse sbasuciare le vole sentirse lìbere de 'ndare in canporela come e quando ca ghe pare, sensa afani e sensa córare ris-ci de spiasévole conseguense.
Difarente gera el conportamento de le nostre polastrele ruspanti, tute casa e cesa, magari parché no le gavéa le ocasion de pàscolo che ghe xe 'desso e gnanca le 'ndaséa in volta col bonìgolo desquerto. Alora le gera anca pi tendùe da i sui de casa malapena che le se metéa l'abitin da festa pa 'ndar a cantare el vespro. Le ore pìcole no gera consentìe par gnissun motivo, gnanca conpagnàe da i fradèi pi veci. Quele maridàe invesse le vivéa in ansia da un mestro a l'altro fin ca no ghe vegnéa le so robe. To bisnona la gera na carabiniera che ogni mese la jutava aposta la Carmela a inciapinare la biancarìa sul cordin in custiera, 'pena rasentà in mastela soto la gorna del posso, giusto par controlare se ghe gera i panesèi de le nore, to amie Rina, Jole e Nastasia. Có la i vedéa destesi al sole la tirava un sospiro de solievo.
No par gnente, ma come ca te sa, a l'època ca parlemo, in casa nostra de tusi te ne catavi na sgnarà che sgnaolava fra in cuna, in spasseso, soto la tola e drento la mésa. Donca alora poder darghe el giro ai braghieri voléa dire un fastidio in manco.
Barba, gavevo intuìo che se tratava de calcossa del gènare, de trapèi che le fémane doparava in quei giorni del ciclo e vergognine come che le gera, forse l'argomento faséa parte de quei segreti fra done che no se dovéa smaronare. Ma vuto métare, spiegà come te sa fare ti, xe un spasso scoltarte!

[torna sopra]

Archivio

2022