Da Adria (RO)

Brustoline e coca-cola

Ridolini (Larry Semon).

D'i cìnema in Adria a gh'in jera tre de grandi e du de pìculi. El "Massimo", el "Politeama" e el "Cinema Roma"; se ghe zuntava i du parochiali: quelo d'i frati e el Ferini, ch'i jera i cìnema d'i bocia; fora da dutrina e dentro in cìnema, anca parchè gh'è stà periodi che a chi che 'ndava a dutrina i ghe daseva bilieti gratis o co la ridussion.
I film perlopiù i jera quìi de Tomìche (Tom Mix), popolarìssimo cow-boy, serifo, canpion de rodèo, e de Ridolini (Larry Semon), qualche volta anca de Salot (Charlie Chaplin). St'altri cìnema i jera più cari, propio parchè i jera par tuti, però se ghe 'ndava istesso quando ch'a gh'jera film interessanti e specialmente quando, passà la stajon de le braghe curte, emo scuminsià a smorosare.
La roba indispensàbile prima d'andare dentro la jera quela de far scorta de sfurissi: fora de la porta, sul marciapiè, jera fàssile catare qualchidun che vendeva chelcossa. La più famosa l'è senpre stà la "Gata": na siora grossa, sentà su na carega davanti al "Massimo", che la vendeva, a seconda del periodo, brustoline, fava luina e bati caldo.

Charlie Chaplin

Lì vissin no mancava altri vendrìguli co bistoca e fritele, maroni caldi e gelati, biscutini e carate, naturalmente ogni roba a la so stajon.
Capitava 'bastansa spesso che inte le ùltime ore de proiession el pavimento jera coverto de scorse de brustoline, de castagne, de bagige.
Adesso inte l'entrata d'i cìnema, parlo de quìi normali, - gh'è anca le cosidete "multilsala" che oltre a dare film diferenti in cinque, siè, sete sale, le ga: bar, ristorante, banchi de sfurissi e machinete che le te fornisse de tuto quelo ch'a te salta in mente - oltre al bilieto se pol conprare popcorn, coca-cola, ciuceti, mentine, caramele, ciche, golosessi vari...
Tuti i va a sentarse ben furnì e intanto che la pelìcola va avanti i s'inpigossa de porcarìe e beve par parale zo; ora che la zente vien fora no ghe resta che cartasse, butilie, prioti che spesso no i cata la via d'intrigarse int'i vari bidoni par le imondissie, missi a posta vissin a la porta e che resta senpre - varda caso! - mèsi vodi.

[torna sopra]