|
Editoriale
Contro ogni terorismo
Dopo on'istà piena de bonbe e de morti, on pensiero responsàbile su sta situazion bisogna pur esprìmarlo!
 |
| L'entrata a la sità de la pace, Sharm el Sheik sul Mar Rosso. (foto Enrico Klein) |
Da come xe 'ndà le robe, vegnarìa spontaneo dire che no se pole fidarse pi de nissun, dopo l'ondata de terore che se ga scadenà inte 'l mondo, spece in quelo che ne sta pi vizin. Epure bisogna tegnere duro, se se vole farghe fronte a la strategìa del terore!
Parole. Parole che se zonta ai mejari de parole che xe in circolazion in sti ùltimi tenpi, par i atentati de Londra e de Sharm el Sheik sul Mar Rosso. Na volta se diséa: "Col seco xe bona anca la tenpesta": in mancanza de altro, par 'desso va ben anca le parole. Le parole e el bon propòsito de contrastare el terorismo in tute le maniere permesse da la legalità e da la nostra civiltà.
La strategìa de tuti sti atentati la xe quela de inpedire che el mondo islàmico moderato, quelo che zerca de métare da parte l'integralismo religioso, el vègna a pati co l'Ocidente, co i Paesi europèi.
El fato che du, do persone, do Stati, do pòpoli vaga d'acordo fra de lori el ghe dà fastidio a on terzo, fora de testa e "malvagio", che el fa de tuto parché no possa èssarghe né acordo, né pace, né tranquilità. La zizania de la paràbola evangèlica la infesta oncora el fromento e la fa de tuto par sofegarlo.
"Dio fermi la mano assassina dei terroristi, mossi da fanatismo e odio e ne converta i cuori a pensieri di riconciliazione e di pace" ga dito in chei giorni el Papa, davanti a la strage de Sharm. Parole sante da métare in pràtica su la base de un acordo senpre pi streto tra cristiani, musulmani e ebrèi. Forse la xe proprio questa la prima arma de difesa: far nàssare na ondata de fiducia internazionale, non divìdarse par nessun motivo e dimostrare che no se ga paura.
Le bonbe viliache de Sharm le vole métare in zenocio l'Egito, colpévole de no èssare fanàtico, e le 'o colpisse nel turismo, alimentà ogni ano anca da on milion de italiani. E questo parché? Parché el tipo de socetà fissà da Maometto (571-632) no consente modìfiche né al modo de pensare e tanto manco de agire.
Ne la testa de i fondamentalisti-integralisti, xe nemico el mondo ocidentale e ogni "moderatismo" in tera araba; i "infedeli" i va fermà e castigà co la violenza e co le bonbe. Qualchedun el va predicando che, contro la strategìa del terore, bisogna doparare el "dialogo di civiltà". Me vien anca da rìdare (par no piànzare)! Con chi te métito a dialogare? Co i zentomila demòscani armà fin ai denti? Co i mile kamikaze pronti a farse saltare in aria ne la metropolitana, in autobus, te na moschèa, al marcà, a l'ospedale, in albergo? E po' chi xeli? Vienli da fora o te stai a do passi da casa?
El sugerisse ben el giornalista Bruno Vespa, te on artìcolo de sti giorni, che xe giusto che ogni musulman el possa pregare ne la so moschèa, ma a sto punto xe ben acertarse che dove che i va a pregare no ghe sia anca quei che fa propaganda terorìstica, e ne le scole coràniche i libri de testo, finanzià co i contributi de l'Union Europea, no i difonda ideali de violenza.
Insoma ocore vardarse 'torno non con difidenza, ma con prudenza e soratuto no scapare, no canbiare vita, non rinunciare a la nostra identità, par no dàrghela vinta a ste bestie umane che copa nel nome de Dio!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Setenbre:
Editoriale
Contro ogni terorismo
Dopo on'istà piena de bonbe e de morti, on pensiero responsàbile su sta situazion bisogna pur esprìmarlo!
de Mario Klein
|
