|
Da Maran Lagunare (UD)
L'omo co la barbeta
 |
| La vogada la se presentava longa e fadigosa... |
Somejèva che la guera la fussi finìa, ma no gera gnente vero.
Le vose zo in cusina lo veva svejò. Alfio el va a basso pa vardà chi che gera. El vidi so mare che, piansendo, la serca de convinse el marìo a no 'ndà fora la porta. Gera un sior in cusina, co la barbeta bianca, che 'l domandeva aiuto. Alfio lo veva visto altre volte, ma no 'l se ricordeva 'ndove. El sior el voleva che so pare lo portissi fin a Lignan co la batela a rimi. De quel che 'l riveva capì Alfio, almoto, el veva paura de ve drio i so calcagni i partigiani che i voleva faghe la pèle.
"Nò, Giovani, no sta' 'ndà, xe massa piricoloso", cuntinueva a suplicà so mare che, 'pena la vidi so fio, la ghe va incontro e lo strinsi sul peto come se la volissi protègelo. Dopo, giràndose verso el marìo la taca a pregalo: "Porta almanco Alfio con ti, el xe grando ormai, el pol date na man a vogà e cussì fè prima. Ah, Signor benedeto, tien conto i me òmini!" cuntinueva a pregà l'agna, intanto che li vedeva scapolà el cantòn de la "védova Radi", traversà la strada e rivà sul molo là che li speteva la batela.
Alfio el gera drio montà a bordo cò ghe gera vignùo inamente chi che gera el sior co la barbeta: gera Archimede Taverna, el paron de la draga 'ndove ani indrìo so pare Giovani el veva lavorò. In quela volta el gereva podestà a San Giorgio de Nogaro. Forsi adesso el scanpeva parché el veva paura, che gera mèjo scòndesse, e spetà che le robe le vignissi desmentegàe.
I gera drio passà soto el ponte. L'aqua la feva i bùvuli de sai che la coreva, che la vigniva incontro la batela. La vogada la se presenteva longa e fadigosa.
Alfio el vogheva davanti e la curiositàe lo porteva a fantasticà sora l'omo sentò a prova, un giosso stacò del so remo. Spaurìo, el sior el se volteva, el se gireva senpre de continuo.
"Chissà parché el scanpa: se no 'l ga fato gnente no 'l dovarissi ve paura! Sì, però, in sti tinpi xe fàssile trovà el mato che 'l vol mete in mostra el muso. Basta vede quel che càpita a Maran. Pensando ben, però, qualchi fassista dopo quel che 'l ga fato, el se meritarissi qualchi bela scòpola".
"Pupà, taja drito, sinò no rivemo mai a Lignan!"
"Voga, fio, che xe scuro, e mi go paura de 'ndà a sbate in sèco!"
Sentò a prova, in duta la traversada el sior no 'l veva fato altro che incorajà el so vecio operaio, prometéndoghe na bona mancia 'pena che le aque le se sarissi calmàe. El diseva, el contèva che elo no 'l veva mai fato del mal, che a San Zorsi el veva senpre jutò la zente bisognosa, màssima in quela volta che 'l gera podestà.
Dopo un'ora de vogada finalmentre la batela la riva in dàrsena de Lignan. 'Pena metùi i pie sul molo el sior co la barbeta el sparissi, ingiutìo indruman sul scuro che gera.
Un giosso prima che i rivissi el ghe veva racomandò a Giovani de portà la so valisa davanti l'albergo Italia, e de consegnàghela al custode.
No i podeva sbaliasse, a Lignan quela volta no gera tanti alberghi. L'"Italia", el "Marin" e el "Vitoria", a sento-dosento metri destacài de la dàrsena, gera i ùnici.
Gereva ancora scuro, pare e fio par paura de intopasse i camineva a tastuni. Col tàse del scuro i sintiva le onde che le se ronpeva in spiasa. Alfio el tremeva duto; el veva paura che de un momento l'altro podissi rivà là i todischi o pèso ancora i partigiani, dato el personagio portò co la batela. El se volteva de continuo, ma intorno no gera nissun.
I culpi su la lastra li veva ciapài de sprovista. El sior co la barbeta stando drento l'albergo, dopo ciamài batendo el vero, el ghe feva de moto de lassà la valisa davanti la porta. Dopo un àtimo salta fora un omo che, ciolta la valisa el torna de corsa drento. Gnanca spetò un giosso che indruman se distùa le lanpadine, lassando pare e fio in tel scuro. I gereva restài mal vedéndosse serà la porta sul muso. Altro che bela mancia. Mancomal che in quela note i veva vesto la furtuna che nissun se gera acorto de luri, de la vogada par gnente che i veva fato.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Genaro:
Editoriale
Tanti, tanti auguri... Ma de cossa?
Semo ogni giorno pi cativi: copemo, stupremo, distrugemo, 'sassinemo l'umanità e Dio... Cossa podemo augurarse?
de Mario Klein
|
