|
Da Este (PD)
La sisara
 |
| Có go verto el balcon, un spetàcolo, che no me spetavo, me ga fato restare de stuco... |
Stamatina, có go verto el balcon, un spetàcolo, che no me spetavo, me ga fato restare de stuco. Ne 'a note la sisara gavéa querto tuto. Paréa che i àlbari se fosse messa na tuta bianca. Là, in fondo, un pineto paréa na putèa co 'l vestito de la prima comunion. L'erba la jera un tapéo bianco, che me sgrisolava el core al pensiero che calcun podesse pestarlo.
Ma la roba più bea, quea che me ga dà più emossion, xe stà la rede che dividéa l'orto dal giardin. Cussì a ronbi bianchi, la me ga fato vegnere in mente i merleti che me nona faséa a l'uncineto par le tovaje de i altari e par le cote de i preti. La se fruava i oci a star lì ore e ore a sconcionare, ma la 'o faséa co 'l core e, serto, la se ga guadagnà el paradiso.
Go passà de i momenti de èstasi, vardando sto incanto de la natura e drento de mi diséa: "Ghe manca solo la mùsica."
Se ga roto l'incanto có go pensà: "Ma sòi propio romàntico e sensìbile, o me sòi rincojonìo ca me comovo par na roba del gènare?" E cussì so' tornà co i piè par tera, e me xe sùbito vegnù in mente che co sta sisara fatissa: chissà che rassa de fredo can che ghe sarà fora.
Jera ani che no se vedéa na ingiassada del gènare. Come quando ca jera toso e el fredo te screpolava i làvari e i se gonfiava che te paréi bosanbo. Ma questo sarìa stà gnente, el bruto jera che non te podéi più, par un bel tòco, basare la morosa.
A chei tenpi, 'ndàvimo a scola co la busta de plàstica, che co 'l fredo la deventava cussì dura che par vèrsarla te tocava scavessarla e par scaldarte un fià a te batéi de chel tanto le broche durante la ricreassion, co 'l risultato che poco te te scaldavi, in conpenso a te te macavi i calcagni.
Tra el spetàcolo de la natura e i ricordi, stavo a la finestra, forse, con l'ocio un poco da èbete, ma drento de mi a jero in brodo de giùgiole.
Me ga tolto, da sti pensieri, na selegheta che se ga posà su la vascheta de l'aqua par bévare, ma co na sbecotà la se ga incorto che l'aqua la jera giassà. E la vardava in su e paréa che la me disesse: "Ei, ti? Cossa feto? No te vedi che no posso bévare e che qua in giro no ghe xe gnente da magnare? Che core gheto? Cossa spètito par mòvarte?"
Me sentivo in colpa, e pensavo cossa fare, quando xe rivà n'altra selegheta, la ghe xe 'ndà vissin e le ga cuminsià a fare cìo cìo, a saltare, a darse baseti sul bèco, a sbàtare le alete e a córarse drio, come i putèi có i zuga. Go capìo, se ghe jera da capire, che a lore del fredo non ghe ne interessava propio gnente, parché, se el Signore le ghea messe al mondo, serto, el ghea anca pensà, come fàrghele restare.
Da "Permesso, scusa, pardon"
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Genaro:
Editoriale
Tanti, tanti auguri... Ma de cossa?
Semo ogni giorno pi cativi: copemo, stupremo, distrugemo, 'sassinemo l'umanità e Dio... Cossa podemo augurarse?
de Mario Klein
|
