|
Da la Marca
La bira al radicio rosso
Ne la sagra che inàugura la stajon del radicio, la Mostra del Precoce e del Tardivo a Rio San Martin, xe stà presentà 'na nova specialità, la bira al radicio rosso prodota in colaborassion col Club Amici del Radicchio, da la birerìa "San Gabriel" de Busco, specializada ne la produssion artigianal de bira, la famosa "home brewed ale o beer" de la tradission britànica. 'Sta bira la xe garbo-dolçe e la ga un color rosso de anbra e la vien comercializada col nome deposità "Ambra Rossa" che ga avùo sucesso in tute le presentassion.
Ne la degustassion, ne le çene de gala e ne i stand de le sagre la bira al radicio rosso la xe stada proposta in abinamento co altre pietanse a base de spadon, come la "pizza al fiore d'inverno" nota anca come "pizza alla trevigiana", la lugànega al radicio e la graspa radiciona.
Anca se la novità par la nostra gastronomìa, la bira al radicio la ga le so orìgini ne i "liquori medegài" del Medioevo, quando che a le bavande alcòliche se ghe zontava erbe medicamentose par favorir la salute. Jera famosi i "giardini dei semplici", cioè i orti riservài a la coltivassion de piante "officinali" da inpiegar ne le erboristerìe e liquorerìe de conventi e de spissiarìe; da tanti sècoli infati xe note le proprietà depurative e digestive del radicio che ne la farmacopea popolar el vegneva assunto pi che altro come "brodo de radici", par depurar i reni e favorir la liberassion de i intestini. Propio a Busco esisteva fin a la prima guera mondial 'na abassìa, famosa fin da i tenpi del Barbarossa che ghe gavéa concesso tanti privilegi e i so frati benedetini i vendeva medesine in tuti i paesi del Basso Piave.
La nova bira, che nel nome la ricorda l'anbra de i Veneti antichi che la comerciava in tuta Europa, la xe stada proposta in tante manifestassion enogastronòmiche, sia drento che fora de la Marca e la ga apressada no solo i bongustài, ma anca e soratuto i esperti e i apassionài de la bira, che i gavéa paura che el novo acostamento de sostanse el snaturasse le qualità tìpiche de la bevanda bionda, che inveçe le xe stae esaltàe dal novo conubio che xe veramente rafinà.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Genaro:
Editoriale
Tanti, tanti auguri... Ma de cossa?
Semo ogni giorno pi cativi: copemo, stupremo, distrugemo, 'sassinemo l'umanità e Dio... Cossa podemo augurarse?
de Mario Klein
|
