|
Memoria Euganea
Me nono, Toni Galo
 |
| Me nono el gheva la passion de i canarini, el se peréa via anca a farse le gabiete... (foto Carraro) |
Me nono Toni Galo, da parte de me mama, el jera alto e magro, mi a no lo go mai visto rìdare, de sicuro no 'l ridéa gnanca se te ghe fasevi le gatarìssole soto le xene (ascelle), no l'acetava schersi, ansi el te vardava co l'ocio de traverso, e quando ca jèrimo sentà a tola par magnare guài chi che verseva boca, ma soto soto el jera de na bontà granda. A me ricordo có 'l leséa el giornale: se ghe jera calche notissia bruta che capitava, sensa farse védare el tirava fora el so fassoleto zalo e rosso par sugarse le 'àgrime. Par chei tenpi, uno che leséa el giornale, voleva dire de na persona abastansa fora dal normale.
La so longa vita abastansa aventurosa - l'è morto a 84 ani nel I939 - apena maridà co me nona, i xe partìi par el Brasile, e sicome che 'l jera bon de lèsare e scrìvare, i lo ga messo a controlare la produssion de cafè. Là xe nata me zia Maria, me zio Piero e me zia Noris; me mama, la pi zóvane, la xe nata apena tornà in Italia.
Quando che 'l se ga mucià arquanti crusiero e stufo de vìvare in meso al Mato Grosso, el xe tornà, ma in Italia, in te i ani intorno al 1890, ghe jera na granda crisi, la gente continuava a emigrare, ghe jera epidemìe de pelagra, la vita media no la rivava a 50 ani, ma me nono co i so crusiero el xe riussìo a métare sù na ostarìa vissin a na fàbrica de quarèi. I caretieri i se fermava a magnare, me nona la jera braveta a fare da magnare e la gente se fermava volentiera; i fiòi i cresseva, co la ostarìa ben o male se vivachiava, me zie le se ga maridà, me zio el faséa el feroviere a Monsélese, in casa ghe xe restà solo me mama co me noni. Ma xe vegnù che anca me mama la se ga maridà, me nono el ga proposto a me popà de fare l'osto, ma la tradission jera de stare tuti in fameja (la nostra la jera de ventisinque persone tra grandi e pìcoli), e cussì me noni i ga dovesto vèndare l'ostarìa.
Me nono el gheva la passion de i canarini, el se perdéa via anca a farse le gabiete e a tenpo perso el 'ndava par i marcà a fare el mediatore. Da noantri el vegneva spesso, el stava a disnare e dopo co la so bicicreta el 'ndava a casa; ma intanto xe morta me nona e me nono el xe restà da elo solo. Cussì da noantri el vegnéa pi spesso; a lo vedéa senpre pi tristo. E xe vegnù che semo partìi par la Libia; noantri tosati forse no ghe faséino tanto caso, ma me ricordo sto poaro omo che 'l ne vardava montare in treno... Me mama, poareta, la ga fato tuto el viajo sensa mai na s-cianta de soriso so la boca.
A se scrivévino e lu el ne rispondeva e, on ano dopo gnanca, el xe morto a 84 ani. Noantri cussì distanti no ghemo podesto 'ndare al so funerale: i xe stà momenti veramente tristi.
Come ca go dito pi indrìo, forse no se rendévino conto de la tristessa che gavarà passà la me poara mama; adesso ca me so' reso conto da l'altessa de i me ani, la comossion la me ga ciapà co on gropo in gola e digo che la storia se ripete: fin ca semo insieme mi e me mujere, se tira 'vanti, ma penso a me nono cossa che 'l gavarà passà in te chel'ùltimo so ano de vita. E serco de ricordare come alora ca jèrimo tosati squasi iresponsàbili, ma me inacorzo come ca se ripete sti momenti "inesorabili".
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Genaro:
Editoriale
Tanti, tanti auguri... Ma de cossa?
Semo ogni giorno pi cativi: copemo, stupremo, distrugemo, 'sassinemo l'umanità e Dio... Cossa podemo augurarse?
de Mario Klein
|
