|
Da i Coli Euganei
Le cure de nantro tenpo
 |
| Questa xe la zia Gilda che, a chel tenpo, la ghe faséa le punture a quasi tuto el paese. (foto G. Bellotto) |
Al tenpo che noantri se gera tusiti, la zia Gilda, che la sarìa la sorela pi zóvane del papà, la andava a farghe le punture, no digo a tuto el nostro pìcolo paeseto, ma a na bona parte sì.
I gera i ùltimi sgòcioi de chei modi de curarse, parché dopo poco sarìa canbià tuto. Ma alora, anca de note, se sentìa bàtare sol balcon e na vose ciamare la zia, pregàndola de 'ndare a casa sua parché qualcun gavéa bisogno de na puntura. Alora la zia se alsava, la metéa sora el gas la scatoeta co la siringa drento, e có la gera bujìa, ben sterilizà, via che la partìa a piè su par le strade scure de la colina. Qualche volta capitava anca che quel che gera vegnù a ciamarla, da la confusion coresse casa, lassàndola sola. Ma la zia non se perdéa de corajo, pensando che quel che la gera drio fare la gera on'òpera bona.
No se parlava certo de soldi par riconpensa, ma de na butilieta de ojo, on tochetin de lardo, on poche de patate: insoma quel pochetin che la gente podéa dare, insieme a tanti ringrassiaminti.
Có se tratava invesse de magagnete pìcoe, la gente se rangiava co le erbe e co altri sistemi pi o meno sènplici. Par el mal de denti par esenpio, se usava métare sol buso del dente carià (che alora se diseva marso), na sboconà de graspa. Se no passava el male, se provava alora co na patata: la se gratava co la gratarola e, smissià co l'aséo, messa drento na pesseta, la se posava sora la massèa. Te sentivi sùbito on fresco e qualcossa la faseva de bon, insoma.
A chel tenpo, el "dentista" che jera a lavorare la tera, có rivava el passiente, el molava zo la vanga, par prima cosa. Dopo e lo faséa sentare sol meale de la porta, in facia al sole parché no 'l vedesse ben quel che stava capitando. Na volta ligà co on spagheto el dente in question, el ligava st'altro capo a la manilia de la porta. Po' el ghe faséa ciapare on tremolon al poro malcapità, sarando la porta de colpo. Qualche volta el dente restava tacà al spagheto, altre invesse nò. E alora el ciapava na tanaja, tegnù lì par l'ocasion (qualche volta anca poco lustra) e "via el dente, via el dolore" se diseva alora. "Ma, ciò, comare, go sentìo on reassamento, come se fusse crepà na castegnara" le se contava dopo tra comare.
Metemo però in ciaro che questo no gera el me tenpo de toseta. Le gera robe vere, ma capità prima e contà a noantri pìcoi da i grandi de fameja. Cussì, par i forùncoli grossi che a volte vegnéa fora qua o là, e che alora i se ciamava "bujuni", se usava métarghe sù, parché i vegnesse a cao, qualche foja de fava grassa, che se trovava da noantri, drio na piantà. Se ghe pelava la pelesina e la se meteva sora al male. El risultato gera quasi senpre positivo.
Sora el coverto del porsile, su i cupi, ghe gera che renpegava, i fiuri par el mal de recia. I se pestava ben e se meteva el liquido che vegnéa fora, (na spece de late zalo) a giosse drento la recia. Anca el late de mama, senpre a giosse, drento la recia faseva ben. Col brodo de gramegna, se curava i disturbi de 'e vie urinarie. El brodo de radecio, o mèjo de crestacan, el gera on rimedio par rinfrescare el sangue, se diseva, e par l'intestino pigro. La salvia la gera doparà par i gropi sol colo, o mèjo par le indigestion. Co i fiuri de tilio, se faseva el decoto contro la bronchite. Co le raise de nogara, smissià col senape e messo sta crema sora el male, ghe gera uno (che vegnéa da on paese lontan) che sercava de curare la siàtica. Ma el ga durà poco el so esperimento, parché dopo aver fato, so la ganba de on malà, dani gravìssimi, par poco no i lo ga mandà in preson. El lin se semenava, parché co le so semessete, se faseva le famose pastele parché se ismarsisse el gataro (sì, el se ciamava proprio cussì).
Noantri pìcoi, se coreva spesso a vardare el trameto del lin có 'l gera in fiore. I gera de i fioriti celesti come el ceo e legeri come ale de farfàe, proprio on incanto da vardare. Eco che invesse la rùa (ruta), ben pestà e fato vegner fora el pocio verde, la servìa par far morire i vermi. No vojo gnanca ricordarme el gusto de chea sculierà de pocio verde. Mèjo canbiar discorso.
Certo che gnanca el gusto de l'ojo de rìssano e de queo de merlusso, no sarìa serto on bel ricordo. Ma on momento o l'altro, uno par la pansa e st'altro par rinforsare, capitava che se dovéa torlo. Me vien in mente na veceta, che la vegnéa zo dal monte e la se fermava a contarne le so aventure alegre da toseta. La pi bea la gera quea de chea volta che la gavéa dito a la so mama che l'ojo de rìssano la lo gavarìa bevù solo se éa la se gavesse girà. Intanto che la mama se girava, el mezo goto de ojo de rìssano la lo gavéa svodà drento na scarpa del popà, rimessa sùbito soto el leto. Tuto gera 'ndà lisso, fin che la doménega matìna, sto papà se ga messo le scarpe par andare a messa, e pluf, xe saltà fora na onda de ojo, lassando tuti de sasso, come se diseva alora. Come che se rideva de gusto, ogni volta che sta veceta la ne ripeteva sta so aventura de toseta.
Ghi ne gera poche medesine alora, e la magior parte le vegneva fate al momento proprio dal farmacista, che se ghe diseva spissiàe, mentre la risseta se ghe diseva rèpise. Quando che qualcun parlava de spissiàe, mi gavéa senpre paura che i me portasse a casa la manessena: mama mia che cativa! Me la ricordo ancora. A chi sofrìa el mal de la coriera, i ghe consejava de viajare co na patata in man, opure on masseto de parsìmolo. Anca quea che ghe se ciamava naransàta, (forse parché la savéa da naranse) faséa ben par sta roba. Pi tardi go scoperto che la se ciamava melissa o erba de i frati, che i faseva proprio on liquido contro el mal d'auto.
Mama mia, quanto tenpo xe passà. Epure me par de védare ancora adesso, chel veceto che vegneva a rancurarse la naransàta, e on saco a la volta el se la cargava in spala. El 'ndava via curvo, ma non el mancava mai de saludarne co on soriseto: "Ciao, tusiti, se vedemo doman" el diseva. Pochi adesso, se curva a vardare se torno la siesa ghe xe le piante de naransàta (ve assicuro però che da mi le ghe xe ancora). Pochi ga el tenpo de dire: "Ciao, tusiti, se vedemo doman", regalando on soriseto che no costava gnente, ma ne faséa contento el core, faséndone sentire persone grandi.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Majo:
Editoriale
Eco dove nasse i àngeli
Davanti a casi come quei de Samuele e de Tommy, vien da pensare de avere scoperto el posto dove nasse i àngeli del celo
de Mario Klein
|
