|
Editoriale
Eco dove nasse i àngeli
Davanti a casi come quei de Samuele e de Tommy, vien da pensare de avere scoperto el posto dove nasse i àngeli del celo
 |
| Tommaso Onofri, el pìcolo "angelo" de Casalbaroncolo (Parma). |
Xe passà poco tenpo da l'ùltimo orendo delito: la morte violenta de Tommaso Onofri, na creatura de 18 mesi. Xe pur vero che tuto passa, ma fati del gènare ghe vorà tanto tenpo prima ch'i se scancela da la memoria de tuti. E fin che no i passa, se xe portà a pensarghe sora, a parlàrghene, a interogarse su come se possa rivare a tanta crudeltà.
Soratuto se se domanda da dove la possa vegner fora sta ferocia, sta forza disumana, sta volontà de sentirse paron de la vita de i altri. Che gusto pol èssarghe a provocare soferenza o morte? Parcossa nare a ciapàrsela con chi no xe in grado de difèndarse, come i putini o i anziani soli, che no xe boni de oporse a la violenza?
Le xe tante le rason che vien tirà in balo: da la natura primitiva de l'omo, nato par dominare, a la mancanza de pene severe contro la criminalità; da la superbia e l'aroganza che fa sentire l'omo ormai paron de se stesso e de la vita, a la pèrdita del senso de l'altruismo... Sta de fato che, a la base de tute ste scurzarole, ghe sta senpre la cultura e l'educazion: la cultura e l'educazion a la vita.
Semo (anca senza che se ne incorzemo) senpre pi fredi: le xe poche le robe che ne sorprende e che ne comove. Ogni giorno se copa on futìo de persone in màchina, tosi che se scortela tra de lori o che copa i genitori; adulti senza scrùpoli che ghe roba l'inocenza a creaturine; guere che massacra popolazion in nome de giustizia sociale; òmeni che se scana mezi con de chele parole che pesa pi de le piere... Co sta cativa scola vien fora na cativa educazion e na pèssima abitùdine a farghe senpre manco caso a robe che va rifiutà e contrastà.
Nel caso del pìcolo Tommy, no stemo parlare de "furia bestiale": no stemo ofèndare le bestie parché de le volte le deventa crudele par colpa de i òmeni. Có jero toseto, a casa nostra a slevàvino i coneji; me ricordo che me popà el me diséa de no 'ndare a tontonarli quando che la coneja la gavéa fato, parché senò, par istinto de protezion, la i gavarìa magnà, par paura che noaltri ghe féssimo del male ai so pìcoli.
Ghe xe poco da zercare el movente del delito: qua ghe xe de mezo la strutura individuale de personalità de l'individuo criminale che no 'l xe cressùo con l'idea che la vita, el mondo, l'universo i xe incontro con i altri e no ocasion par esercitare la propia onipotenza. Fin che l'individuo xe pìcolo ghe vole l'educazion de i nò, de i lìmiti, de le rinunce, senò finiremo senpre co la vitoria del pi forte sul pi débole. E continuaremo a sfornare àngeli, àngeli de tuti i tipi e de tute le età.
Eco da dove salta fora tute ste creature senza pi corpo, che va a finire in celo! Da qua, da sta tera, da sto giardin, che massa volte vien trasmormà in macelo!
Se xe vero che el dolore de tanti el pròvoca solidarietà e fiducia, metémose pure a urlare che questo xe el momento de rifiutare la lògica de la giungla e xe l'ora de far falire... ste fàbriche de àngeli!
E questo el sarà uno de i gesti pi adati par dimostrare gratitùdine, rispeto, riconossenza e amore a chel tipo de "Angelo" che ne ga dà la vita: la Mama.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Majo:
Editoriale
Eco dove nasse i àngeli
Davanti a casi come quei de Samuele e de Tommy, vien da pensare de avere scoperto el posto dove nasse i àngeli del celo
de Mario Klein
|
