|
Da Schio (VI)
Solidarietà e generosità
 |
| Uno de i alievi drio el so telaro a man. |
La zera na bela doménega d'inverno, frescheta ma serena, de tanti, tanti ani fà. Credo che 'lora gavesse su i diese ani.
I me genitori gavéa deciso, quel dì, de nare a far quatro passi, il che vorìa dire, 'ntel nostro modo de intèndarse, che se gavarìa dovudo caminare almanco par sinque o sìe chilòmetri, e senpre a pìe.
"E 'ndove ca nemo?" ga domandà me popà e mi, sensa esitassion, go risposto: "A Santorso, da Tomiello." Sto tissio, paron de na vecia tratorìa, el zera amico de me popà e, come lu, apassionà cassadore; quando che nàvimo a trovarlo, no' i ghe molava pi de contarse aventure de cacia.
A mi me piaséa quel posto parché, e solo d'inverno, i faséa el macafame. Se tratava de na torta rùstica, confessionà co' pan insupà 'ntel late, ovi, pinoli, ueta passa e sùcaro, naturalmente. Ghe zera anca na version speciale, sensa sùcaro e co' farina integrale, ojo e sòssoli (ciccioli).
'Lora, quel dì semo partìi verso le do e, caminando de bon passo, a le tre zèrimo a Timonchio, la contrà che se trova prima de Santorso. Me popà el ga dito: "Invesse de nare diretamente da Tomielo, femo la strada che passa vissin a la vila Rossi, cussì (rivolto a mi) te pol védarla."
Se gavemo direti su par na strada in riva; dopo un quarto d'ora semo rivà a na spece de ponte; a sanca se vedéa la vila che gavéa fato costruire el senatore Alessandro Rossi, paron del lanificio de Schio (e altri!). El possedéa anca un palasso a Schio, vissin a la so fàbrica, ma a lu ghe piaséa Santorso parché, essendo situà ai pìe del monte Suman, el zera riparà dal vento e, d'inverno se sentiva manco el fredo e l'umidità. Go possudo védare poco parché la vila zera distante da la strada; me son resa conto che la zera grande, co' un bel pòrtego davanti: me paréa che sul muro de fondo ghe fusse de le piture, ma no' se distingueva ben le figure.
Có son passà da l'altra parte del ponte e go vardà zo, son restà incantà; soto, el teren in dissesa zera coerto de cavassi pieni de bòcoli, piante alte, vanèse de fiuri, e el rivava a un lagheto.
E tuto zera disposto co' arte. Zera la continuassion del giardin de la vila, che se distendéa a pèrdita d'ocio.
Tuto questo lo go contà come introdussion a naltro discorso che vol parlare de la generosità che tanta gente dimostra sià 'ntel fare elargission concrete, sia prestàndose 'ntel volontariato, come successo 'nte la particolare situassion che ze vegnù a crearse, a fine Otossento, par la vila Rossi.
Infati, come tuti i mortali, anca Alessandro Rossi a un serto momento el ga lassà sto mìsero mondo (par lu, a dire la verità, mia tanto mìsero), e 'ntel so testamento i ga trovà scrito che la vila de Santorso, col parco e el podere che stava intorno, la dovéa èssare destinà in beneficensa. De conseguensa, l'incàrico de aministrare el conplesso ghe ze nà a le "Opere Pie" de Schio.
Sto incàrico i lo ga svolto in vicende alterne; a un serto punto, credo dopo la seconda guera mondiale, 'nte la vila ze stà acolti tusi handicapati e de i disabili. Questo ze vegnù a creare na situassion inpegnativa e delicata tanto che, 'ntel 1974, i genitori ga deciso de formare n'Associassion che li seguisse mèjo, e cussì ze nata l'ANFFAS (Associazione Nazionale Famiglie Fanciulli Adulti e Subnormali). Ultimamente sta dicitura ze stà canbià in ANFDIR (Associazione Naz. Famiglie Disabili Intellettivi Relazionali).
El fine che se proponéa i Soci zera che i disàbili, i handicapati, i fusse aiutà a vìvare in condission el pi possìbile dignitose e vissine a la normalità. Prima de 'lora spesso no' ghe vegnéa prestà le giuste cure, i restava sarà in casa, opure assistìi co' sistemi manicomiali. 'Ntel 1974, invesse, l'ANFFAS ga avià na scola de formassion professionale in modo che i tusi che gavéa de le atitùdini al laòro i podesse inparare un mestiere, come, par esenpio, quelo de fare tessuti co' el telaro a man. Dopo i primi tentativi e visti i risultati sodisfacenti, la ze stà regolamentà secondo le Leggi esistenti e finansià da la Regione Veneto. 'Ndando avanti, par socialisare na parte de i fiòi che a Santorso i se sentiva un poco isolà, ze sta istituìo, presso l'Istituto Salesiano de Schio, un centro; 'ntel 1995 el medésimo vegnarà dà in gestion al CNOS, senpre de i Salesiani, consentendo ai medésimi de fare formassion sia "integrata" che normale.
L'ANFFAS scomissiava a èssare conossuda e apressà. Senpre pi tosi i ghe vegnéa afidà e altre associassion, che no' nòmino par mancansa de spassio, ga oferto aiuto e colaborassion. A un serto punto, de conseguensa, ghe ze stà bisogno de magior spassio e cussì el Comune de Schio ga conprà e messo a disposission un edificio in via Valbella, a Schio. Là ze stà anca instalà la sede de l'Associassion (che la gente, malgrado el canbiamento, la continua a ciamare ANFFAS).
Par de pi ze sorti altri do centri de accoliensa, uno 'ntel comune de Torrebelvicino e l'altro de Seghe de Velo.
Fra le tante atività che vien svolte da l'ANFFAS ze da notare l'istitussion de la cooperativa Nuovi Orizzonti, al fine de dare un posto de laòro ai tusi che vien fora da la scola de formassion professionale "A. Rossi". Su n'area de na desina de ètari vien prodoti e vendù fiori e piante da apartamento.
Se par caso un giorno qualcheduni ve regalasse un bel ficus o n'aràlia, fè un pensierin come questo: "Che la sia stà coltivà da i tusi de l'ANFFAS?"
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Majo:
Editoriale
Eco dove nasse i àngeli
Davanti a casi come quei de Samuele e de Tommy, vien da pensare de avere scoperto el posto dove nasse i àngeli del celo
de Mario Klein
|
