Le storie de Nando

Luisa de Vila del Bosco

La Parochiale de Vila del Bosco, dedicà a S. Nicolò véscovo.

Da diversi dì, Santino e so mojere Palmira, a la sera in stala, invesse de fare filò, i se insenociava davanti al quadreto de S. Antonio, disendo do orassion par no pensare al gropo de 'vere rissevùo l'órdene de mocàrsela da el cason, abità da lori da ani, parché 'l paron, el sioroto - sior Agostino - 'l xera stà pi che deciso: "No steme contare busìe! Se no paghè, ve meto in strada..."
Santino 'l gavéa ben oto tosi, de cui uno, Remigio, nato muto e na s-cianta èbete; a meza istà xera vegnù on tenporale che gavéa destruto i racolti.
A darghe na man a Santino, ze stà el fradelo de Palmira, benché anca lu 'l gavesse sincoe tosi; ma la fatorìa la xera granda e, strenséndose, se podéa vìvare ben almanco par 'l tenpo de trovare na sistemassion nova, magari co l'aiuto del pàroco, don Esechiele, da diversi ani a Vila del Bosco.
Cussì na matina tuta la fameja, xe partìa da Cona, e a la crosara par Vila del Bosco, Santino se ga insenocià davanti al capitelo de la Madona, diséndoghe: "Aiùtame, Madonina nostra, a tornare on zorno a sto paese dove so' nato e go messo sù fameja."
Nel fratenpo, Berto, so cognà, el gavéa mucià tante ratatuje che xera in te na stansa, e là 'l ga fato posto par camereta de i sposi, mentre so 'l granaro el gaveva parecià 'l posto par i altri tosi.
Laoro al momento ghe ne xera, ma le boche le xera tante, e 'l tenpo passava sensa che vegnisse na bona parola da don Esechiele o da altri sioroti de la zona, e al momento na scaretà de tosi, diti "stagionali" i xera a ramengo par la ostarìa o ne i paesi tacà, pronti a qualsiasi servissio.
Berto, 'l gavéa la tosa pi granda, Luisa, stessa età de Remigio, brava in casa e co so tenpo a insegnare 'l catechismo ai pùtei de la prima elementare, lodà dal pàroco e da le fameje del paese.
Remigio, 'l gavéa trovà na persona che lo ajutava, e pianin pianin 'l se ga tacà a la Luisa, che tanto la ga suplicà don Esechiele, che la xe riussìa de portarlo a dotrina e in altre mansion, parlàndoghe co amore, tanto che 'l toso no 'l conbinava pi monade e scoltava de pi i so genitori.
A na procession in paese, Remigio, 'l se ga acolà 'l peso de la crose da l'inissio a la fine, e dopo tuto contento, 'l xe 'ndà da la Luisa par spartire le caramele che ghe gavéa dà don Esechiele.
Pi spesso, essendo istà, Berto ciamava so cognà e de scondon i vardava Luisa e Remigio, che meteva fiori de canpo a la Madona del capitelo so on troso, e dopo insenociài i diséa do orassion.

L'idrovora so 'l canale Barbegara.

La fatorìa de Berto, la xera a tri piani, e sora, ghe stava 'l granaro, refugio de veci restèi, sape, fiaschi vodi, fassine e altro; da là se vedeva 'l paese, le stradele, 'l simitero, 'l Brenta e la cesa, dedicà a S. Nicolò.
La Luisa, no se la ciapava pi de tanto se portando zo in paese Remigio, la zente ghe ridéa drio le spale; ela sentiva in core che dare ajuto a on toso che no gavéa amissi né altri che ghe dasse vose, e so nona la ghe diséa senpre: "Serca de volerghe ben a chi pi ghe n'à de bisogno."
Ma na matina, Remigio, 'ndando na s-cianta de mòmolo par 'l paeseto, rivà tacà la cesa, el ga visto 'l careto (co tacà 'l musso) de don Esechiele, che doveva 'ndare a S. Margherita de Codevigo, par darghe 'ndrìo de i libri che sto so fradelo in Cristo ghe gavéa prestà.
Sensa pensarghe, Remigio, 'l xe montà so 'l careto e 'l ga scorlà le rédene, cussì el musso xe partìo, e co nissuno che se gavesse incorto.
Remigio, no savéa come e cossa fare, tanto 'l musso 'l paréa savere la strada, e girava a destra e a manca, fintanto i xe rivà so la strada che portava a Coressola, dove 'l spassin ga riconossùo 'l careto, e 'l lo ga fermà, sensa che Remigio podesse spiegarse, gnanca a gesti.
Xe stà lògico che don Esechiele, ga rabonìo Berto, che a so volta el se la ga ciapà co so cognà, e sto qua 'l se ga sfogà co la Luisa, che la ghe dava massa pévare al toso.
Morale de la favola: xe nata na barufa che ga messo a tera la tosa, mentre Remigio xe 'ndà a scóndarse in granaro, dove la Luisa, ghe ga perdonà 'l fato.
Qualche dì dopo, xe nata n'altra magagna: Remigio, no 'l se vedéa da la matina e tuti se ga messo a sercarlo, in paese e anca ne i dintorni; ma del toso no se védea na s-carpìa!
Serca e riserca, a la fine el toso xe stà trovà 'l di seguente, vissin a la idrovora so 'l canale Barbegara, dove in sèguito a la so matana, dal rimorso 'l xera 'ndà a butarse.
So 'l finire de l'istà, avendo finalmente trovà laoro, Santino saludava Berto e famijari, caricando le so quatro strasse a la volta de Conche de Codevigo.

[torna sopra]