Ricordi (in dialeto de la Lessinia Centrale)

Zugar in corte

'N tòco de corte, come l'éra na olta.

... Mi, coando éra 'n buteleto, pi che sentirme fiol de la me fameja, me sentéa fiol de la corte. La corte l'éra 'l me tuto o coasi. 'N cusina, noantri buteleti se ghe staséa 'l tempo de magnar, far i còmpiti e dopo la corte l'éra tuta nostra. La corte de la me contrà, Lumiago, no' l'éra tanto granda, ma la paréa fata a posta parché noantri brachi, podéssimo zugar e far le nostre imitassioni de i grandi.
'Sta corte, l'éra fata come 'na feta de luna magra, tacà ia 'n te 'na costéra de campi magri e 'n ria, con la parte verta che guarda al sol basso de l'inverno. Rento gh'éra sicue fameje con sicue case taché una a l'altra, do stale, 'n pòrtego, do tede; le altre stale i porteghi e le altre tede, i éra 'nte 'n'antra corte pi bassa, che ciamàimo "la cortesèla".
Ma, tornando ne la corte, coela 'ndó la vita la cresséa gajarda, 'n te sta corte gh'éra: come te naséi rento, a drita 'n piloto, con la scrita de nùmari romani e de létere e le diséa coando la contrà l'è stà fata da i frateli Ederle, ma, de i nùmari i éra consumè, cossì no' se podéa lésar con precision, la storia de la corte; oltà par tera 'n fila una adrìo a l'altra, gh'éra le do spale che tegnéa sù l'architrave tondo che gh'éra 'na olta col cancel, l'altro piloto e i sassi del vòlto, i éra ne le cànie soto 'l piano 'ndó gh'éra i vedoti e le bote del vin. Gh'éra anca du sassi ben laorè, e do bale grosse de sasso che, par belessa le staséa 'ndó tacàa 'l vòlto de piere, anca coesti i éra ne le cànie. Atorno a le case 'n corte, fra 'na porta e l'altra gh'éra de le piere, messe lì par sentarse. Gh'éra anca tre pile par spacar i grani e far la farina, de polenta, o l'orzo o par spacarghe 'l gran a le galine o par tante altre robe. Ogni casa la gavéa la pèrgola de ua, fóra da la porta de la cusina e a fianco de ste porte gh'éra 'na pianta de leandro e de istà gh'éra sempre le campanele che rampegàa sù par le vigne.

Me mama con la bacheta in man, che para la vaca: la coèrse 'l piloto 'ndo ghè scrito la storia de Lumiago.

I zugàtoli de noantri buteleti, i éra coasi tuti i atressi de laoro de i nostri bupà... La cariola, l'éra la nùmero uno, ma dopo rugolar i còrghi udi, far i zughi con le sóghe de i cari, rugolar i veci sércoli de le rue, rue de cariole, rue de careti, far capriole tachè a le scale, far le cunaróle tachè soto i ciodi de i trai de i pòrteghi, spassar 'n tòco de corte, par far 'l zugo de le pice, o la péta par le butelete, o la salta musseta, col primo tacà a scala de la teda o ancora la scondiróla, con stale, pòrteghi, galinari, tede, cari de fen, mòte de bale de paja: par catar un sconto, gh'éra da morir! Tuto se faséa 'n meso a galine, cioche con i ponsini, ànare, ochi sigaloni, piti 'n carossa, cani che bajàa, mame che ciacolàa e buteleti picenini che te vegnéa sempre adrìo.
E dopo, ghéimo la sfiondra, da tegner sempre a posto e faséimo le gare; 'n bussoloto de conserva lo metéimo sul piloto e dopo ci le ciapàa el faséa 'l ponto e ghéimo tuti la rengaieta, come i nostri bupà, par farse i bastoni o i sioloti o i s-ciopeti col saugo e ancora gh'éra 'l zugheto del rocheto, udo, coel del fil da cusir, e far 'l caro armato con le tache e du legneti e con l'astico che faséa da susta. Sempre 'nsinocè par tera, con i senoci sbioghè, parché ghéimo le braghe curte e coele longhe e par i buteleti, no' i éa 'ncora 'nventè, o no' i ne le faséa, parché su i senoci le saréa stè sempre rote!?

Ogni casa la gavéa la so pèrgola, la stala co' sora la teda e la scala... che servía par zugar...

Eco parché ne la cusina se ghe staséa poco, no' gh'éra perìcolo che no' se saésse 'sa far o con cossa zugar, no' l'è mai stà 'n problema, anca parché se par caso, no' ghe fusse stà altri buteleti, par zugar 'nsieme, alè, gh'éra le piante 'n fondo la corte, da rampegarghe sù e nar fin on sima e dopo ciamar... parché i te veda e i capissa coanto te s'éri brao.
Adesso, coando vardo, sti buteleti, ciari, sbiài 'n facia, e che no' i ga né mane ruspie e né zenoci sbioghè, me digo da par mi: "Ma, coéi boce lì, sai 'sa vol dir vìvare 'nte na corte de campagna!?"

[torna sopra]