|
Editoriale
Létera a Gesù Banbin
Co la confusion che ’l se catarà anca Lu là de sora, a go paura che ghe sia scapà de ocio le ùltime novità de tera, che lo riguarda da vizin. Me dispiasarìa che ’l vegnesse a saverle massa tardi: xe mèjo che ghe scriva...
Caro Gesù Banbin,
prima che te decidi de vegnere a catarne anca st’ano par Nadale, xe ben che te sapi in che mondo che te intendi portare el to solito sgiavento de boni consili, de sentimenti e proposte par riformare l’omo vecio. Vardate ben prima de spanpanare barlumi de boni propositi, de fradelanza, de giustizia e solidarietà... ca no te fazi fadiga par gnente!
Qua da basso, so sta tera, a ghe xe na confusion da mati, a no savemo pi da che parte voltarse. A ghe ne sentimo de crue e de cote: tuti i santi dì salta fora de chele novità che ne boje el sangue te ’l zarvelo da quanto che le xe fora de judizio.
Senpre a propòsito de la to "visita natalizia", ca te si ’bituà a farne ogni ano, ti no te te si mai lamentà, ma noantri a savemo quanto ca te si stà male, nando a catare i toseti te le scole dove che te credevi de védare pronta la to cuna tra "el bue e l’asinelo", lì vizin a to mama e a to popà. E inveze gnente, parché quei che comanda te chela scola i xe pieni de sensibilità verso i toseti rivà da distante, soratuto quei che ga traversà el mare par vegnere qua da noaltri, poarini, e che, no savendo chi che te si, i podarìa ciapare paura... e métarse a piànzare... e volere so mama e so popà... che ’lora, ciamà col celulare, i riva sùbito e i taca a ucolare e i va a fare denuncia de "violenza psicologica su minore"...
Par questo i toseti no i va pi a zercare el mus-cio e l’èdera par coèrzare la capana e tòre el giarin par fare le strade e la carta stagnola par far córare l’acoa in mezo a l’erba... Xe fadiga anca catare pastori disposti a inprestare le so piègore: le xe inpegnà a fare late pa ’l formajo pegorin che par le Feste xe tanto richiesto... Par cossa crédito ca no te senti squasi pi cantare "Tu scendi dalle stelle"? Par lassarte indove che te si, caro Banbin Gesù!
E po’ ghe xe nantra roba, tanto cativa e crudele ch’ì te ga fato in sti ultimi tenpi. Senpre quei che comanda e che se crede iluminà da l’Alto, al punto de voler scrìvare un "Novo Testamento" difarente dal tuo... Te sè la fotografìa ch’i te ga fato chela volta che i te ga condanà a morte e i t’à fato fare chela fine che tuti conossemo... parché no i ga capìo, anzi ghe disturbava che te disessi in giro che semo fiòi del stesso Pare, e quindi tuti fradèi, e che bisogna volerse ben, rispetarse, vegnerse incontro, perdonarse, amarse... Insoma, chel tanto che ’ncora ’desso rapresenta chel mucio de valori, de certeze, de tradizion e de fede che xe senpre stà la nostra règola de cultura italiana e europea...
Ben, adesso no i vorìa pi védare picà so ’l muro de le scole e de i anbienti pùblici sta fotografìa, quela che ne ricorda el sbalio de averte messo in crose. Noaltri capimo che a sto mondo ghe sarà senpre on Giuda, ma che el Sinedrio de oncò, la Corte Europea de i diriti de l’omo, la voja ofèndare el nostro ricordo de Ti che te fè parte de la nostra identità veneta, italiana, europea... questo no ghe lo permetemo, parché propio el crocefisso ne ricorda, ogni volta che lo vedemo, i nostri doveri umani e civili verso i altri, de casa nostra o foresti!
Eco, caro Gesù Banbin, ’desso te sè come sta le robe. Decidi ti se xe ’l caso de fare naltro tentativo de spàndare el sale so sta tera, par far créssare ’ncora boni sentimenti cristiani!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Létera a Gesù Banbin
Co la confusion che ’l se catarà anca Lu là de sora, a go paura che ghe sia scapà de ocio le ùltime novità de tera, che lo riguarda da vizin. Me dispiasarìa che ’l vegnesse a saverle massa tardi: xe mèjo che ghe scriva...
de Mario Klein
|
