|
Da la Marca
El radicio de strejola
 |
| Radicio de strejola in pieno canpo. (foto de Alessandro Faggian) |
La voja de ritornar ai magnari sani e genuìni de ’na volta la ga portà ultimamente a la riscoperta de alimenti sènplici e gustosi, come par esenpio el radicio de strejola, tìpico, un tenpo, de la Bassa Trevisana.
Nel dialeto de destra Piave el temine "strejola" indicava la strissa de tera al bordo de un canpo dove che vegneva drissài i mejoni, cioè i muci de faje de formento tajà che, fin a la mecanisassion de l’agricoltura, i restava anca par pi de ’na setimana in atesa de la trebia che faseva el so giro de casàe. Cussì, quando che i mejoni i vegneva cavài, restava al so posto ’na bela strica de tera norbia e ùmida, pronta par inpiantarghe erbe da orto, come verze, salata o teghe.
In particolar se semenava ’na varietà rùstega de radicio, ciamada "radicio de strejola" o "radicio de la brosa" o anca, "radicio del giasso" parché la resisteva ai fredi pi intensi.
’Pena cressùo ’na s-cianta ’sto radicio el vegneva rinforsà segàndolo al piè co l’erba da forajo da darghe a le vache in stala e dopo el ributava pi gajardo.
Có el jera pronto el radicio de strejola el ghe somejava un fià al radicio selvàdego e un fià anca al radicio spadon, cioè el tardivo invernal.
Jera usansa de magnar ’sta verdura subito dopo averla tolta sù, consada con sissole de lardo e conpagnada da polenta co un mezo vovo, ’na fetela de salado o ’na péndola de formajela.
El radicio de strejola, insieme co le verze, le patate e le rave, el jera una de le poche verdure de inverno e par farlo deventar pi ténaro e crocante qualche contadin el lo meteva in bianca, su un canton lìbaro de la grupia in stala, cussì la fermentassion natural al calor de le bestie la ghe conferiva un gusto special.
La coltivassion de ’sto radicio la xe andada in disuso par diversi ani parché sostituìo da radici che faseva pi produssion, ma par fortuna qualche coltivator apassionà ga salvà le so semense e in varie sagre paesane, come quela patronal de Sant’Alberto, se pol trovarlo ancora fra i saori de ’na volta, come par esenpio, la suca crepa e quela crepeta, el cafè mato, le fave capòdene e tante varietà de ua antica, come la dorona, la senarenta, la corbinela, la pataresca e la negrara.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Létera a Gesù Banbin
Co la confusion che ’l se catarà anca Lu là de sora, a go paura che ghe sia scapà de ocio le ùltime novità de tera, che lo riguarda da vizin. Me dispiasarìa che ’l vegnesse a saverle massa tardi: xe mèjo che ghe scriva...
de Mario Klein
|
