|
Vita de na volta in dialeto de la Bassa Padovana
El mas-cio
Par ricordare Bepi Famejo, a tri ani da la morte (5 dissenbre 2006), publichemo sto articolo inèdito, che ne xe stà dà da Lorenzo Bello de Montagnana
 |
| Le fameje grosse, màssima i fituài, i gh�in tegnéa du. |
Ai tenpi de na volta, tuti quei che ghea tera, anche se i ghe n�éa on bocon, e tanti de quei che naséa domè a òpara i slevava el so bel mas-cio. E le fameje grosse, màssima i fituài, i gh�in tegnéa du. Ghe jera tre raze de mas-ci: el nostran, el toscan e el faenzin.
De sòlito el mas-cio naséa tolto da dizenbre a aprile, el se metéa in stala o �nt�on camaroto via dal fredo e avanti che cantesse el cuco el jera belo che �ntel purzile. Chi che lo ghea jera fortunà, la so fameja jera al sicuro. Me ricordo che par dire che uno jera poareto disparà se diséa: "no i copa né mas-cio né gnente."
El so magnare usuale el jera el maco che �l naséa fato �nt�on secion apòsito co le lavaure de i piati, le vanzaure e le croste de ramina. E se ghe smissiava farina dala, broà, e tanta acoa in maniera che ghe fusse magnare e bévare insieme. Ma el mas-cio jera na bestia che magnava de tuto, cussì al dopodisnà, o la tosata o i tusiti a casa da scola bisognava che i nesse a erba. Bajigole cote in febraro-marzo e pi vanti: ordeja, malbe, albiuni, porzelane, fuoje de spinaro, de olmo, de biétole e mèjo de tuto jera el farfojo e la braspagna. In istà ghe jera anca le sgusse de anguria, i fruti marzi e le croarole e pi vanti oncora ghe jera barbabiétole, ciance, zuche e patate cote. Ma ciance, biétole e patate bisognava dàrgane poche senò vegnéa fora la carne ca no savéa da gnente, l�onto che spuzava, er lardo che faséa la sbiuma e la panzeta có te la cusinavi la se rizulìa de chel tanto che la naséa doso da la gradela.
Par tuti i malani che podéa capitarghe a ste bestie ghe jera le so usanze; s�a no le bastava, in paese ghe jera senpre Betusto castrin e mediatore, che lu de mas-ci el saéa tuto. Se i ghea le zeche, óndarli co l�onto ranzo; có i ghea i oci russi e inscarpelà alora voléa dire che i jera scaldà e bisognava rafrascarli: alora poco maco e tanta erba. Quando che �l rosegava el purzile, el cavava le palanche, alora se diséa che �l "smarangona" e no �l se ingrassava mai; i naséa ciamare Betusto che �l ghe metéa du recini al naso e cussì el jera costreto magnare domè el maco; a sto laoro chì se ghe diséa: "sposarlo".
Ma la desgrazia pi granda la jera quando che sta bestia no voléa savérgane da magnare, e anca Betusto el se vedéa inbrojà: "Pùrghelo!" "Lo go purgà." "Pùrghelo oncora!" "Lo go fato." "Fiol de na roja el ga le buele cusìe, el cresse cofà na piera da guzare!" E Betusto che �l jera on sbefiero, malizioso e par cavàrsela el ghe tegnéa dito: "Pòrtelo in Cumune."
Quando che sti boari e sti òmani de canpagna i se catava in piaza, dopo de averse saludà, i se domandava: "El to mas-cio come falo?" Quando che a la doménega dopodisnà i naséa a catarse, prima i naséa a védare el mas-cio �ntel purzile e dopo i naséa in casa a saludare el resto de la fameja.
Da i primi de dizenbre a tuto jenaro in jiro ghe jera senpre mazini e pelaora e có se copava el mas-cio la jera festa, e se capitava de matina, i tusiti i staséa a casa da scola: �assa pure che la maestra bacajesse.
Sta pora bestia la jera na vera miniera, naséa butà via domè le onge e tuto el resto vegnéa doparà; tute le buele par insacarghe le morete e l�onto e parfin el pelo che �l naséa a finire �nte la fabrica de bruschiti. Par quìi che voléa vèndargane na sbrega, a Montagnana ghe jera el so marcà e ghe xe oncora le s-cione e i ganzi �ndo� che jera tacà la cadena che a quela ghe naséa tacà le sbreghe.
Me pare fin inpussìbile che ogni ano có se faséa sù el mas-cio o có se magnava le grasàpole, par quanto riguardo che te ghissi �bù, i tusiti i naséa senpre a scola co tuti i libri macià de onto. La maestra la la ghea a morte, la se infuriava cofà na bestia e �nte i libri da scrìvare la sbregava tute le pàjine.
Betusto el jera conpare de tuti quei che ghea el mas-cio parché a chi tenpi, có vegnéa el Véscovo in paese, el vegnéa senpre par calcosa. E me ricordo che na volta uno el ghe ga dito: "Conpare, l�ano passà me go ciapà senza mas-cio, go magnà tante de chele renghe, tanti de chei sardeluni e tanti de chei fighi che i me vien fora par i oci e, canpesse mile ani, mi senza mas-cio no me ciaparò mai pi." Betusto ghe ga risposto: "Ricòrdate el proverbio de i veci: Chi no copa el mas-cio da Nadale, no magna frìtole a Carnevale."
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Létera a Gesù Banbin
Co la confusion che �l se catarà anca Lu là de sora, a go paura che ghe sia scapà de ocio le ùltime novità de tera, che lo riguarda da vizin. Me dispiasarìa che �l vegnesse a saverle massa tardi: xe mèjo che ghe scriva...
de Mario Klein
|
