|
Editoriale
Morire… par vìvare
El pare on zogo insulso de parole e inveze el xe on tremendo tenporale come quei estivi, da brusare l’olivo e inpizare na candela de la zeriola. El xe on disastro che stràngola la gente: na vergogna sociale!
 |
| Mariarca Terracciano, l’infermiera de Napoli, morta… difendendo el so dirito de vìvare. |
La notizia de la morte inprovisa de Mariarca Terracciano, l’infermiera de 45 ani de l’ospedale San Paolo de Napoli, la xe stà na tragedia che ne ga fato male anca massa.
L’infermiera la ga ’vù on malore, fin che la jera in servizio nel reparto Maternità de l’ospedale, dopo che la gavéa interoto da poco la so protesta, faséndose cavare 150 mililitri de sangue al giorno e fasendo el siòpero de la fame, parché no ghe jera stà pagà el stipendio del mese de aprile. Dopo tri dì la xe morta.
No xe acertà che la morte sia stà conseguenza de la dramàtica forma de protesta, ma xe ciare le rason che ga portà a tanto na mama de do putèi de 10 e 4 ani, spaventà da la situazion economica de la fameja, preocupà par le rate in scadenza del mutuo fato par cronparse on tòco de casa. E se sa a cossa se va incontro se no te rispeti el pagamento del mutuo. “Lo so che può sembrare un atto di pazzia – gavéa dichiarà la dona ai giornalisti che la intervistava, – ma voglio dimostrare che si sta giocando sulla pelle e sulla salute di tutti.”
L’Asl de Napoli, la pigrande d’Italia, no la jera riussìa a pagare i stipendi ai so 10.000 dipendenti, parché no ghe jera pi fondi a disposizion.
No se pol dire che fati come questo no i te faga vegner sù na rabia senpre granda, parché no xe permesso che uno gabia da ris-ciare de morire – o adiritura morire! – par vìvare!
Questo xe un caso, ma de quanti altri se vien a savere e che xe causà da la dramaticità de la situazion economica che stemo soportando.
Ghe xe, purtropo, chi no la soporta. Industriali, dirigenti d’azienda, artigiani, pìcoli inprenditori, lavoratori che s’à messo in propio: davanti a la vergogna de on falimento o de dover lassar casa i so operai i cede a la tentazion de farla finìa na volta par tute. No i sa resìstare, i dèbiti xe tanti, i creditori incalza, le banche no li ’juta, le organizassion sindali fa el so mestiere: xe mèjo sparire par senpre.
Anca qua nel nostro Veneto, dove ghe xe l’idea che el falimento el xe prima de tuto na rovina personale, se xe rivà a 20 persone con responsabilità aziendali, che se ga tolto la vita.
Da Padova a Treviso la storia se ripete, la xe na epidemìa: on dirigente d’azienda de 43 ani de Villorba, no ’l se la ga sentìa de convocare i sindacati par dirghe che ghe tocava lassar casa i dipendenti e el ga preferìo butarse soto ’l treno a Castel de Gódego; el ga selto na corda al colo te la baraca drio casa, l’inprenditore edile de Camposampiero, nel Padovan, esasperà dal buso de bilancio de 100 mila euro; se ga tolto la vita naltro artigian inprenditore de Vo’ Euganeo, travolto da i debiti e dal fato che da siè mesi no’l pagava i dipendenti.
E quanto assurde xele quele che ciamemo “morti bianche”, causà da un incidente sul lavoro, dove nel nostro Veneto, semo passà al secondo posto in Italia: de 141 morti, registrà da genaro a aprile 2010 da l’Osservatorio su la Sicuressa, dopo i 25 de la Lombardia, ghe xe el Veneto con 15 morti. No se pole morire de lavoro: chi va fora de casa a la matina ga da ’vere la sicuressa de poder tornare a la sera sano e salvo.
Tute ste tragedie e ste disgrazie le xe contro la vita; la xe dunque na vergogna dover morire… par vìvare!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Morire… par vìvare
El pare on zogo insulso de parole e inveze el xe on tremendo tenporale come quei estivi, da brusare l’olivo e inpizare na candela de la zeriola. El xe on disastro che stràngola la gente: na vergogna sociale!
de Mario Klein
Salute
El prof. Mario Lise
poche parole e tanti fati
de Mario Galdiolo
Da Belun
La cesa de San Pietro in Salce
de Luigina Tavi
|
