|
Robe de Ciósa
El “squero” de i Camuffo
 |
| Un vecio “squero” ciosòto co peschereci a la fonda per riparassion. |
La famegia Camuffo, un cognome ancora abastansa difuso a Ciósa, pole vantare un’origine... araba. Infati Camuffo derivarìa da Kan El Mufti o El Ham Mufti. Se tratarìa de ’na legenda dinastica colegà al capostipite, che avarìa fondà un’arte, quela de i “squeri” o cantieri navali, proprio a Ciósa, dove i componenti de ’sta famegia avarìa operà come “maistri calafati” prima del 1470.
A l’origine i Camuffo, forse de fede mussulmana, in quanto provenienti da l’Islam, come se pòle anche dedure dal primo stema de famegia, cambià a la fine del ’500, al tempo de la Controriforma, per probabili motivi politico-religiosi, i gera originari de l’isola de Candia o Creta (1438), base de tràfici de la Serenissima nel Mediteraneo verso l’Oriente e el Mar Nero, eredi de la costrussion navale greco-bizantina.
El capostipite se ciamava El Ham Mufti, come za dito, deto Camuffi per comodità de pronuncia, de profession “magister stadi”, cioè perito stassatore, che sarìa come dire ancùo ingegnere navale, stassatore de nave, mentre el capo responsabile del cantiere gera el “proto” o capo de le maestranse. El fio de ’sto El Ham Mufti, che se ciamava Petrus nel 1451, deto Cristianus q. Camuffi, a sarìa stà el primo de la famegia a trasferirse da Candia a Ciósa dopo la casùa de Costantinopoli del 1453. Da documenti conservà ne l’Archivio de Stato de Venessia risulta che nel 1487 vegniva sepelìo ne l’antica Catedrale de Ciósa un Antonius q. Petri De Candia, ossia del fu Pietro de Candia. Da ’sto tempo se ga susseguio a Ciósa ben dódese generassion de Camuffi, tute dedite a la cantieristica navale ne i “squeri”.
El “squero” de i Camuffo a Ciósa gera situà ne l’isola che ancùo se ciama de i Cantieri, in riva al canal San Doménego e a ze restà ativo fin al 1974. I Camuffo i à costruìo e armà tra el XV e el XIX secolo burci e burcèli, bragossi e bragosséti, marciliane, caorline, sàndoli, puparini, tartane, topi, trabàcoli e pièleghi per la pesca, per el trasporto de merci e per diporto. Le nave che lori i costruiva le arivava fin a Odessa sul Mar Nero.
Ma le imbarcassion che i antenati Camuffo gera abilitài a costruire gera le tòpe, che aveva fin a dièze tonelate de stassa lorda, oltre a le bragagne. Tuti i Camuffo ze stà maestri d’àssia o progetisti.
Nel 1840 a la magiore età (14 ani secondo el codice napoleonico) Luigi Camuffo, tersogènito de Fortunato Camuffo, nato nel 1826 e perciò escluso da la sucession, l’à deciso de ciapare la so casseta co i feri del mestiere e de trasferirse a Portogruaro, dove a s’à insedià.
L’à adatà le tipiche barche ciosòte a le esigense de la “morfologia” de i lòghi, dove che ghe ze canài e lagune e l’à verto cossì un cantiere. Sto Luigi Camuffo, forte de la so esperiensa militare fata presso i cantieri Svan, dove l’à podesto conòssare le carateristiche costrutive de i famosi Mas de Gabriele D’Annunzio, nel 1927 l’à scomissià a costruire el primo “motoscafo Camuffo”, un nove metri co motore Fiat da 24 cavài. Da alora a ancùo nel cantiere Camuffo, guidà da i fradèi Marco e Giacomo e da i fiòi, se ga scomissià la costrussion de imbarcassion fuoribordo de tuti i tipi e potensa a uso de diporto, seguìi da i cabinati e da i motor-yacht Camuffo in legno da 12 a 18 metri, cognossùi come i “Stradivari del mare”.
Tuto però ze scomissià a Ciósa, nel cantiere de i Camuffo, uno de i tanti antichi “squeri” ciosòti, ormai quasi tuti scomparsi, nel lontan 1470!...
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Morire… par vìvare
El pare on zogo insulso de parole e inveze el xe on tremendo tenporale come quei estivi, da brusare l’olivo e inpizare na candela de la zeriola. El xe on disastro che stràngola la gente: na vergogna sociale!
de Mario Klein
Salute
El prof. Mario Lise
poche parole e tanti fati
de Mario Galdiolo
Da Belun
La cesa de San Pietro in Salce
de Luigina Tavi
|
