|
Salute
El prof. Mario Lise
poche parole e tanti fati
 |
| Mario Lise, Professore Emerito de Chirurgia Generale de l'Università de Padova. |
Ogni ano, come romai xe tradission, nel mese de majo “l’Ordine dei Medici Chirurghi e Odontoiatri della provincia di Padova” organiza a l’Abazia de Praglia (PD) “La Giornata del Medico”, on incontro dove in te on clima de festa mèdeghi veci e zóvani insieme a amissi e familiari fa comunèa, descutendo de problemi che interessa la sanità, de nove inissiative e de tante altre robe. De solito la “Giornata” finisse co la consegna ai meritevoli (co varie motivassion) de premi e benemerense.
L’ano passà tra i disnove mèdeghi festegiài e premiài par èssare rivài al 50° ano de laurea, ghe gera anca el professor Mario Lise, Professore Emerito de Chirurgia Generale de l’Università de Padova; on luminare conossudo e stimà in Italia e a l’èstero, che, par queo che ’l ga fato ne la so longa cariera el poe èssare messo a pien titolo tra i grandi mèdeghi-chirurghi che ne l’arco de i secoli ga contribuìo a tegner alto el prestigio e a dar lustro a l’Università de Padova nel mondo.
Mario Lise xe nato a Belun el 13 marso 1934. Dopo le scole de l’òbligo e ’l liceo, el se ga iscrito a la Facoltà del Mediçina de l’Università de Padova e ’l se ga laureà el 30 novenbre del 1959. Intensionà de ’ndar ’vanti co i studi, nel giro de pochi ani el ga ciapà una dopo l’altra ’na serie de inportanti specializassion. Nel ’61 in Anestesia, nel ’65 in Chirurgia Generale e nel ’71 in Chirurgia Toracica. Nel ’66, dopo ’ver conseguìo la Libera Docenza in Patologia Speciale Chiururgica e Propedeutica Clinica el xe partìo par fare esperiensa a l’èstero. Dal dissenbre ’67 e par tuto el ’68 el xe stà al Nationale Heart Hospital de Londra par infrancarse ne la chirurgia del core. Tornà a Padova nel ’69 el xe ’ndà Assistente de ruolo in Clinica Chirurgica I, direta dal prof. P.G. Cevese. Nel ’70 el xe deventà Aiuto e ’l xe restà fin a l’80 a fianco del grande Maestro.
In quei ani, có ghe capitava l’ocasion e i inpegni ghe lo permeteva, el ’ndaseva par periodi più o manco longhi ne le Università e Ospedali a l’èstero par fare nove esperiense e métare a confronto metodi e/o riçerche co i coleghi stranieri; par esenpio da lujo a dissenbre 1973 el xe stà al Memorial Sloan Kettering Hospital de New York par infrancarse ne la chirurgia de i tumori e de i trapianti.
El prof. Lise, pur essendo fornìo de on bagalio teorico-pratico de chirurgia generale e specialistica de prim’ordine, conpresa la chirurgia del core, sta ultima specialità, par motivi, disemo “superiori”, no ’l ga possudo métarla in pràtica. Sto fato no sminuisse par gnente el so valore e gnanca par lu xe mancà le sodisfassion e appressamenti professionài. Fa testo i primi trapianti de rene fati a Padova insieme al professor Cevese e i mejari de grossi interventi riussìi, soratuto de i tumori de l’aparato digerente e del torace, e i tanti e pretigiosi incarichi ricoperti a l’Università de Padova, in Italia e a l’èstero.
Dal 1980 al 30 setenbre 2006 el xe stà professore straordinario e ordinario de Chirurgia Generale a l’Università de Padova e senpre in quei ani el ga ricoperto l’incarico de Diretore de i Istituti de Patologia Chiururgica I e Clinica Chirurgica II, co responsabilità primariale fin ai primi mesi del 2004.
Ne le sale operatorie de la Clinica da lu direta, durante i dódese mesi de l’ano vegneva fati ’torno i 1.500 interventi. La gran parte grosse operassion de tumori de “l’apparato digerente”, del torace, de i pèti, sarcomi, melanomi, ecc. Dal 2001 al 2006 el xe stà Diretore del Dipartimento de Scienze Oncologiche e Chirurgiche de l’Università de Padova e dal 2005 al 2009 ’l xe stà consulente par la chirurgia oncologica generale de l’Istituto Nazionale Tumori de Aviano. Dal 1991 al 1997 Diretore Sientifico de la Rivista Italiana de Colonproctologia e dal 1977 al 2002 de l’Italian Journal of Coloproctology. E co de più el xe stà menbro referente de inportanti riviste sientìfiche internassionali come l’Editorial Board de “Colorectal Disease” e del ’“Editorial Board Journal of Colorectal Disease”. Autore de volumi de interesse chirurgico e co-autore de oltre 400 articoli in exstenso de i quali 150 su riviste internassionali. El discorso sarìa longo ancora ma’l spassio no ne permete de ’ndare ’vanti.
Dise on proverbio: bone raise fa créssare bei àlberi e dà boni fruti.
Par el nostro professore, çinquant’ani de grande inpegno, de grandi sucessi e traguardi. La so scola infati continua co alievi che ga mansion diretive o in Catedra, spranpagnài ne i Ospedài veneti e italiani.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Morire… par vìvare
El pare on zogo insulso de parole e inveze el xe on tremendo tenporale come quei estivi, da brusare l’olivo e inpizare na candela de la zeriola. El xe on disastro che stràngola la gente: na vergogna sociale!
de Mario Klein
Salute
El prof. Mario Lise
poche parole e tanti fati
de Mario Galdiolo
Da Belun
La cesa de San Pietro in Salce
de Luigina Tavi
|
