Da Thiene (VI)

La luna e l’andamento del tenpo

La Luna ga fato el colmo (luna piena).

Se gera del parere che prima che la luna se fassa, cioè prima de ’a luna nova, ghe sia senpre on movimento de tenpo che pol portare piova. Dopo la luna nova el tenpo se stabilisse e continua ne le condissiòn che ghe gera nel farse la luna.
Altri pensava che fusse ’l sinquale, i sinque giorni dopo el colmo de luna (luna piena), o sinque giorni dopo che la luna se ga fato (luna nova) a regolare l’andamento del tenpo fin a st’a1tro canbiamento de luna; xe in quel periodo, soratuto, che ’l tenpo poe canbiare e mètarse a far bruto o belo. Fin a la pròssima luna nova o piena, el tenpo sarà piovoso o serèn, a seconda che xe stà piovoso o serèn el sinquale.
’Naltro indissio de l’andamento del tenpo vigneva trato da l’alòn lunare. In pianura el sercio distante da la luna gera visto come segno de piova vissina, invesse, el sercio vissin el prometeva bel tenpo. In montagna se pensava che ’l sercio portasse, de inverno, in ogni caso la neve.
El vin bianco doveva èssare inbotilià te on mese co do lune (on mese dove la luna fa el colmo do volte).

CALARE E CRÉSSARE DE LUNA
L’influsso de ’e fasi lunari su la vita de tuti i èssari gera ritegnù tanto inportante e, in serti casi, determinante. Par sto motivo se osservava co atensiòn le fase che drioman le seguiva e, soratuto, có la luna faseva el colmo e quando la se faseva. Sto fato gera più inportante del canbiare de i mesi e de le setimane, gera el mese lunare che più de tuto contava, più ancora de quelo del calendario.
Gera credensa comune, che paraltro la siensa moderna ga in parte confermà, che tanti fati dipendesse da i movimenti de luna (calare e créssare). Se diseva che i toseti vigneva al mondo có la luna gera piena; i animali, màssima el vedelo, che nasseva in calar de luna i gavarìa vudo poca forsa. Cossì la sèrnita del tenpo par fare serti lavori no dipendeva solo da l’omo, difati ghe gera de i lavori che vigneva fati in créssare, altri in calare de luna.

IN CALAR DE LUNA
– Se tajava le piante de cui se gavarìa conservà o doparà el legno, tra queste le strope, le cassie (robinie) e i piantoni (sostegni) par le visele. Se ste piante le se tajava in créssare de luna, i contava, le faseva el carolo).
– Se semenava tute le piante da orto se no se voleva che le ’ndasse in galo (non facessero il seme).
– Se faseva i caponi.
– Se inbotiliava el vin.
– Se tajava i frascari par darghe da magnare a le bestie.
– Se copava el mas-cio parché sopresse, saladi, lugàneghe e codessini se coservasse mèjo.

Goba a levante luna calante. (foto de Bruno Dalle Carbonare)

IN CRÉSSARE DE LUNA
– Se portava e se trava el luame in te i canpi (el primo marti o el primo vènare de ’a luna cressente, mai el vènare santo, se no se voleva che ’l luame ingrassasse come la giara.
– Se faseva in modo che i pulsinèi, da i uvi messi a coare, nassesse.

EL TENPO NEL CORSO DE L’ANO
Se el giorno de la Seriola (la Candelora), el 2 febraro, gera bel tenpo, se credeva che l’orso o el tasso vegnesse fora da la so tana. Sto fato tutavia no gera segno che l’inverno fusse finìo, e lori dovéa tornare nel so buso. Se quel giorno invesse faséa tenpo bruto, orso e tasso restava drento ne ’a so tana, ma i sarìa vegnù fora presto parché l’inverno gavarìa durà ancora poco. Se diseva anca che co le ave faseva tanto miele, l’inverno de chel’ano sarìa stà lungo e duro da passare.
Le stajòn che i noselari gera carghi de nosele, i contava che l’inverno drìo, gavarìa porta la neve.


Da Civiltà rurale di una valle veneta - “La Val Leogra”, Accademia Olimpica Vicenza, 1976. Stanpà da “La Grafica e Stampa s.r.l.., Vicenza”

[torna sopra]