Da Ponteongo (PD)

El Zucreficio de Ponteongo

Imàgini stòriche de ’l Zucreficio de Ponteongo. (da Archivio Storico Fotografico de Ponteongo)

El ga çento ani, ma no li dimostra. El Zucreficio de Ponteongo, che i ponteongani de ’na volta ciamava el Belio, ga canbià eà situassion de ’l paese come da ’l giorno a eà note. El xe stà costruìo da i belgi (ma ghe jera anca italiani, francesi, austriachi): da qua el nome el Belio.
El xe entrà in atività el 26 giugno 1910 e da aeora el paese ga conossùo on çerto benèssare che eò ga portà a on livèo de vita tanto difarente da i paesi vissini, dove eà zente viveva de ’l soeo lavoro de i canpi (pochi, pochissimi co fameje numerose par chi che lavorava so ’l suo o come mezadri o, uncora pèzo, a òpara). El Belio ga canbià eà vita anca a ’sti contadini, slargando eà so influensa a ’na zona senpre pi granda, fazendo introdure eà coltivassion de eà barbabiétoea che, voja o no voja, garantiva on rèdito sicuro.
El xe el ùnico zucreficio italian a superare el traguardo de ’l sècoeo e pare che ’l gavarà uncora vita eonga, dato che xe in programa de i milioramenti che eò mete a eà avanguardia de ’l setore in Europa. El xe passà da ’e man de i belgi a coée de Montesi che ’l lo ga tegnù fin a eà crisi de i ani ’80. ’Desso el se ciama Italia Zuccheri e el continua a èssare eà risorsa par circa 300 lavoratori.
Tuti in paese ga ’vù raporti co ’l zucreficio: i operai e i inpiegati fissi che in stragrande majoransa gheva eà so casa in te on coartiere costruìo aposta pa eori a fianco de ’l zucreficio, co case difarente pa operai, inpiegati, dirigenti; operai e inpiegati stagionài che vegneva assunti pa ’l periodo de lavorassion e che xe stà ’na vera e propia baea d’oro pa i pi zóvani, dato che co i schei che i ciapava co eà canpagna bietìcoea, i ga anca podù, chi che gheva voja de farlo, pagarse i studi e scomissiare ’na nova vita; i operai aventissi che vegneva assunti a fine canpagna (quasi senpre dopo èssare stà licensià da stagionài) pa eà manutension de i machinari. ’Sta possibiità de lavoro pa tanta zente ghe ga dà a ’l paese ’na reativa richessa e ga favorìo anca el comercio (chi che no jera fissi, ma anca qualchedun de coésti, notava so ’l libreto disendo “canpagna eonga, pagaremo”) e cussì pa’ quasi tuto el sècoeo el paese jera praticamente autosuficente pa negossi e servissi.
Oltre che da eà coltivassion de eà biétoea i contadini xe stà favorìi anca eori da eà possibiità de lavoro che el zucreficio ofriva, dato che, anca se eà paga no jera tanto alta, jera senpre mèjo che ’ndare a òpara: anca par coésto xe miliorà el livèo de vita generàe. Coando che xe stà piantà el zucreficio ghe xe stà ’na forte imigrassion de maestranse co ’e so fameje, spèssie da ’l Rovigoto e da eà Romagna, tanto che eà popoeassion xe rivà in pochi ani a più de cinquemìa àneme. ’Desso xe passà tanto tenpo e tante robe xe canbià. Ma el zucreficio resta on punto de riferimento sicuro pa ’l paese e anca on bagajo de ricordi pa tanta zente che drento ghe ga consumà eà so vita.
Do xe ’e inissiative prinçipài pa festejare ’sto çentenario: una de eà Aministrassion Comunàe che ga organizà pa ’l 29 de giugno on convegno in Villa Foscarini Erizzo so: “Pontelongo e la filiera dello zucchero”; nantra, propio el giorno 26, organizà da i sindacati confederài, da ’l tìtoeo “26 giugno 2010: festa del lavoro, dell’impresa, della dolcezza”.

[torna sopra]