|
Editoriale
Cussì semo rivà a Nadale…
Dopo tanta strada, quela tanta che separa l’inizio da la fine de on ano intiero, ècone rivà anca st’ano al traguardo de le nostre responsabilità.
Quele personali de ognuno de noaltri, a seconda del ruolo che ghemo ne la socetà e ne la fameja. Quele che se ghemo messo so le spale quando ghemo deciso, liberamente, de métare la nostra mente, el nostro pensiero, i sentimenti, i afeti, l’amicizia, la parola… a disposizion de chi li vole ricévare, scriti so le pagine de sta rivista che da vintioto ani se preocupa de dimostrare che esiste oncora el modo par caminare insieme, senza pèrdarse de vista, senza barufare o confóndarse le idee, parché a parlemo la stessa lingua.
Queste xe le robe che se ghemo ripromesso de fare ogni volta che ghemo voltà pàgina te ’l lunario.
Ma… lo ghemo veramente fato? Semo stà boni de semenare el gran de l’armonia, de l’amicizia, del perdono, de la conprension?... Ghemo dà na man, anca solo co la parola, ghemo dà fiducia a chi la ga persa e che no sa pi a che aqua trarse?
Ghemo fato del nostro mèjo par spanpanare fiori de moralità, de onestà e giustizia, ’ndasendo in procession, giorno dopo giorno, a piè, in màchine, in bicicleta, in tran, in treno… con le persone che se ghemo catà davanti, magari antipàtiche, brute, mia massa par la quale o foreste?
Eco: xe rivà el momento par interogarse e darse na risposta.
Qualunque sia el risultato de l’intimo esame, fémose corajo, metémose in zenocio davanti al BANBIN GESÙ, a testa bassa e a cuore sincero.
In tuti i casi, cataremo la voja de dirse tra de noi:
REDATORI - COLABORATORI
LETORI - INSERZIONISTI
EDICOLANTI - DISTRIBUTORI…
BON NADALE
[torna sopra]
|
