Quatro Ciàcoe - Rico de Bosaro - Dissenbre 2010

Quatro Ciàcoe
Mensile de cultura e tradission vènete

de Gianni Sparapan

Da Rovigo

Rico de Bosaro

… l’acqua la ghéa tacà a magnarghe la tera tornovìa de le fondazion.

Enrico Spini el xe nato a Bosaro el 25 agosto 1924, el xe residente a Santo Stefano de Imperia.
El 13 de novenbre del 1951, el dì prima de l’aluvion, mi e la me fameja a jèrimo drento la scuola de Bresparola, parchè in te le tere intornovìa a ghe jera za l’aqua che la vegneva fora da on sbrego ca se jera fato so la Fossa Polesela. Chel dì lì, a jera rivà de i tècnici da Rovigo e i ghéa l’intenzion de serare i quatro sculi ca passava soto la Fossa, pensando cussì de contegnere l’aqua. Na roba inpossìbile. A ghe l’ò anca dito: “Le xe robe inùtili, l’àrzere del Po l’è quatro-zinque metri più alto de quelo de i sculi.”
Mi a jero ’pena vegnù sù dal Po e a ghevo visto el disastro de aqua ca ghe jera là.
La sira del dì dopo, quela del 14 novenbre, poco prima ca ronpesse el Po, a go incontrà du me amighi, Orfeo Maneo e Gigi Zucoli, che ’l ghéa on batelo. I me ga dito: “Gnond’è ca ’ndemo?”
“Vegnì anca valtri drento la scuola comunale, che la xe alta” a go dito. Là drento, insieme co nantri, a ghe jera anca el mestro e i so du fioliti. Dopo poco a xe rivà na topolino a tore sti putini e cussì i ga cargà sù anca me mujere e me fiola Daniela, de vinti mesi: i jera in 5-6 persone drento sta topolino. E dopo on tòco ch’i xe partìi, in te on gesumarìa a se ga visto l’aqua crèssare de colpo come quando ca se buta l’aqua drento on vaso de fiuri, che sùbito a te lo inpenissi: segno ca ghéa roto el Po.
Insuma za, in te on seraòcio l’aqua la xe rivà al primo piano e nantri a jèrino in tel secondo in te na vintena de persone.
Più tardi, a note fonda, a se ga roto anca la Bóta de Bresparola, che la xe lì tacà a la scuola e sta scuola la ga scomizià a muòvarse tuta come se la fusse drìo balare perchè l’acqua la ghéa tacà a magnarghe la tera tornovìa de le fondazion.
A jera le quatro de matina e a ghe jera scuro e na fumara fissa ca no se vedéa gnente de gnente, e nantri drento sta scuola che la balava in qua e in là, a se ghemo missi a zigare desperà. Có se ga fato più ciaro, i me du amighi i ga deciso de andare via co ’l batelo. “Viento anca ti?” i me ga domandà.
“E i altri?” a go dito. Mi a jera al balcon ca vardavo fora e a ghe uchelavo a on elicòtaro che ’l passava e ripassava sora de nantri, ma no ’l podeva né sentirne e gnanca védarne.
A le nove de la matina a me go deciso: a me so’ calà co na corda ligà a le inferià del balcon e a so’ montà drento el batelo insieme a Orfeo e a Gigi. El mestro el zigava: “Me lassèo chì da mi mi solo?” el ne diseva.
Insuma a ghemo tacà a remare par andare verso la sponda del Canalbianco. Ma quando ca ghemo tentà de traversare la Fossa de Polesela, a se ghemo catà drento na corente forta e larga ca jera inpossìbile traversarla. E cussì a semo restà in te sto vissinelo de aqua fin a le quatro del dopodisnà drento el batelo che ’l continuava a girare so de lu senza gnissuna possibilità de andare fora da sta corente. A se tratava de superare zento e zinquanta metri in tuto, ma a jera come catarse sora na cascata. In te on punto par nantro a te ga visto la casa de Mario Zeferino che l’è stà portà so le onde ancora intata par zento metri e po de colpo la se ga sprofondà in mezo a l’aqua co on s-cioco de travi e de piere par sparire in te na nùgoa de pólvare.
Insuma a jèrino in te na situazion bruta purassè, co do corenti de aqua, una ca vegneva verso la Bóta e l’altra che la ’ndava verso el Canalbianco. Aqua dapartuto: solo on isoloto a se vedeva davanti a nantri, quelo ca restava de on àrzare. E alora a ghemo pensà de portarse verso sto isoloto. A ghemo speso quatro ore bone par rivare fin lì, ma intanto l’aqua la magnava intornovìa sto tòco de tera che ’l deventava senpre più pìcolo.
Gigi el voleva fermarse sora l’isoloto, ma nantri a no jèrino d’acordo.
“El batelo l’è mio!” a uchelava Gigi, fin tanto che Orfeo, basso de statura ma svelto e forte come on toro, el ga ciapà el remo e co on colpo in testa el ga tramortìo Gigi, che ’l ga perso i sintiminti.
Intanto sora l’àrzare del Canalbianco a se ghéa mucià tanta zente che la ne faseva corajo. A ghe jera solo na possibilità de cavarse via da la morsa de le do corenti, quela de rivare propio in mezo tra l’una e l’altra, ma a jera tanto difìzile farlo.
E alora a go pensà de butare la corda co tute le me forze verso la zente so l’àrzare e uno – che ’l Signore lo benedissa! – el ga ciapà sta corda co on piè. E dopo tuti luri insieme a tirare, e nantri a remare fin che Dio ga volesto ca rivàssino so la riva, e el batelo, sgnacà contro l’àrzare da la corente, el se ga desfato in mile tochi. E anca l’isoloto el jera za sparìo soto aqua.
Me pare el jera lì presente, e alora el me ga butà i brazi al colo pianzendo e ridendo insieme.
E intanto Gigi el tacava a vegnere in sentimento.
“S-cianzéghe el muso co l’aqua, parchè el rinvegna del tuto! – el ga dito Orfeo a la gente. – A ghi n’è de l’aqua chì!”

[torna sopra]

Archivio

2022