Quatro Ciàcoe - Quando era de moda i “Salani” - Dissenbre 2010

Quatro Ciàcoe
Mensile de cultura e tradission vènete

de Wanda Girardi Castellani

Da Verona

Quando era de moda i “Salani”

“Ai me tenpi”... Eco ’na frase che denuncia, sensa possibilità de sbali, ’na çerta età! Se te la disi po’ a ’sti ciari de luna, magari in presensa de giovani, te ciapi subito de la “befana”. Epur, quel nostro “tenpo che fu” el n’à arlevado dentro cusì tanta nostalgia da far mal! L’era inpastà de cansonete melodiose, romantiche che le te entrava lissie-lissie, traverso le rece, nel tabernacolo del cor specialmente de note, quando col concerto de i grii, de le surle e de le sigale, drio le caresse de ’na man su ’na chitara, le volava a desmissiar butele inamorade... sènplici e càndide come le margarite ne i pra a matina presto!
I passatenpi par noialtre i era: el ricamo, l’uncineto, i feri da calse e, soratuto, i romansi rosa.
Ogni parochia la gaveva la so brava biblioteca con el reparto adato... pastura par poderse insognar storie dove la castità, la gentilessa, la sincerità le era, a la fine, senpre premiade. ’Sti romansi, generalmente editi da ’na casa de Firenze “Adriano Salani-editore, viale dei Mille”, i era pìcoli e manegevoli, rilegadi con tanto de soracoèrta a colori. El presso stampà a l’interno l’era su l’ordine de un franco, un franco e mezo. El nùmaro de le pagine: 300/350.
La domìnica, dopo messa, se andava a restituir i volumi leti e a tórsene-sù de novi.
I romansi par signorine i era, invariabilmente d’amor, ma el massimo che te ghe leséi sora l’era: “egli osò baciarle la mano!...” Solo in un par de casi è passà da la maja fissa de la censura de monsignor Emilio, pàroco de San Nazar, pagine definide “hosè”: “Mea culpa” de Anny Vivanti e “Lo sceicco” de E.M. Hull, ’sto ultimo (con “Il figlio dello sceicco”) gloria del cine american, portà su i schermi de tuto el mondo dal nostro grande Rodolfo Valentino.
Disemo subito che le sène descrite, anco no’ le scandalisarìa gnanca un buteleto da 5 ani ma ne l’imediado dopoguera l’inquadradura più romantica del capolaoro de Alfred Hitchcock: “La prima moglie, Rebecca” l’era quela andó Massimo el ferma la màchina e dopo èssarse dado un baso su la ponta de ’n déo el lo posta in meso a la fronte de ela (Joan Fontaine)! Altro scàndalo passà a la storia (senpre de Hitchcock) el “maxibaso” de “Notorious - l’amante perduta” tra la bela Ingrid Bergman e Cary Grand (1946). L’America, se sa, l’è sempre stà, rispeto a la nostra vecia Europa, a l’avanguardia, in tuto, nel ben come nel male, anca se noialtri italiani avévimo za adornà i nostri schermi co’ la vision, anca se rapida, de i seni de Clara Calamai (ne “La cena delle beffe” de Sem Benelli) e de Doris Duranti (in “Carmela”).
Ma tornando ai romansi par le signorine de la me generassion, personalmente gavéa ’na predilession par la scritrice Eleonora Glyn (“La sua ora”), ma ò leto volentieri anca Pitigrilli (pseudonimo del torinese Dino Segrè – 1893), considerado ’na letura da adulti. In qualche scatolon de la cantina devo averghe ancora de i libri de Carolina Invernizio e uno de ’sti giorni ghe ne vago in serca.
Un’altra scritrice adorà da le butele de la me generassion l’è stà Liala e qua se podea lésar storie più “vivaci” anca se ben assè distanti da quele de Aldo Busi. I protagonisti maschili de Liala i era generalmente aviatori.
Quanto ai “Salani”, ghe n’ò ’na vintina, eredità da me mama. L’autor che preval l’è Delly: “Il Maestro del silenzio” con el so seguito “Il segreto del Ku-Ku-noor”, “Il Violino tzigano”, “Magalì”, ecc. Pura se sbrindelà ò conservado “Senza famiglia” de Ettore Malot. Quando che che me negavo in quel mar de parole, me desmentegavo de tuto e se ghera da piànzar... pianzéa e de gusto!
D’altronde, anca al cinematografo se ghe andava con la scorta de fassoleti, spece se sul telon del cine “miola” ghera de sèna Amedeo Nazzari e Jvonne Sanson in dramoni come “Catene”, “Tormento”, “Amore di madre”, ecc. Un par de ore de làgrime e sangioti: Maria... come che se godéimo!!
Come i libri, anca i film i era didàtici! Sensa colpir el pùblico a mitralia con parolasse da ostarìa e sensa sbàtarghe sul muso intimità estreme altrui… i semenava boni sentimenti e bona educassion. “Far l’amor” volea dir “discórar” e la parola “sesso” se stentava a dirla parfin dopo maridà.
Mi e le me amighe sognàvimo tute ’na caseta e un butin ne la cuna, ’na taola parecià con su ’na toaja a quadreti ’na minestra calda par un bravo marì da spetar a brassi verti. Nissuna che me ricorda mi sognava de deventar ’na modela, ’na velina, ’na “miss” o ‘na “cubista” (quele che bala sul cubo) e i sogni più arditi li fasévimo propio lesendo i “Salani” dove che i principi azuri i gaveva la facia simpàtica e onesta de Amedeo Nazzari, quela angelica e nobile de Leonardo Cortese o quela un tantin lazarona de Osvaldo Valenti.

[torna sopra]

Archivio

2022