Quatro Ciàcoe - Cantar la Stela - Dissenbre 2010

Quatro Ciàcoe
Mensile de cultura e tradission vènete

de Bepin Daecarbonare

Da Thiene (VI)

Cantar la Stela
Un canto de amore e de pace che anunsia el Nadale e ne invita a volerse più ben

Poesia del Nadale. (foto de Bruno Dalle Carbonare)

Dopo l’Imacolata, qualche giorno prima de Santa Lussia (13 dissenbre), có ’l fredo “crussia”, i tosatèi de ancò, spostàndose in bici o in motorin, par fare più porte e de conseguensa ciapar più mance, i va de casa in casa, ne i bar e in te le boteghe, a cantare la Stela.
Magari in do-tre o anca da soli; i sona el canpanelo e al: “Chi è?”, par citofono, al scuro i taca: “Tu scendi dalle stelle...” o l’altra, “Presto, presto andiamo in fretta per trovare Gesù Banbin...”, e dopo do strofete (pi de ’e volte stonà) i se ferma disendo: “Ghemo cantà la Stela”, e i speta che i ghe vèrsa la porta, o che da la finastra, i ghe buta zo la mancia. Se no riva gnente, brontolando, i passa te nantra casa vissina, i se taca al canpanelo e i ripete, come un disco che se incanta, la sòlita nenia. Qualchedun se ga modernisà girando co un registratore a batarìa, cossì el ciapa i schei de mancia sensa gnanca vèrsare boca. Dopo co ’l grussoleto fato sù in pressa i core a magnare na pissa co la Coca o, i giovanotèi, in discoteca a fare quatro salti. In sta maniera vien sfalsà el motivo de sto canto, quelo de anunciare ’l Nadale e portare un messagio de bontà, par vìvare co devossion el grande avenimento che se rinova da più de domile ani.
Par conòssare le orìgini de sta tradission popolare, no trovando documenti al riguardo, me xe stà indicà da l’amico Carlo Restiglian, Antonia Catelan, na signora ansiana che ’l gaveva intervistà pa ’l so libro "THIENE RACCONTA", la "NINA", canto tradissionale thienese, che anca st’ano se pol scoltare, ne le vece contrà, ne le tre sere prima de Nadale.
La siora Nina (Antonia), la me ga contà che , el canto de ’a Stela, xe stà “inportà” da la vissina Villaverla ne i ani '20, da dove rivava, fornìi de sachi e sporte, òmeni, done, tose e zovanoti e un marcantonio del grupo co na gran stela tacà insima un palo, fata de legno e carta velina zala. La gera inluminà par drento da un canfin inpissà e in più, assionando un pedale, la se meteva in movimento girando ’torno, tra i “oh!” de maraveja de la gente che scoltava.
Ben infagotà, da la testa ai pìe, pa ’l gelo, ne le sere che precedéa Nadale i se fermava a cantare ne ’e corte, davanti qualche fatorìa o casa de contadini e ne ’e vie del centro e de perifarìa, al ciaro de ’a stela, che girando, mandava sbiansi de luce tuto ’torno, creando un mondo da fiaba.
Dopo ’ver cantà, i passava de porta in porta, e sporte e sacheti pian pianelo se inpienava de roba da magnare, che a chei tenpi, co la carestìa e tante boche da sfamare, la gera na vera mana. Finìo el giro de ’a serca, i ringrassiava co sta canta:
“... e novela e novelare / che bisogna seguitare la bona note / che bisogna seguitare la bona via. / Ringrassian la bona gente de le grassie e de i favori. / Siamo insieme col Signore, la bona note / siamo insieme col Signore, la bona via...”
Ela, me diséa la siora Nina, che alora gaveva trèdese ani, copiando da quei de Vilaverla, la se ga fato fare da Vàngeli na stela de legno, un poco più pìcola e co na candela al posto del canfin, ma bisognava pararla ’torno dasio, senò la carta velina podeva ciapare fogo o smorsarse el lume. Dopo aver partessipà in Belvigo, ne ’a corte de i Pardossimi, al canto de ’a NINA, in conpagnìa de altre quatro-sinque tosete, la faseva el giro de ’a contrà e co la stela inpissà le cantava:

1. Deh, sorgi amica Stella,
la pace ad annunziar,
coi raggi tuoi lucenti,
i popoli remoti,
coi canti miei devoti,
deh! sorgi a consolar.

2. Su pastori alla capanna,
su venite, non tardate,
i vostri agnelli abbandonate.
Dio dall’alto veglierà.

2. Questa notte è nato in terra
Gesù Cristo Redentor.
L’è partìo dal celo in terra
per salvarci da l’error,
e l’è nato in una stalla
in tra il bue e l’asinel.
La pareva ’na gran sala
preparata già per quel.
Non c’è pèsse non c’è fasse,
non c’è fuoco da riscaldar.
Poverina la sua mamma,
non la sa cosa pensar;
la si prende il vel da testa
per coprire il suo caro Ben,
il più bel che al mondo sia,
l’è venuto dal ciel seren.

Par conpenso, da’e fameje le ciapava uno o du schei, che ingropà in tel fassoleto par no pèrdarli, come un pìcolo tesoro, i li portava a casa e, meténdoghene via solo un pochi pa i regài de ’a Stria, i serviva anca quei par sbarcare ’l lunario.
Anca mi da pìcolo, ne i ani dopo guera, có mancava quasi tuto e bisognava tirar cinghia, co me fradèi andavo par le case a cantare la Stela, e me ricordo come fusse jeri, le inpirade de fredo ca ciapàvimo par na brancà de farina o qualche palanca. Robe che a contarle, i tosi de ’desso, te ride tel muso, ma mi sti cari ricordi me ’i tegno streti, parché i fa parte de un tòco de vita, poareta sì, ma siora de valori, che ancò ga bisogno de èssare recuparà.

[torna sopra]

Archivio

2022