|
Editoriale
L’unica xe la mama!
Co l’ingarbujo che se catemo davanti, in sto nostro tenpo, el punto de riferimento pi sicuro che podemo ’vere xe la mama, se la xe al mondo, o el so ricordo, se la xe za passà da la tera al celo
 |
| Auguri, mama! |
“Na confusion de idée e de fati mai visti prima!” se sente dire in giro. “Robe che me fa nar ’torno la memoria!” dirìa me mama, se la fusse al mondo, davanti a sto groejo de discorsi che no ga né cao né coa.
No i ga tuti i torti: co tuti sti profeti e sti evangelisti che ghe xe in giro, no se sa pi a chi crédarghe. Disemo ch’i te fa pèrdare la tramontana, no te sè pi quala sia la verità, parché tuti ga la so verità individuale, i se la porta drio in scarsela e i la tira fora ogni volta che ghe xe bissi da incantare. Cussì tuto deventa relativo; ghe xe on futìo de novi comandamenti da darghe bado e on lévaro de règole morali che ognuno se adata a propio uso e consumo, che sarìa quela che vien ciamà “la morale di comodo”.
Semo rivà a pensare che podemo decìdare in propio su tuto, ignorando che ghe xe za stà Chi, prima de noantri, ga dito “Io sono l’alfa e l’omega”. Cussì so sta nostra socetà se ga fato note e, col nebiaro che s’à calà zo, ghe xe on gran disorientamento.
Ma sicome, par fortuna, el pessimismo no xe la nostra marenda preferìa, disemo che podemo ’ncora tirare i oci e zercare de individuare qualche punto de riferimento – na piera, on fosso che no sia fondo, na caroara, on àlbaro, on palon de la luce… – par restare in strada e continuare, caminando so le ponte o su i ovi, el viajo de la nostra vita.
Davanti a tuto sto anbaradan de discorsi e de parole, de scàndali e processi, de ofese e de scuse, de violenze e de crimini, de diriti calpestà e de doveri desmentegà, de ideali – Dio, Patria, fameja – che pare che i sia sparìi, no se pol no parlare de crisi de cultura e de falimento de la socetà civile.
Questo pol èssare el momento de la paura, la mancanza de “l’oriente”, cioè del punto dove nasse el sole. El xe el momento che uno el se domanda cossa fare, dove vardare, dove nare in zerca de i valori morali che ga da orientare le decision de la so vita, quando pare che tuto sia finìo in tòchi.
“Il tempo è uscito dal proprio giunto” ghe fa dire Shakespeare a Amleto, “che triste sventura essere nati per rimetterlo a posto.”
Tacarse a tuto quelo che jera el nostro tenpo, le famose raise bien piantà par tera, tentare de ricostruire chel mondo che ne xe vegnù a mancare no basta, parché se tratarìa de na ripetizion.
Danarse l’anima par mantegnere intato solamente quelo che xe stà el nostro mondo, le nostre abitudini, el nostro modo de vìvare, xe ’ncora poco e no ’l basta a vìnzare el sbandamento provocà dal preciso momento che stemo vivendo.
Eco alora che qua ga da entrare in balo la grande scola e l’insegnamento de chela maestra de vita che xe la mama. Sto nostro àngelo, no la xe nata mama, prima la jera tosa, róndena in zolo t’on paradiso tuto sóo e, na volta deventà mama, la ga afrontà l’incerto, el novo, el tuto da inparare e scoprire. Solo cussì la xe rivà a fare chel capolavoro che in tuti i casi se ciama omo, anca se, strada fasendo, tante volte el deventa on fià bestia.
Contro l’inevitabile disorientamento che la vita ne riserva, pensemo a la mama, nostra grande maestra e nostro mistero.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
L’unica xe la mama!
Co l’ingarbujo che se catemo davanti, in sto nostro tenpo, el punto de riferimento pi sicuro che podemo ’vere xe la mama, se la xe al mondo, o el so ricordo, se la xe za passà da la tera al celo
de Mario_Klein
Ciàcole visentine
Villaraspa conpie 400 ani
El 14 Majo xe festa granda par la pìcola comunità rente al comune de Mason Visentin, poco soto Maròstega
de Giordano Dellai
|
