Da la Lessinia Centrale (VR)

La prima “Note bianca”

’Na dameànela de vin da vintisincoe litri e na damenaèla de pearoni soto asedo, ’n saco de pan vecio e ’n par de saladi... par la prima “note bianca”.

Ogni tanto se sente parlàr de “Note bianca” de “Noti bianche”, de “… I è ’stè ia tuta la note, tuta la note par le discoteche” e ’ncora “… I à pensà de far na note bianca” e organisà, magari, dal Comune o da la Pro loco, par ciapar schèi o par nar ’ncontro a la moda del dì de ’ncó! Se dopo ghe casca ’l morto, come za è sucesso, alora “… l’è colpa de i tenpi che canbia!…”
Discorsi de ’sto gènere ormai i è de moda e se i sente dapartuto. Ma, na ’olta, là ne i bei ani Sessanta, come érele le note par i butèi, coà e là par la provincia de Verona, coà su par la Lessinia?
Noantri butèi, giràimo de coà, giràimo de là e verso mesanote, se ’ndàa ’n leto. Sabo o festa, l’éra senpre cossì. Ma ghè stà na ’olta, on sabo, che l’éra el primo majo, e donca, el dì dopo l’éra festa, mi, me son catà, nel remengar coà o là, ’ndó se podéa catar calche butela, con nantro par de butèi, su i disdoto ani, verso el Sessantatrì. Se fermemo, donche, a Lughessan, con le moto e lì ghè ’n s-ciapeto de butelotiele dóine. Ciàcola e che te ciàcola, ven fóra che mi a casa go el giradischi, e con de i dischi che i éra de moda coéi ani là: dischi de Celentano, de Morandi e de Rita Pavone e via su ’sto gènere. Le butele le me dise che son busiaro, mi ghe rispondo che i dischi ghe i ò. “Alora va’ a tórli, nemo a casa mia e lì scoltemo le cansoni” le me dise. Mi parto de bruto, con ’nantro butel, vao a casa mia, ciapo el giradischi che l’éra de me fradel Adriano, e anca i dischi i éra coasi tuti sui, mi ghe n’éa tri, che la m’éa regalà na butela e che a ela i ghe i éa regalè, ma ’l giradischi, no’ la ghe l’éa. E ’n du e du coatro semo tornè a Lughessan col giradischi e dischi. Infilemo la casa de la butela, e tachemo a sonar e scoltar musica.
Ma, s’éa fato l’ora de la polenta e ven a casa so bupà e i fradèi de la butela, e tuti i è ’n cusina e no’ se conbina gnente. Alora ghéra lì la Rosa, la fiola de uno de i du che i ghéa ostarìa nel paese e la dise: “Nemo a casa mia, a l’ostarìa”, cossì semo ’ndè a finir ne l’ostarìa del Vito, che ghéra ’n piassa, davanti a la cesa. Nemo rento a l’ostarìa, metemo sù el giradischi e taca la musica. Nel giro de sincoe minuti, l’ostarìa la s’à ’npienìo de butèi e de butele e tuti i à tacà a balar. No’ ghéra el paron de l’ostarìa, el Vito, la so dona e le so fiole, la Rosa, la Pina e la Lucia, i éra ’n po’ preucupè, parché no’ le savéa, come so bupà l’avarìa ciapà ’sta festa da balo inprovisà.

El Bruno Zanoni con l’altro Bruno, co la Topolino i è né a tor da magnar e da béar…

Gnanca el tenpo de pensarghe, che ’l Vito l’è capità e no’ ghéra verso de farlo acetar sta festa da balo: “No voi ciapar la multa e no’ voi ’èrghe da dir col prete!” Coeste i éra le so parole, moltiplichè diese ’olte! E cossì, visto che nessuni i le scoltàa e che tuti i balàa, l’à ciapà e l’à tirà zo le vàlvole de la corente e la festa la s’à fenìa lì. Ma, noantri butèi, ghéimo ’ója de far festa! Émo tacà a dir: “Se le cose vanno male, il corpo non deve soffrire!” Cossì, è partìo du butèi con la topolino, che i se ciamàa Bruno duti du e i è né a tór on saco de pan vecio – uno de i du el faséa el fornàr – e dopo i à portà na dameàna de vin da vintisincoe litri e na damenaèla de pearoni soto asedo e ’n par de saladi. Émo messo tuto sul mureto che ghè ’ncora davati a la cesa de Lughessan e lì, émo tacà a magnar e a beare e a cantar e a far festa. La gente del paese, par subito, i éra contenti, dopo coando i à ’isto che la baracada no la fenéa pi, i vegnéa a la finestra e i brontolàa e i diséa: “Né a casa vostra che noantri volen dormir!” Ma de nar a casa, nessuni ghe pensàa, tanto, el dì dopo l’éra festa! Ghè stà ci à ciamà i carabinieri, ma coando i è vegnùi, fra la maraja che s’à fato soto ghéra on carabinier in licenza e l’à dito: “Ghe penso mi! Semo su la piassa e la piassa l’è de tuti, basta che no’ fen casin!” L’è nà a parlar con i carabinieri, con paneti e salado e con goti de vin, el ghi à fati vegner lì con la maraja, i à magnà i à beùo e i n’à dito de no far casoto e i è né ia.
La note l’émo passà tuta su la piassa de Lughessan. L’éra de majo e vegnéa ciaro bonora. Come émo ’isto la prima luse del sol e sentìo calche galo cantar, semo partìi e semo tornè a casa nostra, lideri ne la mente, ma stufi su le ganbe.
A coéi ani là, mi faséa l’aprendista e, da aprendisti, se faséa mèsa giornada a la setimana de scóla, e do ore al mese, de religion, fata dal prete de Lughessan, don Umberto! Cossì, al marti, mi vao a scóla e su le scale, me cato don Umberto che ’l me speta. Come el me vede, el taca: “Cossa ìo fato sabo de note, tuta note su la piassa a béare e a cantar! Luni de matina, è vegnù tuto el paese ’n canònica, i me n’à dito de tuti i colori. Come se la colpa la fusse stà mia!” Mi me son messo a rìdare. Anca lu, don Umberto, dopo ’n poco l’à tacà a rìdare, parché, el m’à dito: “Par cavàrmela go dito: – Goardè che coéi lì da Sago e da Romagnan i è brai butèi e i ve marida le butele: serchè da farve furbi!” E cossì l’è stà, parché fra tuta coela maraja lì, émo sposà sincoe butele da lì ’n giro.
Credo che coesta l’è stà una de le prime “note bianche” de la storia veronese, fata a la bona, ma con òtimo risultato!

[torna sopra]