Ciàcole visentine

Villaraspa conpie 400 ani
El 14 Majo xe festa granda par la pìcola comunità rente al comune de Mason Visentin, poco soto Maròstega

La cesa de S. Francesco in Villaraspa.

Festa granda par Villararaspa, paese visentin de soto de Maròstega, ‘nte i primi zorni de majo. Sto paeseto de mile àneme ‘ntel comune de Mason Visentin conpie defati quatrosento ani, i stessi de la so cesa parochiale de San Francesco. La serata finale del programa de la manifestassion se svolge el 14 majo ‘nte la stessa cesa co la presentassion del libro de la storia del paese, scrito da mi in colaborassion co ‘l pàroco emèrito don Pietro Poletto e de i conponenti del consijo pastorale Tiziano Covolo, Alessandra Iebbiano, Antonietta Spezzapria, Nives Zanasso. Xe prevista la presensa del novo pàroco de l’Unità pastorale Mason-Villaraspa, don Ernesto Cabrele, de le autorità comunali e, naturalmente, de i abitanti de Villaraspa, che se tien in bon par sto inportante traguardo.
A l’inissio ghe gera in ànemo solo de fare un libro su la cesa, tirà sù apunto tra el 1608 e ‘l 1612, ma dopo, considerando che nissun prima de ’desso gaveva fato un libro su Villaraspa, se xe pensà de tratare, xe vero, pi che altro l’aspeto relijoso, sensa però pèrdare de vista altri aspeti de vita civile de na comunità che solo da poco pi de un sècolo xe ligà co Mason. A le orìgini de la so storia, defati, Villaraspa gera soto Maròstega, che ‘ntel Medioevo gaveva un teritorio che gera tre volte pi grando de queo de ’desso, conprendendo anca raquanti paesi vissini. Po’ quando ‘ntel 1606 Molvena se deventà comune autonomo, el se xe tirà rento ‘ntel so teritorio anca Villaraspa, che gera formà da un s-ciapo de fameje ‘nte l’alta pianura traversà dal Ghebo e da la Laverda.

Toseti de qualche ano fà davanti al capitelo de la Madona Ausiliatrice.

A chel tenpo là gera ’pena vignù fora el topònimo “Villa Raspa”, che vol dire sensa dubio “paese raspà” overo netà fora da i giaroni aluvionali e da le erbasse. Questa qua gera la situassion de chel paesajo almanco sin a la fine de l’età medievale, tanto pi che anca el topònimo vissin “Roncaglia” segnala na zona roncà, sarìa dire ridota a coltura dopo na radicale operassion de disboscamento. I protagonisti de sta inpresa che ga reso definitivamente abitàbile e coltivàbile l’area de Villaraspa xe stà i abitanti de Molvena, che tra ‘l Quatrosento e ‘l Sinquesento xe riussìi anca a deviare el torente Laverda e po’ a rèndare pi suto e fèrtile el teren de Villaraspa, adatàndolo anca a la viticoltura.
Insoma, dal 1606 Villaraspa gera deventà na frassion de Molvena, ma i so abitanti doveva caminare par 3-4 km, l’ùltimo trato anca in pontara, prima de rivare a la cesa de Molvena. Xe stà cussì, ‘lora, che un serto Girolamo Viero de Villarasa ga messo a disposission un so teren par costruirghe sora na cesa e ‘l 4 otobre 1612, propio ‘nte la ricorensa de la festa de San Francesco, la nova cesa xe stà inaugurà co na messa celebrà dal capelan don Nicolò Michele Viero, apartenente a la stessa fameja fondatrice, che xe stà el “primo a cavar fondamenti e primo a metter pietre”, come che ‘l ga scrito orgoliosamente par sotolineare el so sostansiale contributo a l’òpara.

[torna sopra]