|
Da Lendinara (RO)
L’è rivà el Torototèa
 | | L’ùltimo Torototèa padovan, Antonio Bisemi de Terrassa Padovana. |
A pochi passi dal paese, inte ’na caseta picinina, viveva ’na famejeta de tre parsone: la siora Ida co’ i fioeti Roseta e Gineto. La mama Ida lavorava pa’ la zente de la contrà come lavandara e Roseta la jutava inte i mestieri de casa, badando anca a so fradein.
Un dì, in ocasion de la Sagra de S. Crespin, la mama pa’ premiarla del so sacrifizio decidèa de portare ela e Gineto ai Salti, intel spetàcolo del dopodisnà.
“Roseta, staghe drio a to fradèo! Mi vago dessora a prepararme.”
“Sì, mama” ghe rispondèa la fioèa e, sbalotando Gineto de qua e de là, la ghe cantava:“Caregheta d’oro che porta el me tesoro, che porta el me putin, drin, drin, drin! Caregheta careghin.” Quando a un zerto momento, sul meàle de la porta, se presentava un foresto. “Mama!!... ghe xe un omo so la porta!... Viento qua?”
L’omo grande e magro cofà ’na sardèa la vardava senza parlare e, solo a l’arivo de la siora Ida, l’inbrazava un stranio strumento, tacando a sonare e cantare.
“Col so promesso, mi vegno vanti, parchè a me tuogo ’na libertà: so qua a cantarghe el Torototèa, che in ’sto momento ’l xe capità – Torototèa, torototà. Sia benedeto ’sto frabricato, e anca el mistro ca l’à piantà; e ’sti signuri ca ghe sta drento de bon core ghè senpre stà. Torototèa, torototà. Mi so partìo da Vicenza, e so’ vegnudo in fino a qua, pa’ augurarghe bona fortuna e ’na perfeta sanità. Totototèa, torototà.”
El cantava co’na voze sgrazià che parèa ca ghe fusse andà un osso pa’ traerso e no ve digo che strepito, che zighi saltava fora da chel strumento, tanto che la Roseta se gavèa un po’ spaventà.
“Bon dì, sior Torototèa” disèa la siora Ida “i me putini no i lo ga mai visto, capisselo?” e ciapava Gineto in brazo, strucàndose Roseta a la so còtoea, scoltando cussì co’ atenzion la tiratera del foresto cantastorie.
“E dal viajo, che mi go fato, le scarpe nove a go sbregà; e se me palpo inte le scarsele, no cato un beze de sparagnà – Torototèa, torototà. La paronzina mi za la vedo, la va in giro de qua e de là: o sia salami, o sia parsuti, ’na qualche cossa la portarà.”
Più divertìo de tuti gera Gineto che, ai stranbezi del sardeon, lo tegnèa vardà ridendo come un mato. Alora, el Torototèa savèndo de fare contenti i toseti, tirava in balo un altro strumento che no sonava ma fasèa mòvare de i pìcoi òmani de legno. Servéndose de spaghi, zenge e rodèe ànimava un marangon che segava, un contadin che zapava e un scarparo che batèa col martèo. A la fine de la rapresentazion riciapava a cantare e sonare el so strumento davanti a le faze inbabolà de i do putini.
“Se la me porta de la farina, la sachitina l’è preparà, se la me porta un tòco de grasso, la pignatina se cunzarà – Torototèa, torototà. Siora parona, sia benedeta, la me pol fare la carità: se qualche cossa no la me porta, me vedo mezo parzipità. Torototèa, torototà.”
A sentire ’ste paròe, la siora Ida lo ciamava in casa, ofréndoghe un goto de vin, e fin che lu zogatava co’ la Roseta e Gineto, mostràndoghe ancora i omaneti in movimento, la ghe inscartozava un tocheto de salame e qualche biscoto.
“Xe tuto quelo ca posso ofrirghe, sior Torototèa, se nantro ano el passarà da ste parti, el se ferma pure, parchè in sta casa el xe ben aceto.”
“A la ringrazio tanto, tanto, un altro ano sarò ancor qua – Torototèa torototà.”
L’andava via el Torototèa che squasi i putini i pianzeva dal despiazere de no védarlo più e, tanto i se ghea divertìo, che anca el zirco Medrano el gera ’ndà in cantinora.
“Sbrighémose! fasemo ancora ora de vèdare i salti” disèa la siora Ida e... uno de drio a chealtro i tocava via pa’ stradon, che portava in paese. Siben che intornovìa i can i bajava insustà, da lontan rivava puìto el stridulo del Torototèa che, fermo davanti a nantra casa, dimandava la carità.
“Sèntito, Gineto, che no ’l xe ’ndà via! Basta spianzotare, diman el vegnarà a trovarne, vero mama?” disèa la Roseta sugandose ’na lagremeta. “Sì, cara... ma ’desso sbrighémose.”
NB: El strumento del Torototèa jera ’na spece de vioìn (che se ciamava anca lu Torototèa), fato co’ un baston de legno incurvà che ai cai el ga ligà e ben tirà ’na corda de buèo, co’ tacà ’na zuca vioina seca e sensa colo (la zuca messa incoste a la corda la faséa sentire più forte el sono del strumento). Strissiando su la corda un archeto dal spago inpegolà, se sentìa un rumore da far drizare i caveji.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
L’unica xe la mama!
Co l’ingarbujo che se catemo davanti, in sto nostro tenpo, el punto de riferimento pi sicuro che podemo ’vere xe la mama, se la xe al mondo, o el so ricordo, se la xe za passà da la tera al celo
de Mario_Klein
Ciàcole visentine
Villaraspa conpie 400 ani
El 14 Majo xe festa granda par la pìcola comunità rente al comune de Mason Visentin, poco soto Maròstega
de Giordano Dellai
|
