|
Da San Bonifacio (VR)
Caro Dino, eco ’na scola col to nome…
La Scola Elementare de Brognoligo de Monteforte d’Alpone intitolà a Dino Coltro
 | | El scritor Dino Coltro, te na foto del 1994. |
Tenpo fà el dirigente scolastico de Monteforte d’Alpone el m’à telefonà par invitarme a partecipar a ’na riunion; el motivo l’era l’intititolazion de la Scola Elementare de la frazion de Brognoligo al scritor Dino Coltro.
Mi son stà subito contento de sta iniziativa parché Dino lo go avù come amigo par quasi trent’ani e me se strenze el cor quan’ che penso che no ’l gh’è più. Tante olte son sicuro che l’è là sora che ’l ghe conta al Padreterno le so storie e le so fòle; magari l’è là che ’l ghe rècita el maridazzo, fasendo rivìvar la domanda (o mèjo el contrato) de matrimonio de la civiltà contadina, sostegnendo le parte de tuti i protagonisti.
A la fine del 2010, quan’ che son nà te ’na libreria del me paese a rumar in mezo a le tante publicazion, la parona la me ga mostrà l’ultimo libro de Dino, vegnùo fora dopo che lu ’l ne ga lassà. L’è l’intervista a ’na vecia mondina de la Bassa Veronese e insieme l’omagio del nostro a la dona in gènare, che lu l’amirava par la so forza tanto da sentirlo recitar spesso e volentiera sto proverbio: “L’omo tien sù on canton de casa, la dona tri!”
Ripassando un album de fotografie indò go riunìo tanti momenti de cerimonie e de incontri co amiçi e conossenti, go rivisto Dino el dì de l’intitolazion de ’na via del me paese a Giovanni Piubello, scritor sanbo-mantoan, nel 1985. L’è stà alora che lo go conossù. El stesso ano el ga tegnù ’na conferenza su i capitèi de San Bonifacio e frazion, organizà da la contrà Coalonga. Dopo l’è vegnù dentro a far parte del Comitato Cultural de la contrà stessa. Mi go da dighe tante olte grazie al me amigo sia parché, insieme co Bruno Anzolin, el ga presentà i me libri de poesie in dialeto, sia parché l’è stà su so consilio che go deciso de publicar le létere che tegnéa serà te un casseto.
La prima de la serie la gavéa scrita par la Compagnia de Riviste de Monteforte d’Alpone, de la qual go anca creà i testi de le canzon e le senete. El la ga léta, a un çerto punto del spetàcolo, el capocomico Tiziano Battistoni, ’n ator de Verona da la braúra e da la mìmica a dir poco fantastiche. Nando ’vanti go seità a scrìvar létere par lézarghele ai amiçi e ’na sera che era a çena co Dino in chel de Terrossa, dopo ’na rècita de poeti dialetài, el me amigo el me ga invità a tirar fora calcossa da farghe sentir ai presenti. Go leto la létera del soldatin ricoverà a l’ospedal par ’n’ongia incarnà e che i dotori no i riesse a curar parché no i capisse cossa che ’l ga. A la fine de la letura el Sindaco de Roncà el me ga domandà la copia par lézarghela, la sera dopo, a la riunion de i so coleghi te la sede de l’USSL. Tenpo dopo Dino el me ga domandà parché no publicava ste me létere, ma mi alora insegnava e no me paréa el caso de far conóssar a tuti sti me scriti che considerava un fià “goliardici”. Ma tanto ga insistío che nel 1994 go scoltà le so parole e el libro el ga ’vù adiritura tre ristanpe. No solo, ma me son catà cità da l’ilustre dialetologo Manlio Cortelazzo te ’l so libro “Parole Venete”, stanpà da Neri Pozza te ’l 1994. ’Na gran bela sodisfazion, no ve par mia?
Con Dino son stà in giuria a Prova de San Bonifacio par quatro ani e lo go incontrà in Coalonga a la presentazione de i tanti Quaderni publicà da la contrà. Quel che però me ga senpre piasso, l’è stà nar a catarlo a casa sua, a San Giovanni Lupatoto. Davanti a un goto belo fresco de Custoza, oferto da so moier Gilda, se la ghemo contà che l’era un piaser. Dopo, mi ghe scrivéa longhe létere parlàndoghe un fià de chesto un fià de chelo, parché savéa che lu el le lezéa volentieri. El me diséa: “Ti scrìveme anca se mi no te rispondo. Le to létere le tegno tute da ’na parte!” Le çinque letere (curte) che go ricevù da lu in quasi trent’ani, le tegno co religion te ’l me “relichiario”, el racolitor indò meto le robe pi care e pi rare.
Par el 2010, dato che Coalonga e Dino i se gavéa un fià perso de ocio, mi ghe go domandà al nostro de scrìvar la presentazion del 23° Quaderno, roba che lu ’l ga fato volentiera. Lo go anca invità par el terzo sabo de lujo a gustar el minestron oferto da la contrà, come ogni ano, la sera de la presentazion del libro e lu el ga acetà. Cossì mi el primo lujo son partio par el mare e el 4 me ga telefonà da casa me fiola par dirme che Dino no ’l gh’era più.
Penso che sia pi che giusto rèndarghe merito a Dino par tuto chel che ’l ga scrito e fato par far rivìvar la lingua, le tradizion, insoma la cultura de la civiltà contadina.’Na cultura che gavéa bisogno de èssar conossù e valorizà. Dino el lo ga fato, recuperando sia chela orale: proverbi, fòle, modi de dir e storie, che chela materiale: i laori de l’omo, el so ambiente, la so vita, i atrezi del tenpo, le usanze, le tradizion…
Sto ano no se ga visto par le feste el so solito lunario e el fato de no èssar stà in mostra te le vetrine de le librerie el me ga procurà ’na ponta de tristeza e de malinconia. Tuto passa te sta vita, semo d’acordo, ma ’l ricordo de Dino el restarà scolpío par senpre, parché lu el vive in tuto chel che ’l ga çercà de far parché no sia scancelà da la memoria un mondo che l’è stà chel de so nono “Moro”, de so pare e par ani anca el suo. Eco parché Dino el se merita tuto chel che se organiza – e se organizarà – par onorar el so impegno e la so figura.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
No la xe pi l’istà de na volta
Xelo l’omo che ga canbià el mondo o xelo el mondo che ga canbià l’omo? Fato sta che gnanca pi le stajon no le ghe someja a quele che se ghemo lassà a le spale. E che magari rinpianzemo…
de Mario Klein
Da Vicenza
Al Cenàcolo... se traduse in dialeto!
de Ines Scarparolo
Da San Bonifacio (VR)
Caro Dino, eco ’na scola col to nome…
La Scola Elementare de Brognoligo de Monteforte d’Alpone intitolà a Dino Coltro
de Enzo Coltro
|
