|
Editoriale
No la xe pi l’istà de na volta
Xelo l’omo che ga canbià el mondo o xelo el mondo che ga canbià l’omo? Fato sta che gnanca pi le stajon no le ghe someja a quele che se ghemo lassà a le spale. E che magari rinpianzemo…
 | | Insoma, vardare e védare no xe la stessa roba… |
La rua del molin del tenpo la gira, la gira senza mai fermarse e la màsena tuto e tuti. No se pol scaparghe, no se pole ciamarse fora: el giro l’è quelo, sia par l’omo che pa ’l musso, sia par la dona che par la galina…
Par no girarse de testa, la mejo roba da fare, fin che se vive, la xe quela de stare nel giro de la rua, parché, tanto, nissun vien darte el canbio: a sto mondo bisogna acetare quelo che Dio te manda, conpresa on’istà difarente da quela che se se spetava, anca parché la passa cussì in pressia che, se te ghe badi, no te fè gnanca ora a gustarla.
Che ’l scravaza o che s-cioca el sole, che ’l tenpo sia inmusonà o che ’l sia seren, xe mèjo ciaparse el posto anca st’ano in riva a sti du mesi de Lujo e Agosto, che ’ncora vien considerà el “tempo del riposo” de la socetà industriale. Ma che no ’l sia on tenpo sprecà, speso unicamente par canbiarse el colore de la pèle, rosténdose in riva al mare o scarpinando su sentieri de montagna.
Che, par ponsarse, no ’l deventa on tenpo insulso da mati. Riposo no vol dire no fare gnente, ma fare de tuto… fora che quelo de quando te vè laorare par vìvare. El ga da èssare on tenpo “responsabile”, che uno el ga da spèndare ben par rinfrancarse le coste, ma anca par créssare drento, ’ndó no riva el sole, ma indove riva ben la parola scoltà, leta o scrita, ’ndó riva l’arte, le imàgini e la beleza de la natura mai vardà quanto ocore, mai aprezà ’bastanza par la so conservazion.
Sarìa come dire che l’istà ga da èssare el tenpo de la zerca, ma, come ga dito Marcel Proust, “il vero tempo di ricerca non consiste nel cercare nuove cose, ma nell’avere nuovi occhi per guardarle.” Vorìa dire che propio el tenpo de vacanza pole èssare na ocasion par riflètare sul modo miliore de vìvare l’istà e anca le stajon che riva dopo: l’autuno, l’inverno…
Par quanti ani e par quante istà no ghemo fato senpre le stesse robe, contentàndose de quel che passava el convento de la nostra vita. Ben, riva on momento che se acorzemo che, senza avisarne, tante robe – el clima, la tenperatura, el sole, l’aria, l’aqua, i usi, i costumi… – no le xe pi quele de na volta.
Cossa fare? Bisogna che inparemo da novo a maravejarse, no de quelo che fa o che no fa i altri, ma de i doni che ne ga fato el Creatore, on grande artista. Le sarìa tante le robe che forse no ghe femo pi tanto caso: ogni giorno el sole nasse, l’aqua score ne le vene de la tera, la piova rinfresca l’aria, el vento spanpana le somenze de i fiuri… Se volemo vìvare ben la nostra vacanza estiva, questa xe l’ocasion par rimétarse a vardare tuto questo “con occhi nuovi”. E magari ricordarse che ghemo anca da ringraziare Qualchedun, parché, se l’istà no la xe pi quela de na volta, el podarìa èssare anca on ben!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
No la xe pi l’istà de na volta
Xelo l’omo che ga canbià el mondo o xelo el mondo che ga canbià l’omo? Fato sta che gnanca pi le stajon no le ghe someja a quele che se ghemo lassà a le spale. E che magari rinpianzemo…
de Mario Klein
Da Vicenza
Al Cenàcolo... se traduse in dialeto!
de Ines Scarparolo
Da San Bonifacio (VR)
Caro Dino, eco ’na scola col to nome…
La Scola Elementare de Brognoligo de Monteforte d’Alpone intitolà a Dino Coltro
de Enzo Coltro
|
