|
Da Maran Lagunare (UD)
Pescaòr co i guanti
 | | Ameri el li voleva virdi, ma i guanti gera duti zai e ghe ga tochesto ciò do peri cussì. |
Finìa la guera, passài diese ani, istesso in tel pìcolo paese del Basso Friuli, Marano Lagunare gera ancora tanta miseria, la zente la feva i salti mortài par podè magnà un piato de minestra. Fio de un pescòr e so mare che la ndeva via col pesse, sicome che so nono maestro de musica, in militar el veva sunò col grando Mascagni, anca Ameri ’pena scuminsiò caminà ghe gera vignùa la mania che ’l veva deventà maestro de musica come elo. El se insumièva de note. Figurémose se la fameja la podeva permétesse de mandà un fio a scola fin Udine, massima de musica, e co’ varissi pensò i maranisi, con la mentalitàe serada che i veva in quela volta...
Gera proprio bel de vede: sto fio de pescaùri bel ganbiò co i cavì lunghi, ciapà la curiera e ndà scola ogni matina intanto che i so conpagni i gera za stufi de lavorà, parché finìe le ’lementari ghe gera tocò montà in batela e ndà pescà con so pare. La passiòn xe passiòn e Ameri el gera rivò ndà scola. Capelone par conto suo che ’l veva insielto scola musica che a Maran no la gera gnanca calcolada... no ’l gera vardò ben de i paesani. Ma co’ veva in testa i ginituri; butà via cussì schei par gnente, i diseva, anca se no veva inportaghe sta roba.
Deventò zovenoto, Ameri el veva sintùo bisogno de fa qualcossa posta jutà la fameja, fa in modo de pesaghe demanco. Dato che Tita ciamò Ciocoltin da i maranisi parché de carnasòn scura, el ghe veva domandò se ’l ndeva pescà i peoci con elo, Ameri el ghe veva dito de sì. Par dì el vero, ’pena viste le man piene de cali e de taji che veva l’omo el se gera spasemò, squasi pentìo, ma romai.
Tita Ciocolatin el biteva a trenta metri rente casa sua. Lo vedeva ogni zorno passà con la cariola, traficà de la batela in pescarìa: contentà i cliìnti, pesà i peoci, mitìghili sora i camiòn. Pescaòr de peoci, omo par conto suo, istesso Tita el se gera creò na pìcola inpresa de pesca, che se parlemo de quela volta la gera avveniristica, inpensàbile se vardévomo l’omo in tel muso, istesso el gera rivò a fasse un pìcolo alevamento de peoci in tel “Cesareli”, canaleto in palùo de Maran, che ’l sta rente i “Biuni”, zona mensonada in t’i libri, ndove che par sèculi se ga contò che in quel giogo xe sapulìo el tesoro de Atila.
Dopo veghe dito de sì al Tita, Ameri el gera ndò subito in serca de qualcossa posta parasse le man, in modo che a scola el podeva sunà el strumento sensa problemi. Entrò in botega de la Mariane, el veva misurò i guanti de goma. Li voleva virdi, ma i gera duti zai e ghe ga tochesto ciò do peri cussì. El veva travajò un bel tòco prima bituasse a lavorà co i guanti. No gera fàssile netà i peoci con la spasseta, gavaghe i dinti de can sensa tiraghe via el pel in banda che, conpagno el bugnìgolo li mantien vivi più a longo. Ma pian pianin Ameri el veva inparò lavorà co i guanti, tignisse conto le man.
Podè crede el maravejèo de i maranisi ’pena che lo ga visto rivà in pescarìa co i guanti zai, le ridàe che i ghe veva petò sul muso, che, par luri, Ameri no ’l gera altro che un capelòn sensa arte né parte, che ’l feva na scola de poco conto.
I do ani che ’l veva lavorò col Tita, oltra veghe fato ciapà qualchi scheo i xe stai buni parché lo ga jutò a cresse. Seanca no ’l gera mai ndò drio de la zente, lavorà col Tita gereva stada na roba inportante par la so dignitàe de omo. E co dopo passài do ani, a un serto punto la scola la gera deventada massa inpegnativa ghe ga tochesto lassà el Tita, a Ameri ghe veva dispiasùo tanto. Intanto, so fradel che ’l veva fato domanda, lo veva ciamà a lavorà in fàbrica de la Maruzzella e cussì el ghe veva lassò la batela e un puchi de grasiùi e de cugùi, e Ameri el gera ndò pescà par conto suo. Quìi ani rivài dopo i gera stai forsi i più tromentài de la so vita, ma istesso Ameri el ga strento i dinti: tignùo duro fin che ’l ga podùo realizà el so sogno. Ciapò el diploma, deventò professor de musica, gera stada na grossa sodisfassiòn par Ameri: massima podè insegnàghela ai fiòi de quìi che lo veva tanto criticò...
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
No la xe pi l’istà de na volta
Xelo l’omo che ga canbià el mondo o xelo el mondo che ga canbià l’omo? Fato sta che gnanca pi le stajon no le ghe someja a quele che se ghemo lassà a le spale. E che magari rinpianzemo…
de Mario Klein
Da Vicenza
Al Cenàcolo... se traduse in dialeto!
de Ines Scarparolo
Da San Bonifacio (VR)
Caro Dino, eco ’na scola col to nome…
La Scola Elementare de Brognoligo de Monteforte d’Alpone intitolà a Dino Coltro
de Enzo Coltro
|
