|
Na storia d’altri tenpi (in visentin)
On fiore drio na strada
 | | “Son na dona de strada” la ga dito quasi pianzendo… |
Elide jera professoressa de le Superiori: na bela dona, nel pieno de la so florida maturità.
El suo jera stà on matrimonio fortunà e felice: la gavéa sposà on dirigente de na assienda che incontrava i favori de la richiesta del mercato. Nessuna preocupassion gravava su chei du sposi e ’l so matrimonio tocava, proprio in chel giorno, i diese ani de convivensa.
Mojere e marìo, chela sera jera sentà in saloto: ela coregéa cònpiti e lu sfojava on giornale de economia. Ma se pareciava la burasca: la vissinansa tra i du jera talmente tesa che la fiama de on fuminante sarìa bastà a scadenare l’uragano. El momento jera cupo; on silensio che oprimeva tuti du e l’atesa del coloquio jera spasmodica.
A on serto punto lu ronpe el silensio e el la ciama par nome, anca quelo segno de la studià distansa: “Elide, fursi te go amà o te me piasevi on tenpo. Ma adesso dubito parfin che ’l mio sia stà on vero amore. ’Desso non te vojo pi ben. E volendo essere sincero, go incontrà nantro amore che par mi credo ideale. Sto novo amore me ga dà tuto parché no ’l gavéa altri inpegni o doveri ne la so vita. La me ga dà el so corpo, el so tenpo, la so inteligensa, la so ànima e… anca la so giovinessa.”
“Lo gavevo capìo – la ghe ga risposto. – Non ocoreva che te me lo disessi. Ma pènseghe: oltre a le sodisfassion de le to inprese personali, quelo che a nantri ne xe mancà, xe stà soratuto on fiolo. Se ti, invesse de pensare solo a i to afari, te gavessi possudo la sera, anca se straco morto, strenzare in brasso on fiolo, chel fiolo gavarìa fato de nantri na vera fameja e mantegnù vivo, ansi el gavarìa senpre pi ricreà l’amore.”
Par on fiolo, quanto i gavéa corso, quanti schei spesi par de i specialisti. A on serto periodo de la so vita, ela jera rivà a la disperassion; no la jera bona de darse pace e, anca se la jera convinta del contrario, la se ritegnéa solo ela la responsàbile de la so sterilità. El marìo, in chel tenpo tanto atento e afetuoso, el gavéa fato de tuto par salvarla.
Nel saloto tra i du xe tornà cupo el silensio. I so servèi ruminava la pesante situassion familiare, le inutili speranse, tute le aspirassion butà al vento.
Ma ela xe sta folgorà da on lanpo de luce, insieme a na rinata teneressa: “Vien con mi – la ghe dise – chissà che non trovemo la solussion de i nostri disagi. Na forsa nova me xe nata in fondo l’ànima e insieme na speransa fursi inpossìbile.”
In sità, a l’esterno del convento de le Suore Poverele jera stà riaperta la “Ruota degli esposti”. Elide, strenzendo el marìo sotobrasso parché no ’l podesse scapare, lo ga portà nel sotopòrtego de la sità dove esisteva quel convento e chela tanto solidale “Ruota”. Jera sera inoltrà. “Spetemo – la ghe dise, strenzéndolo forte al so fianco. – Me sta gonfiando el core na nova e miracolosa aspetativa.”
La note po’ solevare el velo de na tragedia, ma talvolta, Dio permetendo, anca on grande evento. Elide lo ga invità a recitare on “Padrenostro”. Da quanto tenpo lu se gavéa dismentegà de pregare! I se ga sconti drio na colona. El destino, finalmente benévolo, ghe ga verto i brassi.
Xe sta cussì. Guardinga e incerta xe aparsa na dona de na serta età. In brasso la strenzeva, rento na coertina, na creatura de pochi giorni. I du sposi, streti abrassà e timorosi se ga fato ’vanti, incontràndola. La “sconosciuta” non xe scapà. “Son na dona de strada – la ga dito quasi pianzendo –, e non go vossudo abortire par poder conóssere anca mi e provare cossa xe la maternità. Ma el lavoro che fasso da senpre e che ancora farò, non me permete de èssere interamente na mama. Non go fameja e vivo rento on postribolo con altre done come mi. Par questo, col cuore strassià, go da alontanarme dal me putelo. Spero che ’l Bon Dio me perdone e prima o dopo rive anca par mi na esistensa normale. Sto angelo rifiutà comoverà anca el Bon Dio.”
Mai la gavéa pregà cussì e le làgrime ghe rigava el viso.
La ga streto, basà e caressà el neonato che, streto al so pèto, ancora dormìa. E rivolta ai du sposi: “Si persone che me dà fiducia, non par gnente si qua: fursi xe stà Dio mandarve. Son sicura che darì tanto amore e on sicuro avenire al me putelo!” La lo ga ’assà tra i brassi de la professoressa e sta volta, tuti tri pianzeva.
Anca drio na strada pol sbociare on fiore.
Ma questa che ve go contà, fursi xe na storia d’altri tenpi, quando la jera possìbile.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
30 ani de dialeto
“Quatro Ciàcoe” la xe rivà al bel traguardo de i trenta ani de vita. Questo xe la dimostrazion che el dialeto no ’l xe na lingua de scarto e che se pol scanbiarse idee, rajonare de questo e de queo, far “quatro ciàcoe” a la bona, ne ’a lingua che ghemo inparà par prima in fameja
de Mario Klein
Da Verona
Pajassi
Storia de gente seria che fa el pajasso, cioè el clown
de Lucia Cozzolino Masotto
Da la Marca
Nane Caregheta
’na màscara trevisana
de Emanuele Bellò
|
