|
Da la Marca
Nane Caregheta
’na màscara trevisana
 | | Nane Caregheta interpretà da Claudio Baldo. |
Un tenpo, no solo Venessia ma anca le altre çità del Veneto, le gavéa la so bela màscara; par esenpio a Verona ghe jera Marco Paparela che rapresentava el spirito bontenpon de i veronesi tuti mati, mentre che Padova la gavéa Anzoleto Spàsemi, caricatura de i studenti del Bo. Treviso la vegnéa rapresentada inveçe da Nane Caregheta, un sanser o mediator o marcantin, ciacolon, trafeghin e soratuto bon da onbre. El soranome el ghe vegnéa da l’uso de portarse drio na caregheta inpajada, cussì, anca se i ghe diséa che no ghe jera posto ne le conpagnìe dove che el voleva inbusarse, lu el podéa rispóndarghe che el posto par sentarse el lo gavéa za. Oltre a la carega el se portava drio anca ’na bagolina che la ghe servìa a pertegar la tera, a far cantar ’na bote o magari a alsarghe le còtole a qualche tosa.
El personajo de Nane Caregheta, nato sul finir de lOtoçento có infuriava la question agraria, el ga durà fin a i ani Vinti, quando che el novo regime lo ga fato sparir parché no jera gradìe le batùe pevarine de la so lengua sensa freni.
L’ano passà, par celebrar in maniera original la fine del Carneval, la Còngrega, par el recùpero de le tradission trevisane in colaborassion col Comune de Treviso la ga pensà ben de ripropor ’sta maceta çitadina e dopo varie ricerche portàe ’vanti dal grupo “Amici di San Martino” Nane el xe ritornà in vita al Vejonçin de i putèi del Marti Grasso soto la Loza dei Cavalieri, dove che el xe stà inpersonà da Claudio Baldo, artista e marionetista, par la gioia de cèi e grandi che ga ritrovà ’na pagina desmentegada del nostro folclor. Ricostruir la figura de Nane, co le so carateristiche e el so repertorio de màssime e batùe no xe stà par gnente fàçile, ma sfojando veci giornài e sfrutando i ricordi de qualche otuagenario, se xe riussìi a darghe un viso e ’na vose.
Xe stà pressioso l’ajuto fornìo da un disegno in “bianco e nero” su ’na vecia rivista e da ’na poesia in dialeto trevisan che la descrivéa co tanti particolari el lavoro de Nane Caregheta in un tìpico giorno del marcà de Treviso:
Ogni giorno de marcà
Nane re dei mediatori
el vien sempre consultà
da paroni e da fatori.
Lu el conosse ogni cesura,
prà o tera da vassor
e coi passi el la misura
mejo de un pertegador.
No ghe xe ’na marcansìa
che da lu no sia tratada,
campi, case, vin, boarìa,
paja, fen, formajo, biada.
Lu el te bate le casàe
fin a l’ultimo colmel
par un poche de forcàe
de leame o stramedel.
Lu conosse ogni mercante,
betolier o marcantin
e co un far acomodante
el tira l’aqua al so mulin.
Qualche volta el fa el sanser
de morosi, e a nosse fate,
el se ciapa co piasser
un bel paro de savate.
El va in giro su un saret
co na scuria da carioto
par guidar el so piavet
e tegnerlo sempre al troto.
Có ’l se ferma a ’na ceseta
el tol tripe co un quartin
e in tabaro o in porçeleta
sona sempre el so tacuin.
Lu se imbusa dapartuto
come el fusse a casa sua;
par bagnarse el beco suto
ghe vol solo ’na batùa.
Cussi Nane Caregheta
porta vanti el so mestier;
ora serio, ora maceta
el sa farse benvoler.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
30 ani de dialeto
“Quatro Ciàcoe” la xe rivà al bel traguardo de i trenta ani de vita. Questo xe la dimostrazion che el dialeto no ’l xe na lingua de scarto e che se pol scanbiarse idee, rajonare de questo e de queo, far “quatro ciàcoe” a la bona, ne ’a lingua che ghemo inparà par prima in fameja
de Mario Klein
Da Verona
Pajassi
Storia de gente seria che fa el pajasso, cioè el clown
de Lucia Cozzolino Masotto
Da la Marca
Nane Caregheta
’na màscara trevisana
de Emanuele Bellò
|
