|
Memoria euganea
Emigrante in Libia
 | | La nave ca jèrimo inbarcà noantri la se ciamava “Sannio”. |
Quando la me fameja, dopo la morte de me nono, la se ga spartìo, coreva l’ano 1935; a me popà ghe xe tocà on tòco de tera so ’l monte soto el Murale; noantri a jèrimo na streja de fradèi, jera squasi inpossìbile vìvare co quelo che rendéa sto tocheto de tera.
Cussì có i ga verto le migrassion par la Libia me pare el ga fato domanda e i ghe ga dà èsito favorevole. Me popà no el ga mai dimostrà sinpatìa par i fassisti, ma gnanca par altri partiti, ma xe bastà par mandarne via, fora da i piè.
Semo ’ndà a inbarcarse a Gènoa: feste, musica, da magnare de tuto, dolsi, zugàtoli e roba da vestire. I diséa ca jèrimo in ventimila; tute ste nave carghe de pòara zente, pieni de speransa, se ’ndava in serca de lavorare e magnare tuti i dì. La nave ca jèrimo inbarcà noantri la se ciamava “Sannio”, na careta che i diséa che la gheva portà i Mille de Garibaldi a Marsala.
No ve digo el viajo. Tuti rimetéa, spece le done e i putèi, i grandi i se perdeva via zugando a carte e cantando e ogni tanto on capelo el zolava in mare, e finalmente dopo nove giornate a semo rivà a Tripoli: na marèa de zente, a ghemo invaso tute le strade, na bona parte i xe ’ndà verso la canpagna de Homs, arente i confini de la Tunisia, noantri invesse i ne ga inbarcà verso Bengasi: nantri quatro dì de mare e dopo na giornata de camion a semo rivà squasi a Derna, on paeseto tuto novo (Luigi de Savoia) e forsa de scarossamenti semo rivà a tuta note e no saévino gnanca ’ndove.
Có xe vegnù ciaro a se ghemo vardà intorno. Na desolassion, intorno tere incolte a perdita de oci, le case una ogni chilometro, solo “cespugli e sassi”; in casa a ghemo catà on poco de tuto da magnare.
Se ga presentà uno e ’l ga dito che ’l jera on capo zona, ca no stemo a preocuparse, ch’i ne portarà i atressi par lavorare. Al dì dopo xe vegnù on geometra a segnare indove fare i fossi par piantare le vegne, i frutari e altre piantagion.
A ghemo lavorà assè: tera rossa, dura e piena de sassi e calcare; dopo on ano a ghemo pianta le prime vegne e i primi frutari, mandà da le piantagion de Sgaravati; se scumissiava a tirare el fià. La tera, bastava somenare, vegneva fora de tuto, ma de istà a no pioveva mai, ma on poca a la volta a scumissiàvino a bituarse.
Mi a gheva sédese ani e lavorava co na inpresa par costruire on grandìssimo aquedoto, el doveva servire anca par le pìcole irigassion: dopo tanto tribulare se vedeva i primi risultati.
Co i Arabi se gheva on bon raporto, se scanbiava merce, se vedeva calche carta da sento girare, polame, porsèi, càvare e bestie da late e da lavoro, on cavalo da tiro e na cavala da sela, ma sensa sela, a pelo seco. Par spostarse, se lavorava on pasto, ma no mancava mai gnente e calche volta se balava fra de noantri co on vecio gramòfono, i vecioti i zugava a carte e se beveva calche goto de vin bon.
Ma in aprile del ’40 xe vegnù on ordine che tuti i putèi da i tre a i trèdese ani i vegneva manda in te de le colonie in Italia. I ne ga dà da intèndare, par poco tenpo, do o tre mesi. Invesse el 10 de giugno a xe scopià la guera.
Semo stà invasi da i Inglesi in genaro del ’41, i Arabi i vegneva a pascolare i camèi e ogni sboconà i magnava na vegna e no se podéa farghe gnente; na fameja de Sant’Elena la xe stà massacrà in casa; la paura, la confusion ne ga fato rifugiare tuti in paese par poderse difèndare.
Ma, dopo quatro mesi, xe tornà i Italiani insieme co i Tedeschi: i xe rivà fin a Tobruk e dopo nantra ritirata, semo tornà a casa da la disperassion. Tuto el nostro lavorare distruto, el vigneto, i frutari tuto magnà dal bestiame de i Arabi, e se prevedeva nantra ritirata; tanti co mezi de fortuna i scanpava verso Bengasi e noantri denovo in paese, invasi oncora da i Inglesi. I Arabi i gheva alsà la testa, i jera in casa sua, ma i Inglesi, bisogna dirlo, i ne protegeva.
Denovo xe tornà i nostri, e stavolta i xe ’ndà fin a El Alamein. Romai, disévino, stavolta i va fin al Cairo. Invesse la disfata! Stavolta bisognava proprio scanpare, e difati co on camion militare, co la sola camisa ca ghévino ’dosso, a semo ’ndà fin a Bengasi. Pròfughi che rivava da tute le parte, soto i bonbardamenti dì e note; fin che Dio ga fato che ne xe tocà de èssare in lista par ’ndare a l’aeroporto e partire par l’Italia; la Marina militare inglese la tegnéa senpre soto tiro chei pochi aparechi che riussiva a calarse. A semo montà so on trimotore da trasporto e dopo quatro ore a semo riva a Lecce. Fora da on incubo, ma sensa gnanca i oci par piànsare; semo stà messi in te na spece de albergo, tuti so na càmara sola.
On poco a la volta a se ghemo sistemà. Me fradèi che i xe stà mandà in Italia prima de la guera i xe vegnù casa, se ghemo riunìi oncora tuti insieme, ma par poco; me fradèo pi vecio el jera via de Marina; on antro dopo poco a militare e mi dal ’43 de leva e l'’8 setenbre i Tedeschi i me ga portà prisoniero in Germania. Ma questa la xe nantra storia.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Cantare per la vita
De solito se laora, se magna e se zerca de star ben par vìvare; anca in tenpi duri se fa de tuto par canpare el manco pezo. Servirse del canto par sostegnere l’idea che la vita xe on ben prezioso assè, el xe on gesto nobile e sociale
de Mario Klein
Da San Bonifacio (VR)
L’orto drio casa
Ma semo sicuri che convien fàrselo e che la verdura che se produse l’è biologica? Proè a no darghe gnente a le varie verdure che somenè e vedarì che bela roba che vien fora e che festa che fa pronòspara, osèi, bai e pioci co chelo che dovaressi magnar vualtri
de Enzo Coltro
|
