|
Da San Bonifacio (VR)
L’orto drio casa
Ma semo sicuri che convien fàrselo e che la verdura che se produse l’è biologica? Proè a no darghe gnente a le varie verdure che somenè e vedarì che bela roba che vien fora e che festa che fa pronòspara, osèi, bai e pioci co chelo che dovaressi magnar vualtri
 | | L’orto che me piasarìa averghe drio casa. |
Mi, che son de vecia zoca, go senpre ’vù la passion de l’orto, passion che m’è vegnù da me noni pi che da i me genitori. I ani i sèita a passar de corsa pi de Nuvolari e pi i passa e pi la tera la se sbassa. Me mojer la me dise de lassar pèrdar, ma mi son senpre de la me idea, che l’è chela che produso che l’è verdura sana e cossì sò cossa magno.
Có vedo le pearóne del frutarólo che le pare fate col stanpo o le melanzane che le par lucidà co la cera, mi me domando quanto velen i gabia doparà par far vegner ste verdure cossìta bele. Mi sò che le mie, che ghe dò poco gnente, le vien come le vien… Sì, i è gustose, ma par gnente bele. Spesso i pearoni i se inpiena de pioci e mi alora me meto i guanti de làtice e li schizo co le man. Ma no riesso mia a coparli del tuto e alora coro a conprar el Confidor e co quelo ghe fo la guera. Me sento anca un fià Rambo co chel velen par le man, parché sò che no se ghe ’n salva uno de pioci. Dopo, però, penso che anca la me verdura no l’è mia po’ tanto ecologica, ma s’a no la tratava, no magnava mia pearoni.
Tante olte penso che, a conti fati, no ghè mia tanta convenienza a tegner sù l’orto, parché par sié piante de pearoni go speso, de velen, quanto par conprar pi de sete-oto chili de sta verdura; roba che no le me gavarìa de çerto fato le me piantine. Po’ bison ’jutar co calcio e azoto le varie verdure parché le vègna ben e no le se mala… e alora via!… altri prodoti che costa cari anca lori. E el verderame che bison spianzàrghe a i pomidori dopo ogni piova? Metémoghe anca quelo in te ’l conto… Un me amigo el spianza adiritura i fiori de i pomodori co i ormoni e el me conta che i fruti i vien ’na maraéja. Vuto védar che fra poco ne tocarà consultar anca el ginecologo par l’inpolinazion?
Disemo alora che el biologico l’è nà o ’l sta nando a farse frìzar del tuto e anca la verdura de l’orto l’è precisa de chela del frutarólo. Anzi, e no se sa parché, a l’è pi bruta de chela che i vende, pur s’a se se consola, disendo che l’è çento olte pi saorìa. El sedano, par esenpio, l’è tanto pi gustoso de chel che se conpra, ma l’è pi magro e seco, no belo cicioto e morbio come chel’altro.
I fenoci no li inpianto pi, parché par mi i è senpre ’na gran delusion. I cresse in alteza e i resta senpre magri e scanchìi. E sì che li incalzo e çerco de ingrossarli co azoto e altro. Me vien el nervoso có li vedo dal frutarólo cossì bei tondi e ciossi che pare che i voja farme dispeto.
Go leto che, da calche parte, i li fa vegner co la caca de cristian e alora mi, che li go senpre magnà de gusto, go fato ’na pausa de riflession. Go scominçià a dirghe a me mojer che era stufo de la solita verdura e che voléa canbiar. No ghe go mia dito de la caca, par no mandàrgheli in disgrazia, visto che i ghe piase cossì tanto in tecia. Ogni olta che me li catava sul piato condìi, li vardava par calche àtimo e pensava: “Ciò? De ci sarala mai stà la caca che ga fato vegner belo grosso sto fenocio?” Po’ afrontava el primo bocon co ’na çerta difidenza, e me paréa che ’l saòr de anice no ’l fusse pi chel de ’na olta. Anzi! Gavéa come l’inpression che ’l fusse adiritura sparìo par lassarghe el posto a un saòr difarente… da mufeta… se non da altro. Ma me vardava ’torno e vedéa che tuti magnava de gusto e alora me consolava col dir: “Forsi sto fenocio chì l’è stà slevà in maniera difarente da chei che go leto!” E ’l fenocio el tornava a saer da novo da anice e a s-ciocar soto i denti.
Çerte matine me alzo dal leto assè presto par farghe la guera a i bai che me rósega brócoli e capuçi. I è baeti verdi che se sconde in mezo a le foje e catarli a l’è ’n’inpresa. Alora bison çercarli ropetando fra le foje par schizarli e netar fora tuta la smorcia che i ghe lassa rento. Ghe sarìa anca el velen aposta par farli fora, ma alora eco altri schei da spèndar e el biologico el va a farse frìzar ’n’antra olta.
Altra malatìa l’è chela che ghe seca la ponta de i pomidori a pereto. I se smarçisse soto e par curarli, altro prodoto chimico che costa ’n ocio. Alora o te cavi sù la pianta o te çerchi de salvarla, ma ’l prodoto el costa come diese olte i pomodori che la fa. Cossì te te domandi s’a ghè convenienza a coltivarte l’orto.
Méteghe el tenpo che te ghe perdi drio, la fadiga de vangar, de somenar, de bruscar, de bearar, de farghe la guera a bai, osèi, pioci e po’ magari ciapar ’na tenpestada de chele che te mos-cia tuto… Insoma indò ela tuta sta convenienza a tegner sù l’orto?
Sì, d’acordo, te ghè la verdura drio casa e te pol nar tórtela sù có te voi ma par el resto, biologico e costi, no ghe semo mia. Mi penso che l’unica virtù che ga l’orto, l’è chela de obligarte a far movimento, a suar, a butar fora tuto chel che l’è velen par el corpo. Inveçe da nar a suar in palestra, te lo fè drio casa, senza spèndar schei e anca s’a la tera la se sbassa senpre più pi che passa i ani, te te adati, pensando che ’l to sfadigar el te fa ben e el produse. Anca, se come go za dito, el biologico l’è un sogno e la convenienza ’na pia ilusion.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Cantare per la vita
De solito se laora, se magna e se zerca de star ben par vìvare; anca in tenpi duri se fa de tuto par canpare el manco pezo. Servirse del canto par sostegnere l’idea che la vita xe on ben prezioso assè, el xe on gesto nobile e sociale
de Mario Klein
Da San Bonifacio (VR)
L’orto drio casa
Ma semo sicuri che convien fàrselo e che la verdura che se produse l’è biologica? Proè a no darghe gnente a le varie verdure che somenè e vedarì che bela roba che vien fora e che festa che fa pronòspara, osèi, bai e pioci co chelo che dovaressi magnar vualtri
de Enzo Coltro
|
