| de Vittorio Ingegneri Dinerio |
|
Le storie de Dinerio
Memo Mascagna
 | | Memo Mascagna, on zerman de me nono, el jera stà 36 mesi in Marina, inbarcà su na vecia careta de mare a tri àlbori… |
– Noemi, go visto to neodo Fabio co’ na sgnàgnara in testa cossì inpestà de gasìe che ’l me paréa el roejo de grebanassi che ingiavasca la desmessa ferovìa Treviso-Ostilia. No te si bona de ciapare in man ti la forfe e darghe na sgualivada a chel ciufo che ’l ghe querze i oci e ghe riva fin in ponta a la canopia? Medigo che deboto non ’l ghe vedarà gnanca a biastemare. Crédeme, mi go stentà a cognósserlo stamatina qua davanti che ’l gera drio spetare la coriera. Descùsame, seto, s’a so’ ’ndà zo gualiva co ’l sfregolon foghente, ma par mi “xe pi mèjo ingiotir un gran de pévare ca no fa un stronso de musso!”
– Cossa vuto, Nunsia, i tosi d’oncò no i sa pi come cinciarse, i va in volta consà come Ana. No te vedi ch’i se scarabocia la pèle pèso de na carta jogràfica, partendo dal colo fin zo al buso del ghitaron. E no se pole gnanca contrariarli sinò sti caprissiosi vissià come toseti da caregon co ’l ciucio in boca i scanpa de casa, fasendo pèrdare le pèche.
– Sì, sì, tratémoli pure co ’l sculierin de la miele e te vedarè, nando ’vanti de sta anda ch’i ne schitarà te ’l muso. Chissà quanto ca ne tocarà gratarse la coéga de la testa noantre none! Ciò, “có la merda squàquara per casa, cade che tuti nasa.”
– Bela questa, barba! Per fortuna ste parole no me toca, co’ la me testa rasà. Pitosto cossa zele secondo ti ste gasìe che inpesta na strada ferà mai sentìa nominare?
– Sacranon, fiosso! No te scanpa propio gnente a ti. Da come la se ga scomodà, par quanta rason che la possa ’vere ’bù, quela sioreta radegosa, imàgino che co’ chel termine stranbo pronunsià la intendesse dire sgrèndane, riferéndose a le ciome del neodo. Le gasìe invesse xe quei giavaschi de rubine e alborele salvàdeghe ca nasse e cresse da sole drio le spale de i canài trascurà da la false o drio i trosi de scarso passajo come quelo de la linea feroviaria Treviso-Ostilia, un tronco de strada ferà de antica concession, ormai da ani eliminà. Pènsate che l’idea de realizare on lungo stradon co’ le rataje ca dovéa unire traverso flumen Pado in Hostilia romana at flumen Danuvium in impero d’Austria, vien fata partire storicamente da l’epoca del dominio de l’inperatore romano Claudio Augusto, (’torno i ani ’50 d.C.), come testimonia on masso rinvegnù in zona co ’l so nome scolpìo. Però cade rivare al 1908, quando sul giornale “Il Resto del Carlino” vien publicà la notissia de l’inissio de i lavori per la costrussion de la ferovia nominà. A fracare sul celeradore de l’inissiativa xe stà Graziano Appiani, on industrialoto milanese, produtore de tavele e piastrele traferìo a Treviso, interessà a la linea feroviaria par rivare a vèndare in Bassitalia la merce de so produssion. No te digo le beghe ca xe nate par trazare el troso in tera veneta; on tiramola radegoso fra i politici de l’epoca, che ognun voléa far passare le rotaje pa’ i paesi che pi ghe faséa còmodo. Fato sta che i lavori xe partìi solo nel 1919, ’pena finìa la prima guera mondiale. L’ultimo tronco a èssare realizà xe stà quelo ca coréa da Camposanpiero a la Porta Santi Quaranta de Treviso.
– Come feto, barba, ricordarte tute ste notissie?
– Ara ti! Me crédito on temelechi o on mago? Invesse te ga da saére che Memo Mascagna, on zerman de me nono, ga sbusà belieti par ani sul treno ca coréa drio chel binario là. Me ricordo, parché a cuntarlo gera propio lu. Dopo 36 mesi de firma in Marina, inbarcà su l’Airone, na vecia careta de mare a tri àlbori, pi da defesa ca no fa da ataco, par de pi ancorà nel porto de Taranto pitosto che in navigassion, có ’l s’à congedà, par meriti ca no gavemo mai savù, i ghe ga dà el posto da fatorin in ferovìa. Pènsate propio a lu co’ la so melona da porton! Me nono sospetava che ’l fusse na checheta ca se la intendéa co ’l comandante. Defati sto fenocela no ’l s’à mai maridà. El cuntava che tuti lo toléa pa’ i fondèi có ’l xe montà in servissio da bilietaro par via de la so copa bassa tuta inpatacà de brilantina. Serto na rarità a quei tenpi.
– Cossì capisso, barba, che i scavejoni ghe gera anca alora, magari forse on fià manco in disórdane de ’desso.
– D’acordo, ma tornemo al zerman ca se lavava la boca co’ l’aqua salà come che ’l fusse on vecio lupo de mare, anca sentà a tola, magnando on bocon co’ noaltri de fameja, par tegnere a drita la rota ne i so descursi. S’ingalossàvimo a scoltarlo soratuto quando, da saputon, el ripetéa i órdani del comandante: “Giù le scotte, alzate il parocheto, sù i parabordi, atenti a la randa, non stranbate senza izzare il parafico!” Ghe piaséa catare fora ste bagatele, credendo de ciaparne in torta curiosa, invesse noaltri sgramegnaròi de manco pàciole e de pi fati, sgamàvimo le so portade e ghe smorsàvimo el faelare, stando muci muci. Invesse lu s’in toléa ancora piassè, zontando che calche volta el capitano lo lassava timonare in plancia de comando anca da solo, faséndoghe ’diritura trazare serte rote su le carte de marina. On bel dì, ca se no ricordo malamente ga da èssare stà on giorno de vesilia, parché gèrimo drio magnare on piato de bìgoli in salsa, me nono stomegà da ste solfe, ga sbufà de bruto, senténdolo cuntare che ogni qualtanto manejava el timon. “Ciò, panpe da l’ostia – el ghe ga intimà – spiègaghe anca de chela volta ca te si vegnù casa in licensa tuto inboressà pa ’ver lancià l’órdane de oltare a sanca sinò la prua naséa ingiararse t’un speron, ma el timon forsi sconquassà, no ga risposto a i comandi.”
– E alora come zela ’ndà a finire, barba?
– Ma valà, fiosso, no xe sucesso na madona de gnente! Chel spunton de scolio che ’l gavéa visto lu gera na caca de mosca su la carta nautica…
– Ben, questa po’, la xe propio na portada carnevalesca da contare anche in quarésema! Gavéa propio rason to nono te ’l dire che ’l gera un panpe.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Cantare per la vita
De solito se laora, se magna e se zerca de star ben par vìvare; anca in tenpi duri se fa de tuto par canpare el manco pezo. Servirse del canto par sostegnere l’idea che la vita xe on ben prezioso assè, el xe on gesto nobile e sociale
de Mario Klein
Da San Bonifacio (VR)
L’orto drio casa
Ma semo sicuri che convien fàrselo e che la verdura che se produse l’è biologica? Proè a no darghe gnente a le varie verdure che somenè e vedarì che bela roba che vien fora e che festa che fa pronòspara, osèi, bai e pioci co chelo che dovaressi magnar vualtri
de Enzo Coltro
|
