|
Da Maran Lagunare (UD)
El primo tòn
 | | Un stràe de tòn che ’l pareva domandà sol de esse ciapò… |
In t’i primi ani Sinquanta, savendo che gera più fàssile ciapà le sardele un giosso prima che fissi zorno, qualchi capobarca el preferiva calà la sacaleva verso l’alba e cussì, finìo de volegà e de ciò suso el pesse, serte volte ghe capiteva de trovasse a navigà col sol bel elto.
Le barche che le se zogheva el posto par vende el pesse in pescarìa, le gereva za stufe de sta ligàe al molo. Do barche le basteva e le vansèva par contentà i comercianti grossi e le done de via col pesse e cussì le altre sacaleve, anca la “Rosetta”, de me pare Doria, no le veva primura.
Quela volta no gereva la fàbrica del giasso e tocheva calcolà come tignì conto el pesse e anca se se podeva calà la sacaleva più bonora, se calcoleva de rivà giusti in paese, che la fussi verta, parché a le sardele ghe basteva un per de ore par ciapà na bruta siera.
Finìo de ciò suso el pesse, la “Rosetta” la gera ’pena montada insima la Tressa: granda squasi vinti milia quadrate, nassendo a quatro milia scarse fora de Grao, la se slarga fin t’i cunfini da la vecia Jugoslavia, par dopo ndà scorendo con pìicoli e grandi grumi de piere, grebini par zo, fin rivà a squasi tre milia de “Ponta Tajamento”, ’ndove che da diese metri, se riva de colpo a sédese-disissete.
Giogo pien de intrighi, arzila fossilizada e cape palustre: con buse de bianco e tòchi de erba gramegna, un paradiso sior de pissi: scàrpene, onbrine, sarachi, raze, dintici, astici e caniti palonbo. Un posto grando ’ndove che ’l pesse el podeva moltiplicasse e deventà grosso sensa paura, parché nissun pescaòr el veva ancora ristiò de calà la rete de posta sora la Tressa. Roba che ’mo scuminsiò a fà in t’i ani Sessanta-Setanta, ma sai pèso xe stò, ’ntel Setanta-Otanta, dopo inventò el turbosofiante: con elo ’mo tacò gratà par ciapà el dòndolo, le capesante e el fasolaro.
Con el turbosofiante e i ranpuni in puchi ani ’mo rangiò e ruvinò duto quel bel mondo ’ndove se nasèva bonodòr, savòr de vita, a somejansa del paradiso e… xe restò sol piere negre e spussa de marso.
La “Rosetta” la feva oto milia in navigassiòn e ’pena che i òmini i ga visto saltà el tòn, molada la sacaleva, curiusi i curi a prova pa vardà quel bendedìo. Quintài, tonelate de tòn le gereva vignùe parsora aqua a magnà le sardele e zogà de còresse drio: un stràe de pesse che ’l pareva domandà sol de esse ciapò.
Gera la prima volta che i pescaùri maranisi i vedeva na roba conpagna, parché i triestini, almoto, la veva vista prima, dal momento che ’pena rivada sul molo la “Rosetta”, i maranisi i ghe ga dito a i òmini de bordo che el “Tynnus”, na barca de tonera in Golfo de Trieste el zorno prima la veva ciapò tresento quintài de tòn. Spanta indrumàn la vose: le barche de Grado, Maran e Ciosa le se ga fato subito la “tonera”.
Tonera, na rete de sircuissiòn, inventada da i fenici, che i ga inmortalò sora na so palanca el pesse tòn. I primi a dopràla in Alto Adriatico xe stai i pescaùri dàlmati, che scanpài da la Jugoslavia, i xe rivài a Trieste ’ntel 1949, a bordo el pescheregio “Tynnus”. L’ano dopo, otignùi i cuntributi dal “Consorzio per la tutela della pesca”, i se miti a fa la prima tonera, i ga scuminsiò a pescà el tòn in Golfo de Trieste.
da Storia de òmini e del tòn
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Cantare per la vita
De solito se laora, se magna e se zerca de star ben par vìvare; anca in tenpi duri se fa de tuto par canpare el manco pezo. Servirse del canto par sostegnere l’idea che la vita xe on ben prezioso assè, el xe on gesto nobile e sociale
de Mario Klein
Da San Bonifacio (VR)
L’orto drio casa
Ma semo sicuri che convien fàrselo e che la verdura che se produse l’è biologica? Proè a no darghe gnente a le varie verdure che somenè e vedarì che bela roba che vien fora e che festa che fa pronòspara, osèi, bai e pioci co chelo che dovaressi magnar vualtri
de Enzo Coltro
|
