Da Isola Vicentina (VI)

Anca Isola ’nte ’a preistoria

El manifesto che atesta la scoperta epigrafica de Isola.

La xe stà proprio ’n avenimento stòrico sta scoperta; a no xe da tuti i dì tirar sù da soto tera na pria de tanti sècoi fà, co su scrito ’n po’ de ’a so storia. ’Lora, tornando indrìo ’tel tenpo, serchemo de saèrghene na s-cianta de pi.
Sirca diesemila ani fà, la nostra rejon veneta la jera ’ncora prijoniera rento na enorme grosta de giasso (Era Glaciale) ma pinpian, grassie a l’aiuto de ’n caldo e umido ventesèo, el giasso ga scumissià desfarse, provocando ’n cataclisma che ga roersà sotosora le montagne, canbiàndoghe parfin la facia a l’imensa pianura e fasendo sì che se formasse coline, lagheti e na distesa palude de sassi e paltan che faséa védare na desolassion che solo i raji del sole faséa ’ncora slúsare.
Xe passà i ani, xe passà i sècoli e soto ’a magia de ’a man del mistero xe sorta la vita, mace de fili de erba, maciuni de piantine carghe de foje e fiuri, e le montagnole xe deventà boscheti indóe ga catà rifujo animài come camossi, stanbechi e caprioli.
Anca de l’omo se ga visto ’e pèche, vestìo da ’e pèle de ’e bestie e cuerto da pene de grossi osèi, el se nutrìa de cacia e pesca, riparàndose da piova e fredo rento grote e caverne, movéndose co fadiga fra ’e tante insidie de cacia, lotando ogni dì par la sopravivensa.
E n’antra volta, pianelo, la nostra rejon veneta ga subìo na benèfica evolussion: da ’n caldo umido se xe passà a ’n caldo seco che ga fato vìvare mèjo l’omo e tuta ’a natura che lo sircondava.
A xe so sto periodo (6.000-3.000 a.C. – Neolitico) che, influensà da ’e culture orientali (Mesopotamia) che traverso la penisola balcànica e le coste mediteranee, l’omo conosse l’inzegno de novi modi de laorar la tera, semenando orzo, mejo e formento, fasendo pi dolse la storia e la vita.
A sto punto anca el modo de vìvare canbia; l’èssare umano no xe pi vagabondo, ma se unisse in grupi familiari drìo torenti e ’torno i laghi, costruisse capane de frasche, tegnù insieme da na spece de malta, paltan e paja, una tacà chealtra, fin a formare de i vilaji.

Ettorino Caldognetto a fianco del straordinario ritrovamento archeològico.

E qua me fermo, sperando de ’ver fato capire da ’ndove xe partìe ’e raise de i nostri antenà.
Fasendo ’n bel salto in ’vanti e pensando a come che jera sistemà la canpagna so i ani Sinquanta, ’pena finìa ’a guera, bisognarìa farse tanto de capèo ’vanti de sti brài contadini par tuto l’inzegno e ’a fadiga che i doprava pa’ laorar cossì ben la tera.
El rispeto che i ghea, unìndoghe anca tuta l’esperiensa aquisìa, gavéa ’l senso de ’a sacraità, ben saendo che da quel che daséa i canpi, dipendéa l’abondansa o la fame.
Ma da altri paisi foresti xe rivà, a deturpar la canpagna, camion, ruspe e scavaduri che, guidà da òmani, ga scumissià far busi fundi (par provinare la tera, diséa luri) inpiantando fornase, e i se ga messo scavar la tera crea par far cuarèi e quanto altro servìa a far sù case.
Gera el 1992 có, scavando la tera crea de ’n canpo so ’n posto ciamà Altura o Masieron, in via San Marco de Isola, insieme a palà de tera xe sortìo na prìa de gran inportansa archeologica, na “stele” co iscrission venetica e, par la prima volta co atestassion epigrafica, co ’l termine etnico veneto: “Venetkens”.
’Desso, sto reperto de enorme valore stòrico, xe conservà al Museo Naturalistico Archeologico de Vicensa, on reperto unico che ne porta a ’e raise de ’a parola “Veneto” e a le so lontane prime pèche.
Sto ritrovamento rinverdisse l’entusiasmo, aprofondindo la conossensa de i antichi Veneti, che ga vivesto so sta rejon fin dal IX sècolo a.C e che po’ i xe stà sorbìi pacificamente dal mondo romano, mantegnendo la so cultura, usi e costumi.
On popolo ativo so ’l comercio e i afari, che ga vudo interessanti scanbi co i Greci, i Etruschi e i Celti.
Na ultima ’notassion so ’l ritrovamento, dise che sto soporto lapìdeo, pol èssar datà fra ’l V e el VI secolo a.C. e le caraterìstiche che xe incise, le sugerisse na datassion insediativa paleoveneta ’tel teritorio visentin.
Ringrassio l’amico Ettorino Caldognetto, passionà de archeologia, par el so contributo a sto raconto.

[torna sopra]