|
Editoriale
Me piasarìa on’istà…
Chi xe che giorni fà no ga pensà “’desso ghe semo”, có xe rivà da le nostre parte l’anticiclon “Scipione” che ga conpagnà par man l’istà del 2012, vestìa de 34-40 gradi e on’afa da lassarghe le straze?
 | | Anca na partìa de boce… ne rafresca on poco e ne tira sù el morale! |
Sì, a jera on bel tòco che no se sentìa sta calura e subito ghe xe anca chi ghe n’à profità par so tornaconto, canbiàndoghe nome a l’anticiclone che in realtà se ciama Stefan, ma che el sito web ilmeteo.it ga fibià el nome de “Scipione” parché la trovata la ghe ’tira pi clienti de publicità.
Védito come che va le robe: se la nostra rivista, inveze de ciamarla col nome che la ga, la ghéssimo intitolà… Parole in cassaforte o Tacuìn sgionfo, forse gavarìssimo fato pi fortuna.
Comunque, sta ondata de caldo ch’i la ciama come ch’i vole, qua se boje e basta!
Se boje, se trìbola e se fa fadiga a adatarse a i canbiamenti del clima e del riscaldamento globale.
Però, oramai ghe semo drento, medigo che ne convien no agitarse pi de tanto e dire istesso come che ne piasarìa che la fusse sta istà…
Me piasarìa on’istà senza pi tende par i teremotati de l’Emilia-Romagna, senza pi che la tera trema e che le case le scurla, senza “esodati” e co manco disocupati, manco barufe politiche e scandali del calcio, manco teroristi nostrani e pi galantomi, manco corvi a l’onbra de la cùpola de San Piero e… manco notizie cative in television e su i giornài, come ga disposto la Cina, qua ultimamente, parché le pròvoca altro dano sol dano.
Me piasarìa che l’istà che vien ’vanti la servisse a recuperare on fià de otimismo. Xe normale sentire tuto el peso del tenpo difìssile che vivemo, ma no xe normale pensare solo a le dificoltà, a l’IMU, a le tasse, al prezo de la benzina, al costo de la vita… Bisogna che tornemo a sognare, a sperare, a credare, a rìdare, a gustare le robe sènplici come la feta de anguria magnà a l’onbra d’on moraro, la partìa a carte soto la pèrgola del Circolo Anziani, la letura de on bel libro che no ciapàvimo pi in man da na vita.
No stemo fermarse lì a darghe bado a le lamentele de turno: “gheto sentìo che candela?”, “speremo che se rafresca, senò oncò vien zo i rondenoti coti!”, “gheto scoltà le prevision del tenpo?”, “gài dito che ’l pol canbiare?”, “mi no me ricordo on’istà cussì balorda!”, “no ghè pi relijon gnanca là de sora!”, “ciò, gheto sentìo chel contadin de Vo’ che dopo la tenpestada l’è nà a domandarghe i dani al pàroco… parché el xe el rapresentante del Padreterno qua in tera!”, “va’ là, te la sé longa ti, caro!”, “beato ti che te vè in ferie d’inverno so la Costa Azura.”, “la tera te l’orto xe piena de crepi”, “se no la canbia a ghe lassemo le pene!” “a ghea da nare in montagna co me fiola ma s’à malà so madona: medigo che me toca desfare le valise…”, “speta desperarte: el primo dì che se va in montagna no se fa el formajo!”…
Co tuti sti discursi, che se pol sentire in sti giorni, ghe xe da insiminirse! Se te ghe badi a te vè via co la testa. Xe mèjo pensare a robe pi serie e – parché no? – anca a na partieta de boce so la sabia de Sotomarina prima che finissa la stajon.
Cussì me piasarìa che la fusse par tuti na istà che vaga via on poco de caldo, na istà inteligente, na istà che ne regala corajo, fiducia e responsabilità. Auguri!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Me piasarìa on’istà…
Chi xe che giorni fà no ga pensà “’desso ghe semo”, có xe rivà da le nostre parte l’anticiclon “Scipione” che ga conpagnà par man l’istà del 2012, vestìa de 34-40 gradi e on’afa da lassarghe le straze?
de Mario Klein
Da Belun
Don Bruno Bersaglio
de Luigina Tavi
Da Rovigo
Ricordi de scuola
de Gianni Sparapan
|
