|
Da i Coli Euganei
Na operassion picenina
 | | Gira de chì, gira de lì, el popà ga deciso de fermarse in te na ostariola… |
No se pol dire de serto che le robe no sia canbià dal tenpo che noantri fradèi da picenini semo deventà “grandi”. Sì, se pol dire canbià dal dì a la note, come se diseva alora. Me domando invesse, se podarà èssare inportante el raconto che so drio par fare, ma anca lì me rispondo che in fondo pol èssare curioso sentire la difarensa del vìvare de ancò da queo de ieri.
Pensàndoghe ben, in chei ani tanti tusiti, pì de ancò, i se dovéa operare le tonsile, ciamà alora tossìe. E on dì xe stà scoperto che sta roba, ’desso o dopo, la me sarìa tocà anca a mi. Gera senpre piena de rafredore e mal de gola, e de note faseva fadiga de respirare. Eco che alora el nostro dotore, che ’l se ciamava Carlo Muraro, el me gavéa mandà dal specialista a Padova.
Coriere ghi ne gera poche, e cussì on dì semo partìi par Padova in bicicreta. Me mama davanti e mi dedrìo col popà, sentà sol palo de la so bicicreta da omo. Rivà a Teolo, se ciapava la scursatoja che la ne faséa sparegnare strada, ma la obligava el popà a portare par on tòco la bicicreta su le spae, parché el trodo el gera bruto, pien de prie, de salti e de fossi. Ma passà sta preocupassion, eco che la strada gera bea larga e alora anca co pochìssime màchine.
Rivà a Padova mi gera tuta inpaurìa par la paura de i doturi e de sto anbiente foresto. Ma na bea signorina, la infermiera ca ricordo ancora, bionda e co on bel soriso, dopo averme consolà, la ne ga dito che se tratava de tossile infiamà e col tenpo se dovéa tirarle via. Eco la mama pronta a farme corajo e a dirme che la sarìa stà na roba da poco, na operassion picenina.
La bicicreta gera stà messa al “stalo”, on posto che adesso se ciamarìa magari “parcheggio”, e se ghemo messo a girare a piè par vardare le vetrine, ma pi che altro, in serca de na pìcola ostarìa par ’ndare a magnare qualcosa prima del ritorno.
Gira de chì, gira de lì, el popà ga deciso de fermarse in te na ostariola dove se gavemo sentà, metendo lì in parte la nostra borsa. Me ricordo che el popà ga ordinà on quartin de vin bianco e na minestrina, disendo: “Ne basta cussì.” On poco descondon, parché l’osto no vedesse, me mama tirava fora da la borsa soto el tavoin, le ciopete de pan caldo, apena conprà e on scartosso de fighi grossi, portà via da casa. I tinpi gera tristi, magari par tuti, e l’osto gavéa fato finta de no acòrzarse.
E dopo semo ripartìi verso casa co le nostre bicicrete. La mama coreva davanti, ’ndando in fuga, ridendo contenta e el popà el me diséa: “Varda to mama come che la fila, la crede de èssare Bartali o Cupi, te vedarè có la xe stufa, come ca ghe passemo davanti.” E la ’ndaséa proprio cussì. Ogni tanto se se fermava e i me jutava a saltare zo dal palo par sgranchirme le ganbe. E po’ via de corsa.
Ma a on bel punto xe vegnù ’vanti on tenporàe grande. Par fortuna che a na fermata se ga ciapà la coriera, cargando par dedrìo, in tel portabagài, le nostre bicicrete. “Chissà – se diséa ogni tanto – se a casa i sarà stà boni a tirar drento el formenton destirà sol sélese par solejarlo.” Sì, na volta a casa, tuto gera ’ndà ben.
E col passar del tenpo, gera rivà anca el dì de andare a cavarme le tossìe. E mi inpaurìa no voéa ’ndare. Tuti me diséa che la gera na operassion picenina, che no gavarìa sentìo gnente. La Lia, fiòa de la nostra maestra del paese, la me gavéa fato crédare che i me gavarìa dà on goto grando de roba bona, dolse, giassà come on gelato, da béare dopo. Ma la decision gera stà dura a rivare. Comunque i me ga convinto. Nessun me ga dito che prima de partire no dovéa magnare, e cussì mi, col pensiero, che dopo par qualche dì no sarìa stà bona de magnare, me son magnà na bea minestra e de scondon na patatona mèrica. E via senpre in bicicreta in tel paese poco distante, dove sarìa rivà da Padova, in te na casa privata, el chirurgo par cavarme le famose tossìe. El gera alto, co i oci celesti, ma no vojo gnanca ricordarme quanto gera grande la me paura. Fato sta che in presto l’operassion xe stà fata, ma ghe gera restà on tochetin de tossìa, e mi no voéa pi vèrzare la boca. In qualche maniera a la fine tuto gera ’ndà ben, e via sol palo de la bibicreta del popà, tuta roejà col siarpon de lana de la mama. No me ricordo in vita mia altri momenti de aver desiderà cussì tanto on leto par posare la testa. “Gheto mae?” diséa la mama o el popà, ogni tanto, ma mi rispondéa senpre de no, parché no i se preocupasse massa.
El dì dopo me gera sentìa proprio mae e co la freve alta. I ga ciamà la Gnese Osta, parona de casa e consiliera, che ne staseva arente e la ghea spaventà on poco tuti, disendo che forse l’operassion gera ’ndà mae e bisognava ciamare in pressa el dotore. Na volta rivà però, el ga rassicurà tuti, disendo che la gera na spece de indigestion, e el se gavéa convinto ancora di pi, quando gera vegnù fora el discorso de la patata mèrica che gavéa magnà, invesse de stare a digiuno. Dopo qualche dì tuto gera passà, e mi gera a le prese co i me zughi, ca coréa contenta su e zo par l’ara.
Có penso a ste robe adesso, no le me par gnanca vere. Go da confessare però na roba, che l’amor par le patate mèriche l’esiste ancora. Sì, anca ancò, se me cato davanti a na patata dolze de quee, anca s’a go finìo de magnare, no posso proprio lassarla lì, bisogna almanco ca la saja. On tenpo pianzéa parché voléa le pì grosse e me le scondéa da qualche parte. Capitava senpre qualcun che par scherso el la canbiava de posto. “Feto aposta” diséa la mama, “par far rabiare to sorea?” Cara la me granda mama, el me grande popà. Quanto ben i ne ga voesto, i ne ga insegnà, insucarando chel tenpo, che la povertà no la se sentìa come na roba inportante, parché la gera condìa e insucarà co l’amore vero.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Me piasarìa on’istà…
Chi xe che giorni fà no ga pensà “’desso ghe semo”, có xe rivà da le nostre parte l’anticiclon “Scipione” che ga conpagnà par man l’istà del 2012, vestìa de 34-40 gradi e on’afa da lassarghe le straze?
de Mario Klein
Da Belun
Don Bruno Bersaglio
de Luigina Tavi
Da Rovigo
Ricordi de scuola
de Gianni Sparapan
|
