|
Da Rovigo
Ricordi de scuola
In tuta la me cariera a go dà via solo du diese: on diese in Storia a Maurizio de Rovigo, che adesso l’è deventà on ingegnere de primo òrdene; on diese in Italian a Ilaria, na ragaza de Lusia, perfeta soto ogni punto de vista. E questo, de dare el màssimo de i voti ai so studenti, l’è na roba granda anca par nantri insegnanti, parchè i nostri studenti i fa parte de la nostra vita e de la nostra afermazion in canpo scolastico. L’è par questo che mi a go abu le me sodisfazion, anca grandi: da i periti de Adria e da i periti de Belun. Sta qua la jera na classe speciale: ragazi e ragaze, uno più bon de l’altro, uno più caro de l’altro.
A sò che in te sta classe de montagna, gnanca a farlo aposta, a ghe jera fiòi ca vegnéa da ogni parte del Belunese: Alpago, Nevegal, Zoldo, Sospirolo, San Vito, Perarolo, Trichiana, Mel, Auronzo, Pieve de Cadore, Longarone… parfin da Comelico Superiore, tacà al confine co l’Austria… Insuma, gnanca a farlo aposta, a ghe jera on ragazo o na ragaza ch’i vegnéa uno da on paese, uno da st’altro, co ore e ore de coriera par rivare puntuali a le oto de matina a scuola, e ore e ore par rivare casa, a le tre-quatro dopodisnà. E sicome che anca mi a jera distante da la me casa, fora dal me paese, a xe nato fra mi e luri come na specie de conplicità. A scumiziare dal regolamento. Se uno el rivava tardi, anca par colpa de la nieve, el perdéa la lezion. Ritardi, gnente. Andare a casa prima del tenpo, gnanca, a meno che no vegnesse i genituri a tòrse i fiòi. Ma i genituri i jera a laorare in Germania, a vèndare gelati. Gnissuna considerazion, da parte de qualche professore, che on ragazo el ghesse manco tenpo par studiare de quii ca stava in cità, e che a on bòto e mezo i jera a casa soa co i piè soto la tola, inveze che in coriera, pieni de fame e de sono. E qualchedun el jera senza mama, come Paolo de Zoldo, che ’l vivéa co so nona parchè so pare el laorava a l’èstaro, e che in tuti i temi el me scrivéa de so mama, che la ghea senpre in mente. E mi, anca se sto tema el jera pien de erori ca gridava vendeta, a go senpre dà on siè meno, par poderlo promuòvare anca lu.
E come pòssigna desmentegarme quelo ca me ga scrito in te on tema, Yorick de la Valbeluna, ca ghe jera morto so papà da siè misi? “A me metéa in zenocio par ore e ore in càmara mia – el ga scrito – e a pregavo el Signore che no ’l fesse morire me papà. E a go pregà tanto, ogni dì, par setimane. Ma el Signore no’l me ga scoltà.” E anca a Yorick a go dà la promozion, fregàndome de i so erori de gramàtica e sintassi.
La scuola la jera come na preson: a ghe jera le fotocàmare par i coridoi in modo che tuti i podesse védare chi ca ’ndava al gabineto. E po no ghe jera el servizio de chi ca vendeva i panini. E se uno no ’l se portava da casa el so panino par fare ricreazion, chel dì el restava senza magnare. E anca se i podeva magnare, i podeva farlo solo in cortile, no in classe, parchè par na frégoa in tera, i bidèi i ’ndava dal prèside a protestare ca ghe tocava spazare i paviminti. E dònca se i fiòi i ghea da fare on cònpito, par tuta la durata de sto cònpito, no i podéa magnare, né fuora né drento. Ma co mi, le robe le xe canbià, e co na sodisfazion ca no ve digo, a go infranto tuti i regolaminti de la scuola. Intanto, el magnare. La me aula la vardava so la strada e de là a ghe jera on “supermercato”. E alora mi, in te la me ora lìbara, a ’ndavo a farme spesa. Ma quando ca ghe ’ndavo, a ghea senpre qualche fioleto senza panino che ’l me domandava se par carità a ghe ne conprava uno. Roba ca go senpre fato volentiera, ma cussì volentiera che no passava dì che ora uno ora st’altro no ’l me domandasse de conprarghe el magnare. E quando ch’i ghea el cònpito, no i xe mai stà senza magnare.
“Chi ca magnarìa on trancio de piza calda?” – a ghe diséa, a l’inproviso. E alora a te vidivi alzarse teste e brazi, co i oci e la boca spalancà da la contenteza. E dopo, co on salto a jera in te ’l reparto del pan e la botegara, che la jera za d’acordo co mi, la tacava subito a servirme, disendo a i clienti ca la jera par i scolari ca ghea fame.
E na olta in classe, a li catavo tuti prunti, co on tovajolo de carta destirà sol banco. “A la prima frégoa ca casca in tera, a ve stranbèo!” E cussì gnissun bidèo no ’l ga mai abù gnente da dire o da cuntare al preside. E a turno de du-tri par olta, mi a li invitavo a disnare in casa mia, tanto mi a jera da mi-mi solo, e luri i me faséa conpagnìa. E cussì inveze de magnare panini in coriera, i catava i spaghiti al ragù de salame col peperoncino, e na spadelà de sardèe frite ch’i no i ghea mai magnà in vita. E dopo a li conpagnavo a casa in màchina, vardando insieme co luri l’Antelao o el Pelmo o le Marmarole. E cussì a xe ’ndà le robe che a fine de l’ano scolàstico, a jèrino deventà amighi. E quando ca go abù el trasferimento, la xe stà na tristeza par mi e par luri. La Martina, che la jera la capoclasse, la se ga alza in piè, l’ultimo dì de scola, e a nome de tuti i so conpagni, la me ga dito grazie e che la gavarìa conservà el me ricordo par senpre. E mi, i me ga trasferìo a i periti de Adria. Ma na matina de la primavera dopo, passando par Belun, a me xe vegnù vuòja de ’ndare a saludare la me scolaresca.
El caso el ga volesto che ’l professore de dirito el tegnesse lezion co la porta vèrta. E cussì mi a no go abù bisogno de bussare. ’Pena ca me so presentà so la porta, a se ga visto tuti sti putèi e putèle alzarse in piè a boca vèrta e co i oci spalancà da la sorpresa e tuti sti oci, ma proprio tuti, i slusegava. E mi a go vèrto la boca par dirghe ciao, ma da la me gola no xe vignù fora gnanca na parola, par quanto ca me sforzasse. Gnissun no ga dito gnente, né mi e né luri. Solo Igor de Perarolo el me ga fato de ocieto, soridéndome, da l’ultimo posto. E alora a so ’ndà via che ’l me colega de dirito, conpagnàndome in sala professuri, el me ga dito ca se sentiva l’emozion tajarse a fete. E po’ el me ga dito de ritornare a saludarli ancora; ma mi a ne ghe so’ più ’ndà. E più no go rivisto i me scolari de Belun.
Ma na olta, passando da Forno a Zoldo, a me fermo on fià e a vegno fora da la màchina par fumare. E a sento na frenà de màchina. El xe on giovanoto che ’l gavarà poco più de vint’ani. El vien verso de mi e po’ el me saluda: “A go visto na màchina targà Rovigo – el me ga dito – E alora a go pensà se’l podeva èssare lu. E difati el xe lu!” – el me dise butàndome i brazi al colo. “E ti a te si Paolo R…!” a ghe digo, ricanbiando. E dopo a se femo altre domande: “Come stala la Martina? Come valo Yorick? e Igor, stalo ben? E Michele de Comelico? E la Katiana de Longaron?...” E po’ a se saludemo e lu el parte par la so strada. Rivà a Villa de Zoldo, propio in mezo a l’incrocio, a ghè ancora Paolo, in piè, rente la so màchina. A me fermo: “No te va mina a laorare?” a ghe digo. “A so’ stà chì aposta a spetarlo – el me ga risposto – A lo saeva che prima o dopo el sarìa passà par de qua. A voleva védarlo nantra olta!”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Me piasarìa on’istà…
Chi xe che giorni fà no ga pensà “’desso ghe semo”, có xe rivà da le nostre parte l’anticiclon “Scipione” che ga conpagnà par man l’istà del 2012, vestìa de 34-40 gradi e on’afa da lassarghe le straze?
de Mario Klein
Da Belun
Don Bruno Bersaglio
de Luigina Tavi
Da Rovigo
Ricordi de scuola
de Gianni Sparapan
|
