Da la Lessinia Centrale (VR)

El pi bel senter del mondo

Lì, subito a sanca, ghéra e ghè ’ncora de le grote…

Coando mi éro ’n buteleto ghe domandàa a me bupà: “Bupà, èlo vèra che ’l senter che và dal Maca, l’è ’l pi bel senter del mondo?” E lu el se metéa a rìdere e ’l me rispondéa: “Eh, nò! Nel mondo ghè de i senteri pi bei. Mi da soldà do isto tanti de bèi, ma se a ti el te par el pi belo del mondo, anca mì, digo che l’è belo assè!” Cossì, a mi me restàa la convinsion che el senter che va dal Maca l’è ’n gran bel senter.
Da bracotiel, passàa tanto del me tenpo lìbero, a córere su e zo par i senteri. Me godéa córere de corsa là ’ndó i éra streti e pericolosi. A ogni tenpo de l’ano ghéra su ogni senter le novità. Nìi e fiori ne le primavere, mòre e fighi salveghi ne i mesi de l’istà. Castagne e fonghi de autuno. Ranpónsoli e radicèle ne i mesi de l’inverno. Ma, el senter pi belo l’éra coel che ’l porta dal Maca!
El Maca, l’è ’n posto drito de là de Lumiago, la contrà ’ndó stao mi e de meso ghè ’l Vajo del Paradiso, vajo che taja Sago da Rosaro, l’è ’n vajo fondo e par nar de là ghéra, fin ne i ani Sessanta, tri senteri, ma ’l pi belo l’éra l’ultimo nando ’n sù. ’Sto senter ’l ’ndàa ’ia coasi piano. ’Pena te lo ciapài, se passàa fra sassi anca grossi, con de i scalini mal fati e lì subito a sanca, ghéra e ghè ’ncora, de le grote. ’Ste grote alte e mia tute stesse le fa de i cóali, alti a l’inissio e ’ndando avanti i se fa senpre pi bassi; i è larghi tri, coatro metri e par i buteleti, i è come la fine del mondo par la belessa e la fantasia che i te mete ’n moto. Seitando avanti par el senter che ’l va al tramontan, dopo i sassi e i scalini mal fati, el va ’ia piano nel bosco.

Minatori che i cavàa ’l carbon zo nel vajo.

El bosco el ga la legna alta e fra la legna, ’ndó l’è ciara, da la parte de sora, alti se vede cóali grandi e cóali pìcoli. Se vede sénge de color rosa e sénge de color bianco. Dopo dosento metri te cati ’n vajeto e par passarlo se pesta su de i sassi grossi che ghè nel meso. A periodi, nel vajeto core de l’aqua. Passà el vajeto te giri al solìo, e se va atorno a ’n montesel e senpre piano el ghe fa ’l giro atorno. Lì te si fra senge e cóali, fra sbari de legna e tòchi de vegro. Coando te torni al tramontan, el senter el se sbassa proprio ’ndó te cati ’n par de grandi castagnari. ’N fondo a na pìcola dissesa, ghè ’n vajo largo, con sassi grossi piantè ’n meso, par poder passar. Sora lì, goardando alto, verso sera, se vede la sengia del mesodì. L’è la sengia che, par ci vive da la parte de Sago e de Lumiago, la ne segna coando l’è mezodì. Se ghè ’l sol, su coela sengia lì, l’onbrìa a mesodì giusto la coèrse tuta la sengia. Ma se pol regolarse anca par le ore, conossendo come l’è l’onbrìa a le nove, a le diese, a le óndese. L’è da tuti ciamà: “La Sengia del Mesodì”, ma l’è anca ciamà: “La Sengia del Brossial”, parché coando el pióe tanto e core i vai, lì ven zo ’n vajo de aqua, fasendo, senpre lì, na cascata bela da védare anca da distante e tuti disemo: “L’à pioù tanto, parché core el Brossial!” Da lì, ’l senter el torna al solìo e da lì se va, pian pian, alsàndose verso el Maca. Là ghè na casa sola che se ciama Magnavacca, ma par tuti l’è “Maca”. Par tanti posto, ’ndó se cavàa el sasso rosso, el “Rosso Verona” e coando mi éro ’n buteleto vedéa da coel senter lì passar i minatori, coéi che laoràa ne le cave e ’n po’ prima de mesodì, se vedéa done o buteleti che ghe portàa da magnar a ci laoràa ne le cave. Calche òlta ghe son ’ndà anca mi, con calche buteleto che ’l ghe portàa a so bupà la minestra calda a mesodì.
Mi me godéa assè a nar a vedere le cave, coando ghéra i operai che cavàa. Ghéra i caretéri con i cavài che i cargàa i sassi e i é menàa a Grezzana. I ghéa de coéi cavài grandi e de coéi careti alti! Da coel senter lì, coando se éra dal Maca, se ciapàa la strada che va a Gressana o che vaà a Rosaro. Dal Maca a Gressana ghéra tute cave; i cavàa: el Bianco, el Rosso Verona, el Verdelo, el Rosa, el Gialo; i cavàa blochi de marmo o sassi da masenar o da far muri. Noantri buteleti, a la festa, ne piaséa nar de là del vajo e senpre par ’ndar là, ciapàimo el senter del Maca. Tornando ’ndrìo, ciapàimo el senter de meso. Coel de meso, che i ghe ciamàa anca “el senter del Calandra”, parché el portàa davanti a la casa che se ciama Calandra. Coel el naséa zo drito nel vajo e su drito da l’altra parte. L’éra bruto e tuto ’n rìa. Ma zo nel vajo, a drita e a sanca de coel senter lì, ghéra le miniere del carbon. Miniere abandonè da i primi ani dopo la goera, parché lì, i dise: “El carbon del Vajo del Paradiso l’è strasso e i le cava solo coando ghè le goere e no’ se de cata ’n giro de mèjo!”
Par noantri buteleti, le miniere abandonè, l’éra ’l massimo che se podéa ’érghe par passar ’n par de ore e gòdarse, rento e fora da ’sti busi pieni de poce de aqua e de sìvoli fati de giareta, ’ndó i butàa i scarti. Ma pi de tuto sercàimo senpre el tubo de aqua che passa proprio ’ndó el senter el traversàa ’n vajo. Lì passa ’n tubo de l’aquedoto, nel tubo ghè ’n buso e infilà nel buso, ghè ’n legneto. Cavando el legneto ven fora ’n pissaroto de aqua e se pol béare, lavarse, zugar, spiansarse e far tuto coel che i bociasse i sa ’nventarse. Lì, scominsia e fenisse el Vajo del Paradiso. Lì ’ndó ghè le miniere, parte sincoe, sié senteri che i porta ne i paesi o ne le contrè che ghè de coà e de là de l’Alta Valpantena. Da buteleto i conosséa tuti come conosséa le me scarsele. Adesso, credo che senteri verti ghe ne sia solo ’n paro.

[torna sopra]