|
Editoriale
A ghè poco da scherzare!
A xe propio da pregare Dio de star ben e de no ’ver mai bisogno de dover tòre medizine par guarire, parché el pi de le volte le te fa ben da na parte e le te ’sassina da chel’altra
Savemo tuti che quando no te stè ben no se pole curarse da soli, bisogna ’ndare dal dotore, anca parché, poareto, anca lu el ga da vìvare… Xe fadiga che el dotore te diga: “Va là, caro, no te ghè gnente… no sta’ badarghe par on poco de male… a se rinforza i òrgani… te vedarè che te passa!” Che dotore sarésselo se no ’l te ordinesse calcossa che te cava el dolore a le spale, a i brazi che pare che on can el te magna se te ghè da ligarte le scarpe o da tirar zo el bussoloto del cafè da la scanzìa de la cusina.
E va ben: tolemo anca sta medizina… No te lo fè con piena convinzion che la te cava el male: te lo fè co la speranza che te gabi torto e che quelo che te ga ordinà el dotore el sia necessario par rimétare a posto i ossi, come che i jera prima che te rivesse chela carga de dolori che t’à invalidà.
A semo distanti ormai… ani luce da quando che na bronchite, on rafredore, on mal de panza, on mal de rece, na bòta te on zenocio, na spanzà de zarese o de àmoli crui, na sumanza de paste ingiutìe el dì de la Crésema… tuto quanto vegnéa curà co na onza de ojo de rìzino... Altri tenpi, altre cure soministrà da to mama, magari dopo ’vere consultà anca el mèdego. ’Lora no ghe jera tuta sta assistenza sanitaria de oncò, cussì altamente specializà, co tuta sta selta de medizine… de Fascia A, de Fascia C, de “banco”, de sotobanco… Una o do onze de ojo e vai… che te guarissi, sì!
Xe canbià tuto: ghe vole el so medicinale. E ’lora, par qualche dì, te stè ’tento de tòre la pastilia al momento giusto, quela a stómego vodo… po’ dopo quela a stómego pien… Ma propio quando che te pare che la taca a nare mejeto, eco che salta fora altre magagne che no te capissi da dove che le vègna. Có se ga sfantà na s-cianta el giramento… de testa, te zerchi de rajonare, te ciapi in man la scatola de la medizina, te tiri fora chela cartina che conpagna senpre le pìrole e te te inbati a lèzare, inforcà du pari de ociài, quelo che xe scrito in picenin verso la fine: EFFETTI INDESIDERATI.
Te lezi, capendo gran poco, anca parché ormai a te si on paziente… par gnente paziente:
In corso di terapia possono manifestarsi alcuni tra i seguenti effetti:
- alterazioni del bilancio idro-elettrolitico che, in pazienti particolarmente predisposti, possono portare all’ipertensione e alla insufficienza cardiaca congestizia;
- alterazioni muscoloscheletriche, quali osteoporosi, fragilità ossea, miopatie;
- complicazioni a carico dell’apparato gastro-intestinale, che possono arrivare fino alla comparsa o all’attivazione di ulcera peptica;
- alterazioni neurologiche quali vertigini, cefalea e aumento della pressione endocranica;
- interferenza con la funzionalità dell’asse ipofisi-surrene, specie in momenti di stress; alterazioni della funzionalità endocrina, quali irregolarità mestruali, modificazioni della fisionomia (“faccia di luna”), possibile manifestazione di diabete mellito latente, nonché aumentata necessità di farmaci antidiabetici;
- complicazioni di natura oculistica, quali cataratta posteriore sub-capsulare ed aumentata pressione endooculare;
- negativizzazione del bilancio dell’azoto.
È opportuno comunicare al medico curante altri effetti indesiderati, non compresi nel presente foglio illustrativo.
Ghe n’ò che basta, ghe molo de lèzare, parché me gira la testa e anca… i oci. Me son reso conto che co le medizine a ghè poco da scherzare e decido de jutarme… in alternativa, co qualche Ave Maria in più!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
A ghè poco da scherzare!
A xe propio da pregare Dio de star ben e de no ’ver mai bisogno de dover tòre medizine par guarire, parché el pi de le volte le te fa ben da na parte e le te ’sassina da chel’altra
de Mario Klein
|
