Da Maran Lagunare (UD)

La storia de Gigeto

Montài in treno, semo rivài a Roterdam…

Vinti ani, cavì lunghi, un capelòn e un grando amor par la ghitara, Gigeto co el conta le robe par de vìvele conpagno che le ga viveste elo, e ’pena che ’l ga scuminsiò a contà la roba tocada a elo ’nt’i ani Sessanta, muminti de la rivolussiòn cultural, protesta studentesca e de siòperi, son stò a sintilo con la boca spalancada: no credevo che ’l fussi scanpò in Olanda posta scapolà el militar.
<> el ga scuminsiò. < Me fidevo de me cusin Bepi, anca parché elo el gera za stò in Olanda. El veva dito che gera un paese ’mancipò, che i zùvini i gera liberi e cussì, montài in treno semo partì. Rivài a Roterdam, trovò l’albergo “Stella Maris” che ’l cognosseva, veva dito elo, dopo tre zurni che serchévomo lavor, fruài i schei, ne ga tochesto lassalo e trovasse na sistemassiòn manco cara. Zira zira ’mo trovò un casamento grando ’ndove che steva quìi come nantre. Gerévomo tante rasse: taliani de su e de zò, turchi, slavi e africani. Drento se févomo de magnà e durmìvomo sora le brande a castel.
Ogni matina ’ndévomo in stassiòn e là spetévomo de vignì insielti da serti caporài che dopo i ne porteva sul giogo de lavor. Mi e me cusìn Bepi i ne veva metùo con na squadra che la neteva le sintine de le petroliere. Ogni matina un pulmin el ne meneva ’ntel porto, e dopo oto ore, finìo de lavorà i ne pagheva indruman. ’Ntel casamento là che bitévomo se zogheva a carte de schèi. Na sera, dopo vè perso duti i schei, vevo fato pa ’ndà a durmì co gera tornài i operai del turno dopo del nostro, ghe ne mancheva quatro: inpissando la sigareta i gera saltài par aria. Fumevo anca mi, ma no credevo che fussi cussì piricoloso fumà… La vemo scapolada.

Vedévomo sol che pomodori: na roba mai vista..

Sul doman mi e me cusin vemo ganbiò squadra e lavor. Montài sora un camiòn, che invissi de ciapà la strada pa el porto el ne veva menò fora cità. Co dopo mesa ora gerévomo smontài, davanti vedévomo sol che sere: cultivassiòn de pomodori e verdure de ogni genere, na roba mai vista. Cassàe in man le seste ’mo lavorò dute le ore con la schena sbassada a ciò suso pomodori. Févomo na vita de stiavi, ma almanco ciapèvomo de magnà, parché in dicenbre gera rivò el pèso: no vévomo più lavor e fin genaio no ’l sarissi rivò. Finìi i schèi ne ga tochesto ’ndà pa le strade, vardà par tera e tirà i oci pa vede de trovà qualchi schèo. Trovévomo qualcosa, ma puchi, e in quìi zurni ’mo magnò sol margarina con el pan scaldò su la grilia de la stufeta elètrica. La visilia de Nadal, insieme a un roman e me cusìn semo ’ndài a spasso pa Roterdam. Davanti na missiòn, vedendo tanta zente entrà, se ’mo ficò in meso la cunfusiòn.
Drento ’mo trovò posto e ’pena sentài, causa la fame, no vedévomo gnanca le bele fiole che le passeva con le seste pa paracià le tole: el pan drento el ne veva robò i oci. ’Ntel mentre che ’l missionario el parleva, el ne feva capì i valuri de la Nativitàe, nantre pissighévomo el pan. Finìa la prèdica vemo scuminsiò a magnà. “Fame! Ahhh!!” fa na vose dadrìo dopo che la ne veva pusò le man sora le spale. Gera el missionario che veva parlò e ciapò posto in meso de nantre, ciamada na fiola el ghe veva dito de portà altre paste e ciocolata calda. Magnò e bevùo, ringrassiò el missionario, prometendo che sarìssimo tornài, semo ’ndài fora. Na volta in strada ’mo trovò un gropo de zùvini olandisi. I gera in diese e duti bei tòchi, e con luri gera anca fiole. Passài in meso go sintùo porconà. Me son zirò e go visto el roman par tera; i ghe veva fato ganbeta. Almoto, no i vedeva l’ora de sbrocasse con nantre taliani pa ’l discorso che quìi de la Bassa i ’ndeva con le fiolete e qualchi volta le inpigniva. Pa parasse parché i gera in tanti, l’amigo roman el veva tirò fora el cortel, ma lo veva perso subito e lo veva ciolto in man un de luri; le fiole le se veva messo a sigà e pianse, mancomàl!! Go inamente che quela sera ne vévomo ciapàe tante… Tante che semo stai serài a casa dute le feste e spetà che ne fussi ’ndài via i signi, prima de vignì fora la porta>> ga finìo de contà Gigeto, disendo che la storia la cuntinueva.

[torna sopra]