|
Da Lendinara (RO)
Scherzar co’ i fanti
 | | Lo ga dito anca el nono: – Mai stimarse massa e speciarse senza vestiti indosso!... (Edgar Degas, La famiglia Belelli) |
“Scherza co ’i fanti e ’assa stare i santi!” Sto dìto el xe deventà famoso grazie a Puccini che, intel primo ato de la Tosca, el lo ga messo in boca al sagrestan ca brontolava contro el Cavalier Mario Cavaradossi.
Quante volte, fin da putìni, gavemo sentìo ripètere ste parole soratuto da i nostri veci quando che qualcuno, par rìdare, el faseva el burlon sora robe de fede o religion. Difati, par la magioranza de la zente, in special modo quela de canpagna, el “timor de Dio” jera ’na regola de vita; tuto quelo ca vegneva zò dal zielo, cussì inportante par i canpi e le coltivazion, el jera mandà dal Signore e quando qualcosa no ’ndava par el verso giusto voleva dire che el diavolo el gaveva messo el zatin. Par la Cesa e i preti ghe jera quasi più pecati che ati e anca el diavolo, de rifa o de rafa, el saltava senpre fora, menzionà come l’orco e l’omo nero, pronto a far cascare tuti in tentazion. Tante volte quelo ca no’ se faseva par amore el se faseva par forza o mèjo par paura e intanto i putini i stava on fià più boni ma anca i grandi, anca se no’ i ghe credeva del tuto, i jera trategnù da qualche dubio.
Quando ca se ligàvino ’na traversa in testa, fasendo finta da èssare suore o se inpiràvino i camisoti da frate col cordon de spago, o, pezo ’ncora, fasévimo la Comunion smaniosi da provare l’emozion de ricévare Gesù intel nostro cuore, visto ca jèrimo ’ncora pìcoli, soratuto me nona la ne ripeteva el dìto “Scherza co ’i fanti e ’assa stare i santi!” La ’ndava avanti e indrìo da la cusina, scandalizà come el sagrestan de la cesa de S. Andrea de la Valle a Roma, sugando sculieri, cortèi, pironi e cazuoli.
A chel tenpo a me piaseva tanto la brìscola ma chel’altra nona ca stava in canpagna la diseva che le carte le xe del diavolo, cussì a zugavo co me nono de scondon finch’a la ’ndava a ’fetarghe le ontrighe par ànare e faraone. A scuola e a dotrina i ne contava tante bele storie de la vita de i santi; i più nominà i jera queli ca gaveva patìo de più e le suore, visto che purtropo no’ sarìssimo mai stà gnanca come el più scarso de lori, le ne diseva da fare almanco i fioreti: do, tre, anca diese al giorno s’a ghe riussìvino. Par fortuna, qualcuno in fameja ogni tanto se sfogava, bacajando che i santi i sta in zièlo e ’lora qualche volta a la passàvino lissia.
Par noaltre putìne, stimarse massa jera pecato, ma su ’na roba bisognava stare atente: mai speciarse senza vestiti indosso, parché a se vedeva el diavolo, parola de Madre superiora. Mi no’ me sognavo gnanca da farlo, a gavevo massa paura de sto personagio co ’l forcon e la coa come ’na frecia, e cussì ’na sera a me n’è capità una bela. A gavarò ’vù oto ani, de preciso no me ricordo, son ’ndà a farme el bagno ma l’unico sugaman el jera tuto mojo, ’pena stà doparà da chi ca me gaveva precedù. Capitava, essendo in tanti. Alora son ’ndà fóra da la vasca, go fato on bel tòco de coridojo e son rivà in càmara de me mama. I sugamani i jera intel armaron che ’l gaveva on gran specio in mezo. A go sarà i oci e a palpeto a zercavo de brincàrghene uno a caso, ma no ghe jera verso, ora tastavo na camisa, ora on majon, on nizolo o ’na foreta. Intanto sgiozolavo par tera piena de fredo, ma no’ gavevo corajo da spionare par paura da védare el diavolo inte la me persona. No sò quanto ca go messo, de sicuro senpre massa, fatostà ca go vardà prima co ’na sfeseta de l’ocio, e on fià a la volta co’ tuti do e go trova chel benedeto sugaman. A me pareva fin inpossìbile da non védare nessun diavolo, e se da ’na parte la xe stà ’na liberazion da chel’altra a me sentivo buzarà da la suora, che, poareta, zerti insegnamenti la doveva inculcàrneli par contrato. Ma no’ xe zerto questi i “traumi infantili”; da grandi se cata el senso de tute le robe che no’ le xe mai solo bianche, nere o rosse e se ghe scherza sora, senza ofèndare nessun santo. E po’ el diavolo el fa parte de la vita, come tuto el resto, bisogna ciaparlo par quelo che l’è senza darghe massa sodisfazion. Tanti ani fà, al supermecato co’ me fiola a go conprà ’na pegnata. La me ga domandà parché no’ conpravo anca el cuercio e mi go risposto che no ’l ghe jera, che no’ i lo gaveva fato. E ela: “Ma allora quella è una pentola del diavolo, non prenderla mamma!” Visto che anca senza parlàrghene el salta senpre fóra?
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
A ghè poco da scherzare!
A xe propio da pregare Dio de star ben e de no ’ver mai bisogno de dover tòre medizine par guarire, parché el pi de le volte le te fa ben da na parte e le te ’sassina da chel’altra
de Mario Klein
|
