Dal Basso Piave (VE)

Frammenti cismonesi

Me fa piaçer riprèndar contato co ELVIO BERALDIN, lezendo le so “cronistorie senza pretese”, come usa scrivar, “… al mio paese abbiamo ricordi perché abbiamo memoria”.
El so libro, Frammenti cismonesi (ultima creassion 2012), tipico diario rico de momenti particoearmente interessanti, de crudo realismo, che rapresenta un quadro storico-anbiental come continuassion de “La chiesetta al Col del Broco” (senpre del stesso autor), che ò comentà su Q.C. nel marzo 2007.
Gnente trace de feste, sagre o svaghi se trova da quée bande, ma riferimenti significativi de usanse e sìnboi de ’a memoria. Storie dure come i sassi, riprese sfoliando pagine da i veci boetini de i preti de Cismon, che no à mai desmentegà de èssar fiòi de montanari, riciamàndose a la trista realtà de mancansa de lavoro e dando risalto a la gran emigrassion, tanto che la paròea esodo vien riportada dal cronista de “L’Eco del Pedancino” par contar la so gran dimension. Se trata de ricordi, raconti de vite difìçii, sènplici memorie de povertà, de emigrassion e profughi de guera, anca personài de E. Beraldin, che messi insieme, riscopre e ricostruisse la memoria de un paese, de na comunità. Tanti riferimenti, l’autor li riprende anca da “Il Risorgimento”, testata che nasse a i primi del 1919 come “Organo dell’Unione Profughi 7 Comuni, Valdastico e Brenta”, che trova in don Giuseppe Rebeschini, prete padovano, originario de l’Altopiano, l’ideator e so diretor. Cessa le publicassion nel Diçenbre 1922.
Elvio Beraldin à titolà Frammenti cismonesi come modesto lavoro de ricusidura del passato… metendo insieme brevi artìcoi da pagine che “LA GUSELLA”, nel tentativo de lassar (durante el so longo camin de cultura): ricordi, storie de vita vissùa, amori e sacrifici par quanti ne seguirà… “I poeti scrivono in rima, gli scrittori raccontano, i giornalisti fanno cronaca; io, ho messo assieme queste pagine di ricordi e nostalgia.”
La narativa de l’Autor score agevolmente fra l’acavaearse de storie, similmente a ’e aque torentissie che score fra sassi e crode, brianti de riflessi solari, fresca de umori che rende godìbile ’a letura. Sfila come tinbri che scandisse passagi significativi de storie, raconti, poesie a firma de persone autorévoi par fama, e de altre come protagoniste direte de situassion subìe o soportàe fin al sacrificio, come altre lodevoli par testimoniansa de streto patriotismo e de fedeltà al legame sentimental co Cismon.
Spigoeando fra i capitoi del libro. Eco CISMON: “Luoghi e storie di minatori, storie di emigrazione, di profughi in terre lontane; storie nostre passate. Nostalgie vissute con la speranza del ritorno..” “… Vita e storia da ricordare per rendere partecipi le generazioni che non hanno conosciuto emigrazione e sacrifici.”
Eco un stralcio forte e significativo ricavà da na poesia de ELDA VANIN, dedicada co amor a Cismon. “CISMON, la tua storia è scritta sui sassi. / Sassi che parlano con il vento / che hanno respirato, gioie, fatiche, dolori. / Sassi consumati dal lavoro e dal sudore di povere genti. / Sassi che assimilano i profumi della gioventù, i respiri stanchi e affaticati dei vecchi. / Sassi, sassi, custodia preziosa di vita passata, di albe e tramonti. / Di lunghi silenzi, / e in questi silenzi che piano, piano chi ascolta, sente il vostro respiro. / Sì, perché non siete dei comuni sassi. / Siete la vita e la storia di CISMON.”
Le storie che el maestro CARLO ROMIO riporta ne ’a forma pi cruda e veritiera come fedel interprete o mèjo, cantore de le esperienze de vita propie e de Cismon, costituisse un monito: per ricordare… per riflettere.
Ancora, a proposito de emigrassion. Tanti i messagi de conforto e sostegno ne ’e pagine de corispondensa da i boetini parochiài co i cismonesi in giro pa ’l mondo. E sia permesso al scrivente de ricordar che Quatro Ciàcoe riporta ne ’a prima pagina ’a corispondensa co i nostri emigranti nel mondo. Un bel modo par tigner in caldo afeti e ricordi.
La montagna. Storie sènplici de curiosità e lontani ricordi. Come quea de ’a prof.ssa BONATO, in quanto insegnante de matematica de i fiòi de Elvio nel quartier padovano “Valsugana” de Padova, quando scopre l’èssar originario de Cismon. La prof. riciama infantìi ricordi ligài al so papà, de Campolongo, che ’l vea insegnà presso le scuòe del “Col del Broco”, rivedendo ’e foto da maestro fra persone e loghi da éa mai visitài o conossùi, ma sol che par ’ver sentìo parlarne. Quei che i nevodi de ’a prof. à provà a visitar, come a voér coegar el quartier Valsugana a na montagna e a na vale de lontani ricordi.
E ancora, da ’a sinpàtica létera a ”LA GUSELLA”, scrita da ALICE BERALDIN (nevoda de E.B.) sul tema scoeastico La condizione della donna, intervistando la cismonese ERNESTA FIORESE, caturada da le SS, tradota in canpi de concentramento e de lavoro forzato: m a i t r a d ì o. Tornada distruta, perso el pare, el fioeto lassà a un ano che no la riconosseva più, sensa saver gnente de i fradèi partigiani. Testimonianza che racontada a le prof. da Alice le à fortemente inpressionàe. Ma storie come quea triboeada da Ernesta ghe n’è tante e ancora inascoltàe.
Par finir, se raconta che su ’e montagne sia senpre stà costruìe cesete e capitèi. Ne la ceseta de “Col del Broco”, (ogeto de altro libro de E.B.) ne l’intenzion de dar visibiità permanente a quanti s’à sacrificà par costruirla, sta na targa co scrito: “per ricordare ”.

[torna sopra]