Zente de Padova

Giammaria Mosca dito “il Padovano”

Testa di San Giovanni Battista giovane, scultura in marmo: cm. 15 x 15.5 x 40.

Sto artista, sto scultore, nato a Padova fra el 1495 e el 1499, xe passà a la storia, a la storia de l’arte, co diversi nomi. El xe sta ciamà Giammaria, Gianmaria, Giovanni Maria, Zuan Maria, ma senpre Mosca e col soranome “il Padovano”. So pare fazeva el “burchiero” e el vegneva da fameja originaria da Conza. Sta località no se ga mai savudo dove che la fusse tirà, qua in Italia.
Ghemo dito che el xe nato a Padova e qua el viveva co so pare in contrada S. Michele.
Nel 1507 el xe stà messo a botega del scultore Giovanni Minelli e de so fiolo Antonio fin al 1512 quando che el xe ’ndà par el so ultimo ano de aprendistato ne la botega de l’orefice Bartolomeo di Giacomo Mantello.
El so primo lavoro autonomo xe co tuta probabilità la “Decollazione del Battista”, rilievo bronzeo ordinà da la Confraternita de S. Giovanni Battista par l’esterno del batistero de la Catedrale padovana, che però ’desso el xe ne la sagrestia nord de la cesa. Marcantonio Michiel, letarato e colessionista d’arte vissudo ne la stessa epoca, ga lassà scrito che el ga visto in casa de Guido Lizzaro, che ’l gheva fuso el rilievo bronzeo dito prima, altri cinque modeli in teracota del Mosca, tra i quali un “Giudizio di Salomone” e un “Miracolo di S. Antonio”.

Altre òpere de Giammaria Mosca, dito “il Padovano”.

Ste do òpare le xe stà individuà in do corispondenti in marmo: el primo, realizà fra el 1521 e el 1528 el se trova al museo del Louvre. El secondo, che se ciama “Miracolo del calice intatto”, xe stà scominsià dal Mosca nel 1520 e finìo dal milanese Pietro Paolo Stella nel 1529. El se lo pole védare ne la capela de l’Arca. Da i documenti risulta che in chel periodo Giammaria Mosca el gera inpegnà, pare, anca a Venezia a l’altar magiore de la cesa de S. Rocco par le statue de S. Rocco, de S. Giovanni Battista, de S. Francesco e de do “Putti”.
Tanti xe i lavori venessiani atribuìi a Mosca e a la so botega in base a le testimonianse de le fonti cinquecentesche e a i confronti stilistici. Òpare presenti ne le cese venessiane de S. Maria Mater Domini e de S. Stefano. A lu xe atribuìi i tre rilievi del Cristo “Passo adorato da due angeli” ne la cesa venessiana de S. Maria delle Vergini e el cenotafio (monumento funebre) de Alvise Pasqualigo in S. Maria dei Frari. Ma tanti altri so lavori i xe de sto periodo venessian.
Nel 1529 el xe tornà a Padova dove che el se ga sposà. Par tre ani de Giammaria Mosca se perde trace sicure. Se dize che el sia stà ciamà dal re de Polonia Sigismondo I Jagellone par fare de i lavori ne la Catedrale de Cracovia, ma la xe solo na ipotesi. Xe certo però che nel 1532 el risulta ativo in Polonia par la realisassion de quatro medajoni in bronzo.
Mi, par brevità, go tajà curto su la descrission de i lavori fati fin ’desso da sto artista nostran, ma fra el 1533 e el 1536 risulta de certo che el gabia realizà el “Ciborio del Sacramento” par la Catedrale de Cracovia. Nel 1538 ne la Catedrale de Gniezno el ga fato la tonba de Andrzej Krzycki, uno de i più inportanti umanisti polachi. E da alora xe stà un continuo de incarichi inportanti in Polonia fatti dal re, da vescovi e da personagi in vista.

Altre òpere de Giammaria Mosca, dito “il Padovano”.

El xe morto a Cracovia prima del dissenbre 1573.
Massa longo sarìa l’elenco de le òpare de sto scultore e in fondo anca de scarso intaresse parché mi me basta contare de ’n altro personagio che ga fato onore a Padova tanto che i lo ga soranominà “il Padovano” e tiràrvelo fora dal scuro de la memoria. Padova se ga ricordà de lu parché ghe ga dedicà na strada, ma sfido che chi che passa da de là el sapia chi che el xe stà.

[torna sopra]