|
Editoriale
Vorìa on Nadale par tuti
Savemo che el xe on sogno, ma xe stà dito che el futuro xe suo de chi crede
ne la beleza de i sogni. Par questo se auguremo che el Nadale el vaga ben
par chi crede e par chi lo nega, par chi no vede l’ora che ’l riva e par chi se ne frega,
par chi ga tuto e par chi no ga gnente…
 | | Anca mi vorìa piassè rispeto pa’ i animài!... |
Se in sto Nadale tuti, ma propio tuti, se metéssimo a sognare, a desiderare, a volere on mondo pi giusto, forse el sogno de on “Nadale par tuti” el se podarìa realizare. Se questo non se avèra xe parché anca in sto Natale ognuno va par conto soo.
Epure sarìa belo védare che, vinta l’indifarenza, i problemi i vien afrontà con l’inpegno, la bona volontà, la responsabilità de tuti, inpegnàndose a fare la guera a ogni guera, a far nàssare in celo on arcobaleno de pace, mai visto prima. Poder avere on Nadale co on posto de lavoro dignitoso par chi lo ga perso; on posto de lavoro dove uno lavora volentieri, savendo de no èssare sfrutà e de no ris-ciare de farse male o de morire; on posto de lavoro dove la persona no xe un nùmaro, dove el valore de la vita vien messo al primo posto dal lavoratore, dal paron, dal dirigente, da chi comanda… el vapore.
Nadale el xe veramente on “Nadale par tuti” se le persone malà vien tratà tute te ’l stesso modo, senza difarenza de ticket, senza privilegi, senza mance, senza dover spetare on ano par fare na lastra al torace… e se tegna conto de i bisogni de le persone pi malmesse, de i anziani, de chi no ghe la fa da solo, de chi xe “diversamente abile”, de i pensionati che no ghe la fa a rivare a fine mese.
Che belo on Nadale dove i putini i possa vìvare sicuri, dove i veci sia circondà de cure e afeto, dove le done le possa sentirse tranquile quando che le xe in casa e quando che le va fora par la strada, senza ris-ciare de subire violenza, senza marìi, amanti, conpagni, morosi che se trasforma in Lupo Manaro.
Vorìa no sentir pi parlare de “esodati”, de precari, de “esuberi”, de cassaintegrati, de datori de lavoro che se tole la vita par disperazion, de tosi che se buta dal sètimo piano parché i se sente “diversi”, de studenti che rinuncia a vìvare a causa de on bruto voto a scola, de tosete che le ga oncora el pissoto al sole e le vende el so corpo a quatro farabuti senza scrupoli, che va in zerca de sodisfare i so bassi istinti de bestia.
Cossa pagarìa che, par sto Nadale, tute le polvarete bianche e le pìrole che fa nar ’torno la memoria e che xe drio inpestare de zizania el mèjo canpo de formento de la vita – la generazion de i zóvani – le deventesse vermolina in corpo a i traficanti de morte.
Vorìa on Nadale senza tuta chela volgarità che xe drio deventare “linguaggio comune” tra la gente, par le strade, ne i mezi de trasporto, ne i canpi de calcio, ne le trasmission televisive, in canbio de rispeto, educazion civica, cortesia e bele maniere.
Sì, xe propio vero che ’l xe on sogno cancelare l’inquinamento de l’anbiente, métare in sicureza fiumi e torenti, blocare la cementificazion selvagia, fermare i incidenti su le strade per abuso de alcool e droghe, risanare la “terra dei veleni”, rinunciare a l’intaresse personale par pensare al ben de tuti.
El xe on sogno, ma no rinuncio a sperare te ’l miracolo de “on Nadale par tuti”.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Vorìa on Nadale par tuti
Savemo che el xe on sogno, ma xe stà dito che el futuro xe suo de chi crede
ne la beleza de i sogni. Par questo se auguremo che el Nadale el vaga ben
par chi crede e par chi lo nega, par chi no vede l’ora che ’l riva e par chi se ne frega,
par chi ga tuto e par chi no ga gnente…
de Mario Klein
Da Rovigo
I Vèneti de Latina
de Gianni Sparapan
Da Verona
Quando èrene buteleti
Al tenpo de la nostra infansia, èrene inpegnà a inventarse zughi e zugàtoli. Stavolta passemo in rassegna on pochi de zughi.
de Wanda Girardi Castellani
|
